20
Ahabazi Siria ŋic bawahac‐jopawec
1 Siria ŋicwofuŋ Beŋhada e momorifâc‐ticne sasawa hetumaŋ‐jopawec. Eme ŋicwofuŋ 32 jaŋehec becâsic â keretac rocjopa‐fârerâ fe Samaria hae somâckehuc ʒika qambiŋ.
2 Ehuc haemaŋko Israe ŋicwofuŋ Ahaba dâŋ ʒiŋuc âzâcneniŋte kiŋaŋŋic sorec‐jopawec: “Beŋhada e ʒiŋuc mukac:
3 ‘Siliwa â golge i nore; erâ ŋonâŋfâcge sahac hawari biaŋ â naru motecfâcge jaŋe wâc nore jaha.’ ”
4 Iŋuc mume Israe ŋicwofuŋ e dâŋ ʒiŋuc bâtikiecnewec: “O ŋicwofuŋ‐nane, no nahacne mecne â wiacte wiac sasawa fonarekac i gore.”
5 Eme kiŋaŋŋic jaŋe Israe ŋicwofuŋtao mocwâc risierâ mumbiŋ, “Beŋhada e ʒiŋuc mukac: ‘No gorao ʒiŋuc muhuc dâŋ râepac: “Siliwa â gol, erâ ŋonâŋfâcge â naru motecfâcge i no qikiŋne‐narec.”
6 Erâ no sifu tomâcko dameŋ ʒiŋucne kiŋaŋ qaqafâc‐nane gorao sorec‐jopapemu. Eme jaŋe go gahacne ficko â kiŋaŋ qaqafâcge jaŋere ficko babasa gie bahuc wiac i me i hone ʒiziweekic i rorâ bawiseniŋmu.’ ”
7 Eme Israe ŋicwofuŋ e mâreŋ rune soŋaŋ hefârec‐joparâ muwec, “Ŋoŋe ŋic keci e imac‐nâpoocte gie bakac i hone‐hâmoniŋ. E ŋonâŋfâc‐nane â naru motecfâc‐nane, erâ siliwa â golnanere dâŋ râeme wareme manacnepac.”
8 Iŋuc mume soŋaŋ â ŋic ŋokac jaŋe ʒiŋuc âzâcnembiŋ: “Go hazec râerâ dâŋticne mi manac.”
9 Iŋuc mupie Israe ŋicwofuŋzi Beŋhada kiŋaŋŋicfâc‐ticne ʒiŋuc jazawec: “Ŋoŋe ŋicwofuŋ‐nane dâŋ ʒiŋuc âzâcnenʒepieŋ: ‘Kiŋaŋ qaqage no wiac bâbâni mumec i epemu â irec faicnao wiac gâcnere mukic i sâcne mi epemu.’ ” Iŋuc jazame kiŋaŋŋic jaŋe mocwâc risierâ bomboŋ‐jeŋic binaŋ bacnembiŋ.
10 Eme Beŋhadazi Israe ŋicwofuŋ dâŋ râecnehuc muwec, “Samaria mâreŋko rufe fokac i ŋicfâc‐nane sasawa jaŋe metape fufusuc roniŋte sâc eocmuo ine nemu jaŋe okacne bafehuc bazu‐narenʒepieŋ.”
11 Iŋuc mume Israe ŋicwofuŋzi dâŋ bâtikiecnehuc muwec, “Dâŋ ʒiŋuc fokac i manasucneniŋ: ‘Ŋic puriŋne moc e jahacnere maname ŋic sahac fâsâchec sâc mocjaha ekoperec mi ezejec.’ ”
12 Ehame Beŋhada e ŋicwofuŋ jaŋehec bozeo opâ sanaŋ nâhuc ŋeku dâŋ i manarâ ŋicfâc‐ticne jazarâ muwec, “Ajoc, dodoma‐ŋeŋic sâcke‐fâreniŋ.” Iŋuc mume jaŋe hae i râsi rocnehuc dodoma‐jeŋic sâcke‐fârembiŋ.
13 Ehame porofete moczi Israe ŋicwofuŋ Ahabare maŋfuŋko fisirâ muwec, “Wofuŋ e ʒiŋuc mukac: Ŋic guru dindiŋ ʒi honec‐jopakomec me? Manakic, no miŋecgac gore meo râec‐jopa‐fârepemu; eme noni sawa Wofuŋ jukopac i go mana tarazemec.”
14 Iŋuc mume Ahabazi muwec, “Weni jaŋehec iŋuc ecmu?” Mume muwec, “Wofuŋ e ʒiŋuc mukac: Qâhâc sâc irec mâreŋ soŋaŋ jaŋere kiŋaŋ qaqafâc jaŋehec gie i bapemu.” Iŋuc mume Ahabazi muwec, “Eme mozi ʒika fuŋkeocmu?” Wiome dâŋ bâtikiecnehuc muwec, “Goki.”
