12
Taha bapa â Lewiŋic jaŋere ʒâŋe biri
1 Eme taha bapa â Lewiŋic kecʒiŋuc jaŋe Sealitiere ŋokâ Serubabe â Jesua jahehec mâmâc warembiŋ: Seraja, Jeremia â Eʒera.
2 Amaria, Maluku â Hatusi.
3 Sekania, Rehum â Meremoti.
4 Ido, Ginetoi â Abia.
5 Mijamiŋ, Madia â Biliga.
6 Semaja, Jojaribi â Jedaja.
7 Salu, Amoko, Hilikia â Jedaja. Ŋic i jaŋe Jesuare dameŋko taha bapa â qomâfâc‐jeŋic jaŋere micne jumbiŋ.
8 Eme Lewiŋic ine ʒiŋuc: Jesua, Binui, Kadimiele, Serebia, Juda â Matania. Matania e qomâfâcne jaŋehec daŋge mumuteŋ gae qizeckembiŋ.
9 Ehame qomâ jahec‐jeŋic Bakabukia â Uno jahe jaŋere ŋifecnao gieo domapic.
10 Eme Jesua e Jojakimte mamac â Jojakim e Eliasibire mamac â Eliasibi e Jojadare mamac.
11 Â Jojada e Jonataŋte mamac â Jonataŋ e ine Jaduare mamac.
12 Eme Jojakimte dameŋko ine taha bapa kecʒiŋuc jaŋe garikiŋ sâc irec micne jumbiŋ: Serajare guruo Meraja â Jeremiare guruo ine Hanania.
13 Eme Eʒerare guruo ine Mesulam â Amariare guruo ine Johanaŋ.
14 Eme Malukure guruo ine Jonataŋ â Sebaniare guruo ine Josefe.
15 Eme Harimte guruo ine Adana â Merajotire guruo ine Helekai.
16 Eme Idore guruo Ʒekaria â Ginetoŋte guruo ine Mesulam.
17 Eme Abiare guruo ine Ʒikiri, â Miniamiŋ â Moadia jahere guruo ine Pilitai.
18 Eme Biligare guruo Samua â Semajare guruo ine Jonataŋ.
19 Eme Jojaribire guruo ine Matenai â Jedajare guruo ine Uʒi.
20 Eme Salaire guruo ine Kalai â Amokore guruo ine Ebere.
21 Eme Hilikiare guruo ine Hasabia â Jedajare guruo ine Netanele.
22 Ehame Eliasibi, Jojada, Johanaŋ â Jadua jaŋere dameŋko Lewiŋic jaŋere garikiŋ sâc irec micne qâreŋ‐jopakicne. Erâ taha bapa jaŋere ʒâŋe qâreŋkehuc juhapie juku Perisia ŋic Dariusizi ŋicwofuŋ ewec.
23 Eme Lewire ɋâricfâc garikiŋ‐jeŋic sâc irec micne jaŋere ʒâŋe i Binaŋ Qâhâc papia qizecko qâreŋkekicne foha juku Eliasibire ŋokâ Johanaŋte dameŋ maickewec.
24 Eme Lewiŋic micnefâc‐jeŋic jaŋere ʒâŋe ine kecʒiŋuc: Hasabia, Serebia, Kadimiele ŋokâ‐ticne Jesua. Jaŋe qomâfâc‐jeŋic jaŋere ŋifecko domahapie jaŋehec Anuture ŋic Dawidizi sâcmutâc ejarewec irec sâcko nareŋ gareŋ â ââkehoc ehuc daŋge â ʒeri mumuteŋ ehuc jumbiŋ.
25 Ehame Matania, Bakabukia, Obadia, Mesulam, Talimoŋ â Akubu jaŋe motâc soŋaŋ juhuc motâcko rowaŋfic ŋerawec irec soŋaŋ doma jumbieŋ.
26 Ŋic i jaŋe Jesuare ŋokâ Jozadac ŋosa‐ticne Jojakimte dameŋko, erâ mâreŋ soŋaŋ Nehemia â taha bapa â miti qaqazu Eʒera jahere dameŋko jumbiŋ.
Haesac mutirimbiŋ
27 Jerusalem haesac mutiriniŋte dameŋ maickewec ira Lewiŋic hae‐jeŋic sâc jurambiŋkonec Jerusalem haeo jowac‐jopa fisipie gae hehuc bubiaŋ â daŋge mumuteŋ i woŋgâŋ â gita â kulelehec ehuc hombaŋ ŋeniŋte bâwosâec‐jopambiŋ.
28 Eme gae hehe ŋic jaŋere ɋâricfâc jaŋe Jerusalem hae rârec rârec â Netofati ŋic jaŋere hae ŋerawec irecnec fisirâ tumaŋnembiŋ.
