7
Salomozi ficwiac gâcne bawec
1 Eme Salomozi jara 13 e jahacne ficwiac baku bafârewec.
2 Fic moc bawec ʒâŋene Lebanoŋ Kâtefic. Sâcticne ʒiŋuc: Ʒoricne‐ticne kubi 100, otecne‐ticne kubi 50 â hâŋne‐ticne kubi 30. Fic ira wâtuŋ ŋicne birine 3 doma rawec, eme wâtuŋ utunao jâmâzâc jâczi bacotec râe rambiŋ.
3 Eme bacotec irec fainao jâmâzâc katapazi tapane bambiŋ â bacotec jaŋe wâtuŋ biri 3 irec utunao fombiŋ. Wâtuŋ irec ʒare 45. Biri sâc 15, 15 iŋuc doma rambiŋ.
4 Eme qâqâtâc kataŋ i biri 3 râe rakicne, eme qâqâtâc kataŋ biri 3 i jaŋe ŋifec jaŋehec aŋa sâsâc bafârekicne.
5 Motâc â qâqâtâc kataŋ jaŋe sasawa tuturuŋ‐jeŋic 4, 4; eme kataŋ biri 3 i ŋifec jaŋehec aŋac sâsâc bafârekicne.
6 Eme ficʒora moc bawec. Ira wâtuŋ ŋicne biricke rakicne. Fic i ʒoricne‐ticne 50 kubi â otecne‐ticne 30 kubi. Erâ irec mainao fic moc ʒuhuckewec, i wâtuŋ biri â ririnehec.
7 Erâ fic moc bawec ʒâŋene Mumutara Giere Fic. Ira eri ŋeŋe‐ticne ŋewecte ŋehuc mumutara gie bajujec. Eme fic irec sâpe i ɋâriŋkonec fuŋkerâ feku tapanao fisiwecko jâmâzâc katapazi foŋke‐fârekicne.
8 Eme fic irec râpenao hae ʒoŋa moc fowec ira e jahacne fic bawec. Erâ fic moc ʒuhuckerâ bawec, i Faraore otâ, ŋonâŋ‐ticne hâcne ere biŋe. Fic jajahec i ficʒora bawec irec sâc jaha bacjofawec.
9 Fic sasawa i qânâ kâcɋenezi â furi sâkozi barakicne; qânâ i sâcmeda râehuc segezi bâtâcne fasaec ekicne. Gâcne i faio fefec hefepie sâpene ewec â gâcne Wofuŋte ufuŋ irecnec fuŋkerâ birike rakupie hae ʒoŋa kâcɋenao fisiwec.
10 Ficte hobeteŋne i qânâ fârine â kâcɋene râe rambiŋ, gâcne jaŋere sâc kubi 10, gâcne jaŋere kubi 8.
11 Eme irec fainao qânâ kâcɋene, sâcmeda râehuc he fasaec ekicne i râerâ jâmâzâc katapa mâmâc râembiŋ.
12 Hae ʒoŋa kâcɋenao qânâ he fasaec ehuc qânâ biri jahec â moc â biri moc ine jâmâzâc paraŋ iŋuc râembiŋ; erâ Wofuŋte fic irec hae ʒoŋa piticne â eri fic irec hae ʒoŋa i sâc ijaha bakicne.
Huramzi taha ufuŋ maŋnao aeŋzi metâ gie bawec
(Bin II 2:13–14; 3:15—5:1)
13 Eme ŋicwofuŋ Salomozi kiŋaŋ sorec‐jopame ra ŋic moc ʒâŋene Huram, Tiro haeonec, e jowa warembiŋ.
14 Ŋic e Naftali guruonec hozec moc ere ŋokâ. Mamac‐ticne ine Tiroŋic, e aeŋ bâbâroŋzi wiac bapa ŋic juwec. Ehame Huram e wâc iŋuc jaha aeŋ bâbâroŋzi gie i me i baocte moc mi quŋkehuc mamana sarichec jujâmbâŋkewec. Eki hâcne ŋicwofuŋ Salomo erao fisirâ gie‐ticne bacne‐fârewec.
15 E aeŋ bâbâroŋzi wâtuŋ ŋicne jajahec bacjofawec. Ʒoricne‐jekicte sâc i kubi 18; eme oorâŋ‐jekicte sâc muc moc râepie orâŋkerâ kubi 12 irec sâc ewec.
16 Eme aeŋ bâbâroŋzi wâtuŋ utu jajahec bacjofarâ wâtuŋ ŋicne jahere tofao ʒuhuc‐jofawec. Utu jahec ʒoricne‐jekicte sâc kubi 5 ewec.
