9
Wofuŋzi Salomo mocwâc fuacneme arec jajahec ewec
(Bin II 7:11–22)
1 Eme Salomo e Wofuŋte fic mecne, e jahacne erific mecne â ficwiac gâcne baocte maŋkewec sâc i batara‐fârewec.
2 Eme Wofuŋzi mârâc Gibeoŋ haeo Salomo fuacnewec irec sâc mocwâc fuacnewec.
3 Ehuc dâŋ kecʒiŋuc âzâcnewec: “Go nore maio wira wâwâsic emeŋ i manapo. Eme go nore ʒâŋe fosanaŋkeocte fic bameŋ i jambuŋkepo, irec maŋʒâŋe‐nane ira râepe raŋɋa raŋɋa forahuc juzejec sanaŋ.
4 Eme go mamacge Dawidizi nore maio juwec irec sâc siocmâc â tiŋne juhuc noni dâŋsanaŋ â mumutâc dâŋnane reŋkeniŋte râe‐ŋarepo i reŋke‐fârecmuo
5 noni ŋicwofuŋ ŋeŋege basanaŋkepe Israe kikefuŋ raŋɋa raŋɋa ŋicwofuŋ jujarecmu. Noni mamacge Dawidi kecʒiŋuc âzâcnepo irec sâc fuaocmu: ‘Go ŋic moczi Israere eri ŋeŋeo ŋeocte moc mi basa‐jâmbâŋkecmu.’
6 Ŋoŋe me ɋâricfâc‐ŋeŋic ŋoŋe ine râpecnuhuc sâcmutâc me dâŋsanaŋ‐nane râe‐ŋarepo i mana rereŋ mi ehuc rarâ nemu gâcne numu‐jarehuc kiŋaŋ qajareniŋmuo
7 ine noni Israe kikefuŋ mâreŋ tahac‐ŋopapo irecnec bâsirowec‐ŋopapemu, erâ ufuŋ ʒira nore ʒâŋe biŋe foocte mutiripo i mai‐naneonec tuŋkepe raocmu; eme ŋic gurune gurune jaŋe Israe ŋic ŋoŋerao iticnehuc mu qâqiŋ dâŋ â mu âke sisic dâŋ eŋareniŋmu.
8 Eme fic sesuctac fuame jâuruniŋmu sâc jaŋe bipic tatara ejareha sisi fufuŋgaŋ ehuc ʒiŋuc mu wioc eniŋmu: ‘Wofuŋzi wemocte hae mâreŋ â ufuŋ ʒi wiac iŋucne ejactewec?’
9 Jaŋaczia iŋuc wiohuc ʒiŋuc munʒoŋgopieŋ: ‘Jaŋe Wofuŋ Anutu‐jeŋiczi kâcɋenefâc‐jeŋic Aigita mâreŋkonec jowac‐jopa wefuwec e beherâ nemu gâcne jaŋerao qohotarâ numu‐jarehuc kiŋaŋ qajarembiŋte Wofuŋ Anutu‐jeŋiczi wiac hâhâwicne keci sasawa bâfua‐jare‐fârewec.’ ”
Salomozi wiac gâcne ebac ewec irec binaŋ
(Bin II 8:1–18)
10 Eme Salomo e fic jajahec, Wofuŋte fic â e jahacne fic i jara 20 sâko baku batara‐fârewec.
11 Tiro haere ŋicwofuŋ Hiram eki jâc sasawa, jâmâzâc mecne, wete mecne â gol mecne i Salomore aŋac fowec sâc râecne‐fârewec. Eme ŋicwofuŋ Salomozi irec okacne Galilaia mâreŋko hae 20 ŋerambiŋ i râcnewec.
12 Eme Hiram e Salomozi hae 20 râcnewec i hone tâcneocte Tiro haeonec waharâ honec‐joparâ maname mi sâckewec.
13 Irec Salomo ʒiŋuc âzâcnewec: “Hahac‐nane, go hae ʒi wemo hae naremeŋ?” Iŋuc murâ mâreŋ irec ʒâŋe Kabuli muwec. Nâŋâcne dâŋko: Guec tâmiric. Eme ʒâŋe i ʒiŋuczia fokac jaha.