15 Iŋuc mume Ahabazi qâhâc sâc irec mâreŋ soŋaŋ jaŋere kiŋaŋ qaqafâc biric‐jopame ʒare‐jeŋic 232 ewec. Ehame jaŋere râpeo ine Israe ŋic sasawa biric‐jopame ʒare‐jeŋic 7 tauseŋ ewec.
16 Eme guŋpiticko Beŋhada â ʒikare bafickembiŋ, ŋicwofuŋ 32 i jaŋe mâmâc bozeo opâ sanaŋ nâku maŋjeŋic bibiriwame ŋehapie Israe ŋic jaŋe haeonec wahambiŋ.
17 Qâhâc sâc irec mâreŋ soŋaŋ jaŋere kiŋaŋ qaqafâc jaŋe bâniembiŋ. Eme Beŋhadazi ruc bapa ŋic sorec‐jopawec jaŋe risierâ ʒiŋuc âzâcnembiŋ: “Ŋic jaŋe haeonec wahaŋgopieŋ.”
18 Iŋuc âzâcnepie muwec, “Jaŋe wamao wareŋgopieŋko ɋâricne rocjopaniŋ, me ʒikare wareŋgopieŋko ɋâricne jaha rocjopaniŋ.”
19 Ŋic ʒiŋuczi haeonec waharâ rambiŋ: Qâhâc sâc irec mâreŋ soŋaŋ jaŋere kiŋaŋ qaqafâc â momori guru moc jaŋe bâjâpec‐jopambiŋ.
20 Ehuc ŋic jaŋe ru sâc râsifâc‐jeŋic jopambiŋ. Eme Siria ŋic jaŋe wisepie Israe ŋic jaŋe jâpec‐jopa rambiŋ, â Siria ŋicwofuŋ Beŋhada e ine becâsic ŋic jaŋehec becâsic mocko ferâ wisewec.
21 Wiseme Israe ŋicwofuŋ e rarâ becâsic â keretacfâc‐jeŋic rocjoparâ Siria ŋic jopahuc ima samaki bacjopawec.
22 Iŋuc eme porofetezi Israe ŋicwofuŋte maŋfuŋko rarâ ʒiŋuc âzâcnewec: “Go rarâ wiac weniŋuc ecmu i manasu biric ehuc hâbige rozemec. Siria ŋicwofuŋ e ʒoaŋ dameŋ fuŋkehame râsi fisi‐gareocmu hâcne.”
23 Eme Siria ŋicwofuŋ e kiŋaŋ qaqafâcne jaŋe ʒiŋuc muhuc âzâcnembiŋ: “Jaŋere nemufâc jaŋe tikire nemu, irec jaŋe boc siric‐nâpombieŋ. Nâŋâc wâneŋko jaŋehec qaqac enʒepeneŋ, ira ine jâmbomac siric‐jopanaŋmu.
24 Nâŋâc ʒiŋuc enʒepeneŋ: Ŋicwofuŋ jaŋe dodoma‐jeŋickonec bârâriec‐jopahuc jaŋere âkehoc momori jaŋe micne râec‐jopanʒepeneŋ.
25 Erâ momori mârâc sipirickembiŋ irec sâc biric‐jopanʒepeneŋ; erâ becâsic keretac mârâc bajumbeŋ irec sâc jaha baʒawiec‐jopanʒepeneŋ, ehuc jaŋehec wâneŋko qaqac enʒepeneŋ. Nâŋâc jâmbomac sanaŋkenaŋmu.” Eme dâŋjeŋic manarâ irec sâc ewec.
26 Eme ʒoaŋ dameŋ fuŋkehame Beŋhada e Siria ŋic biric‐joparâ bânie‐jareme Israe ŋic jaŋehec qaqac eniŋte Afeke haeo fembiŋ.
27 Eme Israe ŋic jaŋe wâc iŋuc jaha birickehuc nânâ opâ bâmockerâ jaŋeraopec rambiŋ. Erâ Israe ŋic jaŋe noniŋ guru jajahec mac iŋucnezi teuŋ âtembiŋ, â Siria ŋic jaŋe ine mâreŋ i sâcke‐fârembiŋ.
28 Ehame Anuture ŋic moczi Israe ŋicwofuŋtao fisirâ ʒiŋuc âzâcnewec: “Wofuŋ e ʒiŋuc mukac: ‘Siria ŋic jaŋe, “Wofuŋ e tikire nemu, e wâneŋte nemu aricne,” iŋuc mumbiŋte no guru dindiŋ ʒi megao râec‐jopa‐fârepemu. Iŋuc epe, noni sawa Wofuŋ jukopac i mana tarazemec.’ ”
29 Eme jaŋe ŋifec â ŋifec teuŋ âterâ fohapie ʒoaŋ gie bapa 7 tarawec. Ehame ʒoaŋ gie bapa namba 7 ira ʒika bâtâcnehuc Israe ŋic jaŋe Siria momori kikezi rara 100 tauseŋ ʒoaŋ mocjahao jopambiŋ.