17 Eme utu jahere faio eri wiac mizekicne râreckehuc râekicne, i kâpâcwâru mizekicne 7 irec hawari tinac bakicne.
18 Eme eri wiac irec fainao jâchândâŋ hawari biri 2 râec‐jofahuc rârec rârec râe rawec.
19 Eme wâtuŋ ŋicne jahere tofao utu râec‐jofakicne jahere faio faroqac hawari metâo râe‐fârekicne. Jahere sâc ine kubi 4 ewec.
20 Eme jâchândâŋ hawari biri 2 wâtuŋ utunere faio eri wiac mizekicne irec fainao rârec rârec râec‐jofakicne irec maŋnao jâchândâŋ 200 biricke rakicne, â wâtuŋ mocte faio sâc ijaha bakicne.
21 Eme tiri ufuŋte ficʒuhuc mamai ŋewec irec maŋfuŋko wâtuŋ ŋicne jajahec âkendâŋ‐jofawec. Wâtuŋ ŋicne fâreopec âkendâŋnerâ ʒâŋene Jakiŋ muwec, erâ wâtuŋ ŋicne qanaopec âkendâŋnerâ ʒâŋene Boasi muwec.
22 Eme wâtuŋ utune jahere faio faroqac hawari metâ barâ râekicne. Jaŋe iŋuc ehuc wâtuŋ ŋicne jahere gie batarambiŋ.
23 Eme aeŋ bâbâroŋ rike sueŋkerâ opâ râqâc sâko mako oorâŋ moc bawec. Mecqaŋeŋne ŋifeckonec ŋifec fisiwec i kubi 10 irec sâc. Hâŋne‐ticnere sâc i kubi 5, â mucsâc orâŋkehuc fârepie kubi 30 ewec.
24 Eme râqâc sâko mecqaŋeŋne heririŋnao metâ wiac hândâŋ biri jajahec râreckehuc râekicne. Eme kubi moc maŋnao hândâŋ 10, 10 iŋuc sasawa. Eme irec sâc fuaocte qanaŋ afezi sâsâcne barâ râepie foha aeŋ bâbâroŋ rikerâ hesiepie hurâ fuawec.
25 Eme râqâc sâko i bulimakao hawari 12 jaŋere faio râekicne. Jaŋeraonec jahec â moczi faic mâreŋkopec maickerâ domambiŋ, jahec â moczi ʒoaŋ huhunaopec, jahec â moczi juwic mâreŋkopec â jahec â moczi ʒoaŋ wewefunaopec. Eme sârec‐jeŋiczi iitic ehapie râqâc sâko i fai‐jeŋicko ŋewec.
26 Eme râqâc sâko ɋâfoŋne‐ticne i metape mocte sâc, eme mecqaŋeŋ‐ticne i hapec mecqaŋeŋ iŋucne â hawarine i faroqac âri iŋucne; maŋnao opâ hurâ ŋewec i pake 2 tauseŋ irec sâc.
27 Eme e aeŋ bâbâroŋzi keretac wiac 10 bawec wâc. Jaŋere sâc ʒiŋuc: Ʒoricne‐jeŋic kubi 4, otecne‐jeŋic kubi 4 jaha, â hâŋne‐jeŋic i kubi 3 irec sâc.
28 Eme keretac jaŋe ʒiŋuc bakicne: Keretac fârinere aeŋ hâŋne otecne râerâ râreckehuc sâpene bambiŋ.
29 Eme sâpene ira laioŋ, bulimakao â kerubim hawari metâ barâ râe rakicne, â aeŋ hâŋne otecnere faio sâc ijaha fowec, eme laioŋ â bulimakao jaŋere faicpec â juwicpec ira hendiŋ wiac metâ barakicne.
30 Eme keretac sâc ʒafeŋgâŋ 4 fowec i aeŋ bâbâroŋzi bakicne, eme otecne‐jeŋic i aeŋ bâbâroŋzia bakicne. Eme mene ŋeŋehasic i tuturuŋne sâc râekicne â opâ râqâc ihec ʒuʒuhuc bakicne.
31 Eme keretac irec fainao râqâc ŋeŋe‐ticne oorâŋ bambiŋ, i kubi 1 irec sâc bapie hâŋ fewec. Otecne‐ticnere sâc i kubi 1 â nâfocne ewec. Eme ira metâ wiac barakicne. Eme keretac sâpene i tuturuŋne 4 oorâŋ tâmiric fâfâsâc bakicne.
32 Eme ʒafeŋgâŋ jaŋe juwic qaŋeŋnao ŋifec â ŋifec ŋembiŋ â otecne‐jeŋic i keretackonec wâtuŋ hâŋ wahawec ihec basanaŋkekicne. Eme ʒafeŋgâŋ sosoka‐jeŋicte sâc i kubi 1 â nâfocne.
