10
1 Eme ŋic kecʒiŋuc jaŋe ʒâŋe‐jeŋic râembiŋ: Hakaliare ŋokâ mâreŋ soŋaŋ Nehemia â Zedekia.
2 Seraja, Aʒaria â Jeremia.
3 Pasahuru, Amaria â Malikia.
4 Hatusi, Sebania â Maluku.
5 Harim, Meremoti â Obadia.
6 Danie, Ginetoŋ â Baruku.
7 Mesulam, Abia â Mijamiŋ.
8 Mazia, Biligai â Semaja. Ŋic i jaŋe taha bapa hâcne.
9 Eme Lewiŋic jaŋere ʒâŋe ine kecʒiŋuc: Aʒaniare ŋokâ Jesua â Henadadire ɋâricfâc jaŋeraonec ine Binui â Kadimiele.
10 Erâ qomâfâc‐jeŋic Sebania, Hodia, Kelita, Pelaja â Hanaŋ.
11 Mika, Rehobo â Hasabia.
12 Ʒakuru, Serebia â Sebania.
13 Hodia, Bani â Beninu.
14 Eme ŋic ŋokac jaŋere micnefâc ine ʒiŋuc jaŋe: Parosi, Pahati‐Moabi, Elam, Ʒatu â Bani.
15 Buni, Aʒegade â Bebai.
16 Adonia, Bigiwai â Adiŋ.
17 Atere, Hisikia â Aʒuru.
18 Hodia, Hasum â Bezai.
19 Harifi, Anatoti â Nebai.
20 Magapiase, Mesulam â Heziri.
21 Meseʒabe, Zadoko â Jadua.
22 Pelatia, Hanaŋ â Anaja.
23 Hosea, Hanania â Hasubu.
24 Halohesi, Pilaha â Sobeke.
25 Rehum, Hasabena â Maseja.
26 Ahia, Hanaŋ â Anaŋ.
27 Maluku, Harim â Bana.
28 Ehame ŋic ŋokac tiwâne sâko â taha bapa â Lewiŋic â motâc soŋaŋ â gae hehe ŋic â taha ufuŋte kiŋaŋ qaqafâc, erâ Anuture sâcmutâc dâŋ bajuhuc mâreŋne mâreŋne irec ŋicne ŋicne bâec bajarembiŋ jaŋe â ŋonâŋfâc‐jeŋic â ŋokâ otâfâc‐jeŋic erâ ŋic mamana saric â mamana tarahec jaŋe sasawa.
29 qomâfâc‐jeŋic ŋic kâcɋene jaŋehec qâfâsâerâ Anuture kiŋaŋŋic Mosezi Anuture sâcmutâc dâŋ jarewec irec sâcko juniŋte mumupaŋ maŋnao raʒimbiŋ. Erâ i Wofuŋ Anutu‐nâŋecte sâcmutâc sanaŋ â mumutâc â dâŋsanaŋ hone manac ehuc ebac eniŋte iŋuc hâcne embiŋ.
30 Nâŋe mâreŋ ʒirec ŋicne ŋicne jaŋe otâfâc‐nâŋec mi jarenʒepeneŋ me jaŋere otâfâc ŋokâfâc‐nâŋec jaŋere biŋe wâc mi rocjopanʒepeneŋ.
31 Erâ mâreŋ ʒirec ŋicne ŋicne jaŋe jacgoŋ me wiac gâcne furi baniŋte sabata hombaŋko bafisiniŋmuo ine nâŋe sabata hombaŋko me gie bapa tirine mocko furine mi banʒepeneŋ. Erâ jara 7 ira he sarac mi enʒepeneŋ â tofa‐nâŋec wâc mâc behenʒepeneŋ.
32 Eme nâŋe Anuture ufuŋte giere moneŋ moc, ʒâŋene seke, irec dâkâne moc jara sâc râehuc junaŋte musanaŋkeŋgopeneŋ.
33 Eme moneŋ izi hâcne wiac kecʒiŋuc kitâcnezejec: Poroŋ furu mukicne â ʒoaŋne ʒoaŋne nânâ bâzi â qowi bâzi ririkere wiac â sabata hombaŋte â mosa furunere tiwâ bâzire wiac, â tiwâ bâzi mupaŋkekicne irec wiac, â wiac tirine gâcne erâ Israe ŋic jaŋere sâqocne tâmireocte taha bâzi ririkere wiac, erâ Anutu‐nâŋecte ufuŋte giere wiac sasawa.
34 Erâ wâc taha bapa â Lewiŋic â ŋic ŋokac nâŋe garikiŋ‐nâŋec sâc jarane jarane dameŋ mukicnao sâcmutâc dâŋko qâreŋkekicne irec sâcko Wofuŋ Anutu‐nâŋecte alatare ʒoc bafisinaŋte ɋâsâi qaŋgopeneŋ.
35 Erâ nâŋe mâreŋ‐nâŋeckonec nânâ â jâc sasawa irec fâri i jarane jarane bâsuhuc Wofuŋte ufuŋko bafisinaŋte muŋgopeneŋ.
36 Erâ wâc sâcmutâc dâŋko qâreŋkekicne irec sâcko Anutu‐nâŋecte ufuŋko â taha bapa ira Anuture kiŋaŋ qahuc jueŋgopieŋ jaŋerao ŋokâfâc‐nâŋec â bulimakaofâc‐nâŋec â lama noniŋfâc‐nâŋec mârâc fufua jaŋe wâc iŋuc jaha râec‐jopanaŋte muŋgopeneŋ.
37 Ehuc padi bâsukicne sahacnehec â jâc sasawa irec fâri â waiŋ erâ wokemaŋ i taha bapa jaŋerao â Anuture ufuŋ maŋne maŋne ira bafisinaŋte muŋgopeneŋ wâc. Erâ Lewiŋic jaŋe hae boze‐nâŋec sâc irecnec teŋkonec wâŋ qânusuckeeŋgopieŋ, irec mâreŋ‐nâŋeckonec wiac teŋkonec wâŋ i jaŋerao bafisinaŋte muŋgopeneŋ.
38 Ehame Aroŋte ɋâric taha bapa eki ine Lewiŋic jaŋe teŋkonec wâŋ roniŋmu dameŋ ira qâtec‐jopazejec. Eme Lewiŋic jaŋe wiac teŋkonec wâŋ roeŋgopieŋ irecnec mocwâc teŋkonec wâŋ jaha rorâ Anutu‐nâŋecte ufuŋ maŋne maŋne rowaŋ forakac ira râenʒepieŋ.
39 Ehame Israe ŋic â Lewire ɋâricfâc jaŋe taha wiac‐jeŋic jacgoŋ â waiŋ â wokemaŋ i furuficte kuʒi râqâc wiac ŋekacko â taha bapa jaŋe kiŋaŋ qahuc jueŋgopieŋ â motâc soŋaŋ â gae hehe ŋic jaŋe jueŋgopieŋ fic maŋne maŋne ira bafisi râenʒepieŋ. Nâŋe Anutu‐nâŋecte ufuŋ i mi hone takirenaŋmu.