30 Jopapie gâcne jumbiŋ jaŋe wiserâ Afeke haeo raʒimbiŋ. Ehame haesaczi rândiŋkerâ waha ŋic 27 tauseŋ jumbiŋ jaŋe imac‐jopawec.
Beŋhada e wâc iŋuc jaha wiserâ haeoa raʒirâ ficmaŋ ʒâʒâŋiŋko soŋkewec.
31 Ehame kiŋaŋ qaqafâcne jaŋe âzâcnerâ mumbiŋ: “Manakic, Israe kikefuŋ jaŋere ŋicwofuŋfâc jaŋe ŋicwofuŋ buuruc‐jeŋichec, iŋuc manaeŋgopeneŋ. Irec nâŋâc mateŋ qonaŋkerâ qizec‐nâŋecko repa qâfisehuc Israe ŋicwofuŋtao ranaŋ, e akic‐nâpoocmu mecne.”
32 Iŋuc murâ mateŋ qonaŋkerâ qizec‐jeŋicko repa qâfisembiŋ, ehuc Israe ŋicwofuŋtao rarâ ʒiŋuc mumbiŋ: “Kiŋaŋ qaqage Beŋhada e akickecmurâ mukac.” Iŋuc mupie Ahabazi muwec, “Hâc, jukac jaha me? E qomâ‐nane i.”
33 Eme ŋic jaŋe dâŋ i me i moc fuame mananʒepeneŋ muhuc hazec rârâe domambiŋte dâŋ i manarâ izia okacne bâtikiecnehuc mumbiŋ: “O jâmbomac Beŋhada e qomâge.” Iŋuc mupie muwec, “Ra jowa wareniŋ.” Eme Beŋhadazi erao fisime ecneme keretacko fewec.
34 Ferâ Ahaba dâŋ ʒiŋuc âzâcnewec: “Mamac‐nanezi mamacge hae jâoc rowec i mocwâc bârisiepemu. Eme go mamac‐nanezi Samaria haeo ewec irec sâc ehuc nareŋ gareŋ eere toma fuaocte Damasko hae turuŋne rorâ basanaŋkezemec.” E iŋuc mume Ahabazi muwec, “No dâŋ mukomec irec erâ behecgupe racmu.” Iŋuc murâ ehec ʒâʒâfic moc erâ beheme rawec.
35 Ehame porofete jaŋere motecfâc jaŋeraonec ŋic moc Wofuŋzi esoc qafeŋ ecneme âgo‐ticne ʒiŋuc âzâcnewec: “Nuc.” Iŋuc mume ŋic e qatarawec.
36 Iŋuc eme ʒiŋuc âzâcnewec: “Go Wofuŋte dâŋ mi reŋkemecte no behecnurâ rahaŋtec izia laioŋzi kihâmocguocmu.” Eme ŋic e rahame izia laioŋzi bâfuarâ kihâmowec.
37 Ehame porofete e ŋic moc bâfuarâ muwec, “Nuc.” Iŋuc mume ŋic e ʒâpâ qa ima ecnewec.
38 Eme porofete e ʒâŋe maine foŋkeme hawari‐ticne hetikieme ra hatao ŋicwofuŋ woŋeckewec.
39 Ehame ŋicwofuŋzi fotâcneme wiracnehuc muwec, “Kiŋaŋ qaqage no ʒikamaŋko jâmbâŋ raʒipac. Ehame momori moczi ŋic moc norao jowa fisirâ ʒiŋuc mujec: ‘Ŋic ʒi soŋaŋkezemec, e sifuckeocmuo ine goki ere âkehoc hâmocmu, me arictac eme ine siliwa moneŋ ŋemâc‐ticne wâŋ râecmu.’
40 Eme kiŋaŋ qaqage no koŋkoŋkehuc rarac wawarec ehape wisejec.” Iŋuc mume Israe ŋicwofuŋzi ʒiŋuc âzâcnewec: “Go gahac biac mutarakicte dâŋge iŋuc hâcne mutarazo.”
41 Iŋuc muhame porofete e ʒâŋe mai‐ticnao foŋ fowec i bâruŋ jaha firuewec. Iŋuc eme Israe ŋicwofuŋ e biac ʒiŋuc ʒâŋitawec: E porofete moc.
42 Ʒâŋitame ʒiŋuc âzâcnewec: “Wofuŋ e ʒiŋuc mukac: ‘Noni ŋic hâmocte biŋe bâwosâepo i megaonec behetec rajec, irec ere okacne goki hâmocmu â ŋicfâcne jaŋere okâcne gore ŋicfâc jaŋe hâmoniŋmu.’ ”
43 Iŋuc âzâcneme Israe ŋicwofuŋ e aarickeme dâŋemâc raku Samaria hae‐ticnao fisiwec.