33 Eme ʒafeŋgâŋ jaŋe keretac ʒafeŋgâŋ iŋucne; eme otecne‐jeŋic â ʒafeŋgâŋte hawec â ʒafeŋgâŋ maŋnao dope doma rawec â ʒafeŋgâŋte oorâŋne i afezi sâc barâ aeŋ bâbâroŋ rike hesiec epie hurâ fua‐fârewec.
34 Eme mebapa 4 jaŋe keretac tuturuŋ sâc keretachec ʒuʒuhuc bahuc râekicne.
35 Eme keretac fainao ira wiac oorâŋ moc bakicne, i kubi moc nâfocnere sâc fowec erâ wâtuŋ â sâpenehec fowec.
36 Erâ wâtuŋ â sâpene ira sawane fowec sâc metâ bapazi kerubim, laioŋ â hâmujâc hawari wiac bahuc hendiŋ hawari wiac mâmâc râewec.
37 Keretac 10 jaŋe mutâcnekicne irec sâcko bawec hâcne. Jaŋe sasawa afezi sâcjeŋic barâ aeŋ bâbâroŋzi rike hesiec epie hurâ hawari‐jeŋic â sâcjeŋic mocjaha jâmbâŋ efârewec.
38 Eme e aeŋ bâbâroŋzi kuʒi sâko 10 bawec. Kuʒi mocte sâc i opâ pake 40 huwec. Mecqaŋeŋ‐jeŋicte sosoka i kubi 4, eme keretac sâc kuʒi moc moc ŋerawec.
39 Eme keretac 5 jaŋe ufuŋte fâreopec râec‐jopawec â 5 jaŋe ine qanaopec râec‐jopawec erâ râqâc sâko mako i fâreopec râeme juwic mâreŋkopec maickewec.
40 Eme Huram e kuʒi, sapac â soc titiere râqâc wiac bawec wâc. Iŋuc erâ ŋicwofuŋ Salomore micte Wofuŋte ufuŋko gie bawec i batara‐fârewec.
41 E wiac ʒiŋuc bafârewec hâcne: Wâtuŋ ŋicne jajahec utu‐jekic oorâŋ barâ fainao eri wiac mizekicne sâckerâ râe rawec.
42 Erâ jâchândâŋ hawari 400 bawec wâc, i eri wiac jajahec mizec‐jofakicne ira biricke rakicne, ehuc eri mizekicne mocko jâchândâŋ biri jajahec râec‐jofakicne, â mocko biri jajahec jaha râec‐jofakicne.
43 Erâ keretac wiac 10 â kuʒi sâko 10 i keretac sâc moc moc ŋerawec,
44 erâ opâ râqâc sâko â i derâ domaŋgopieŋ bulimakao 12.
45 Erâ kuʒi, sapac â soc titiere râqâc wiac, ine hâcne, wiac keci sasawa i Huramzi ŋicwofuŋ Salomore micte Wofuŋ ufuŋ‐ticnere biŋe aeŋ bâbâroŋ emasaŋkekicnezi bafârewec.
46 Jordaŋ wâneŋko Zaretaŋ â Sukoti hae jahere ŋondeŋko ŋicwofuŋzi mume wiac keci afezi sâc barâ aeŋ bâbâroŋ rike hesiec epie hurâ fua‐fârewec.
47 Eme Salomozi wiac keci ŋeŋe‐ticnao râe‐fârewec. Wiac i bocjaha â ŋemâcne jâmbâŋ, irec ŋemâc‐ticnere sâc roniŋte quŋkembiŋ.
48 Eme Salomozi mume Wofuŋte ufuŋ irec wiac kecʒiŋuc i wâc bafârembiŋ: Alata moc golzi bakicne, erâ tebo moc golzia bakicne, irec faio poroŋ furu mukicnezi fowec.
49 Erâ lambe dodoma 10 gol ematauckekicnezi bacjopakicne. Jaŋe furuficko ira mai domambiŋ, 5 jaŋe fâreopec â 5 jaŋe qanaopec iŋuc domambiŋ. Jaŋere eri wiac, lambe â masune i golzia bakicne.
50 Erâ râqâc â fitac wiac erâ soc titiere râqâc, kasoŋ â faŋ wiac i gol ematauckekicnezi bafârekicne. Eme furufic â furu dindiŋ irec motâc kataŋ, â fic maine irec motâc i golzia bakicne.
51 Eme ŋicwofuŋ Salomore micte Wofuŋte ufuŋko gie sasawa batara‐fârepie tarame Salomo e mamac‐ticne Dawidizi wiac sasawa gol, siliwa â wâcwiac gâcne bâtiriwec i bafisirâ Wofuŋte ufuŋko ʒeŋaŋ râewec.