14 Eme Hiramzi gol moneŋ sâko 120 ŋicwofuŋtao râeme rawec.
15 Eme ʒi ine ŋicwofuŋ Salomozi ŋic gâcne kiŋaŋ qaqa gie mujareme bambiŋ irec binaŋ. Jaŋe kiŋaŋ qaqa gie bahuc wiac ʒiŋuc bafârembiŋ: Wofuŋte ufuŋ, Salomo e jahacne ficsanaŋ Milo â Jerusalem haere sacsanaŋ erâ hae sanaŋ Hazoro, Megido â Gaʒere.
16 Eme Gaʒere haere fuŋne ʒiŋuc: I mârâc jaha Aigita ŋicwofuŋ Faraozi wefurâ ro rauc erâ ʒoc râeme ʒâseŋkeme Kanaaŋ ŋic hae rune qâhâmoc‐jopawec, erâ juku otâ‐ticne, Salomore ŋonâŋ hâcne, e meo babacte bubiaŋ wiac râcnewec.
17 Eme Salomo e Gaʒere haere sesuctacko hae ɋâricne barâ Bete‐Horoŋ hae juwicne i bawec wâc,
18 erâ Juda mâreŋ burocnao Balata â Tama hae i mâmâc bawec.
19 Erâ wâc rowaŋ hae‐ticne sasawa â keretac â becâsifâc‐ticne jaŋere hae biri â wiac gâcne i Jerusalemko me Lebanoŋ tiki mâreŋko me uucmaŋ‐ticnao ira me ira baocte aŋackewec sâc bafârewec hâcne.
20 Eme Amori, Hiti, Periʒi, Hiwi â Jebusi ŋicguru jaŋere ʒika nâfoc jumbiŋ jaŋe Israe kikefuŋ jaŋere tofafâc mâcne.
21 Israe ŋic jaŋe ŋicguru i jopa mizieniŋte eipiembiŋ. Irec nâfocne jumbiŋ jaŋere ɋâricfâc jaŋe Israe mâreŋko ʒuhuckerâ jumbiŋ. Eme i jaŋe hâcne Salomozi kiŋaŋ qaqa gie sâko baniŋte mupaŋke‐jareme ʒuʒuhuc jaha bambiŋzi bahuc juŋgopieŋ.
22 Â Israe ŋic jaŋe ine gie moc mi mupaŋke‐jarewec. Jaŋe momorifâc‐ticne erâ momori micne fekicne â wahakicne erâ keretac â becâsicfâc‐ticne jaŋere soŋaŋ jumbiŋ.
23 Eme Salomore gie wiac bahuc jumbiŋ ŋic i jaŋere micne ine ŋic 550 jumbiŋ. Jaŋe ŋic soŋaŋ‐jopahapie gie wiac bahuc jumbiŋ hâcne.
24 Eme Salomo e Faraore otâ Dawidire haeonec jowa wefurâ fic bacneweckoa râeme fewec. Iŋuc erâ Milo ficsanaŋ bawec wâc.
25 Salomozi Wofuŋ alata bacnewec irec fainao jara sâc arecne 3 qowi bazi â wama bâzi erâ hosâc âsu wiac i Wofuŋ rikecne jujec. Iŋuc ehuc fic batara‐fârewec.
26 Eme Hâwec Bâbâroŋte mecnao Edom mâreŋko Eloti hae bembeŋko Ezioŋ‐Gebe hae ŋekac ira Salomozi mume woke wiac bacnembiŋ.
27 Eme Hiram e kiŋaŋŋicfâc‐ticne gâcne, wokeo juhuc hâwecte fuŋne mamana, jaŋe sorec‐jopame Salomore ŋicfâc jaŋehec wokeo jumbiŋ.
28 Eme jaŋe raku Ofiri mâreŋko fisirâ gol moneŋ sâko 420 rorâ risiehuc ŋicwofuŋ Salomo bafisicnembiŋ.