29 Erâ wâc Bete‐Giligali haeonec â Geba â Aʒamaweta mâreŋkonec fisimbiŋ. Gae hehe ŋic jaŋe Jerusalem hae rârec rârec ira hae boze‐jeŋic barambiŋ hâcne.
30 Eme taha bapa â Lewiŋic jaŋe jaŋacnao eemasaŋ gie bambiŋ; erâ ŋic ŋokac jaŋerao wâc eemasaŋ gie bahuc haesac â motâc‐ticne i mâmâc emasaŋkembiŋ.
31 Eme no Judaŋic fekicne sac faio jowac‐jopa fepo, erâ daŋge gae hembiŋ jaŋe guru jajahec sâko âkendâŋ‐jopapo. Eme guru moc jaŋe sac faio Homotâcko fâreopec rambiŋ.
32 Eme jaŋere râpeo ine Hosaja â Judaŋic fekicne dâkâne jaŋe rambiŋ.
33 Erâ Aʒaria, Eʒera â Mesulam
34 erâ Juda, Benjamiŋ, Semaja â Jeremia jaŋe mâmâc rambiŋ.
35 Ehame taha bapa jaŋere ɋâricfâc tucne kecʒiŋuc jaŋe qeŋjeŋichec bâjâpec‐jopambiŋ: Jonataŋte ŋokâ Ʒekaria; ere apa ŋosafâc ine kecʒiŋuc: Semaja, Matania, Mikaja, Ʒakuru â Asafa.
36 Erâ Ʒekaria qomâfâc‐ticne Semaja, Aʒarele, Malalai, Gilalai, Mai, Netanele, Juda â Hanani jaŋe wâc qeŋjeŋichec bâjâpec‐jopambiŋ. Jaŋe Anuture ŋic Dawidizi gaere wiac bawec i barâ rambiŋ; ehame miti qaqazu Eʒerazi bânie‐jarewec.
37 Eme jaŋe Opâ Ʒâŋe Motâc ira fisirâ fofotâc jaha Dawidire hae qizecte ririo fehuc Dawidi ficticne faicnao fotâcnerâ ʒoaŋ wewefunao Opâ Motâcko fisimbiŋ.
38 Ehame daŋge gae hembiŋ guru moc jaŋe qanaopec rambiŋ. Eme no ŋic ŋokac dâkâne jaŋehec Ʒafe Ʒae faicnao sac faio Dadapic Sac ira rambeŋ.
39 Erâ Eferaim Motâc faicnao fotâcnerâ ra Motâc Raŋɋane â Hâwec Qowi Motâc erâ Hanane Ʒae â Hamea Ʒae i fotâcnerâ Lama Motâcko wâc fisimbeŋ, ehuc Momori Motâc ira fisirâ niniŋkembeŋ.
40 Eme daŋge gae hembiŋ guru i jaŋe mâmâc jaha Anuture ufuŋko domambiŋ. Erâ no â ŋic fekicne nohec jumbiŋ nâŋe wâc mâmâc domambeŋ.
41 Ehame taha bapa Eliakim, Maseja, Miniamiŋ, Mikaja, Elioenai, Ʒekaria â Hanania jaŋe qeŋjeŋichec domambiŋ.
42 Erâ Maseja, Semaja, Eleaʒa, Uʒi, Johanaŋ, Malikia, Elam â Eʒere jaŋe wâc iŋuc jaha. Ehame gae hehe ŋic jaŋe Jezerahiazi micne bajareme gae hembiŋ.
43 Eme ʒoaŋ ira Anutuzi ʒeri bari sâko eniŋte bufahac qajareme taha bâzi sâko rikehuc ʒeri bari embiŋ. Erâ ŋokac naru motec jaŋe wâc iŋuc jaha ʒeri embiŋ. Eme Jerusalem haeo ʒeri fuawec irec fânâŋ i taicko jumbiŋzi manambiŋ.
Taha bapa â Lewiŋic dope‐jeŋicte dâŋ
44 Eme ʒoaŋ ira ŋic gâcne rowaŋfic maŋne maŋne forawec irec soŋaŋ âkendâŋ‐jopambiŋ. Jaŋe sâcmutâc dâŋte sâcko taha bapa â Lewiŋic jaŋere biŋe gie ɋâricnaonec nânâ â taha wiac gâcne teŋkonec wâŋ i haene haene ŋic jaŋe bafisipie soŋaŋkeniŋte râec‐jopambiŋ hâcne. Judaŋic jaŋe taha bapa â Lewiŋic hone maiŋ gie bambiŋ irec kiwac qawac embiŋ hâcne.
45 Ehame taha bapa â Lewiŋic, erâ gae hehe ŋic â motâc soŋaŋ jaŋe Dawidi â ŋokâ‐ticne Salomo jahe sâcmutâc râepic irec sâcko Anutu‐jeŋicte gie bahuc eemasaŋ gie i wâc mâmâc bambiŋ.
46 Mârâc jaha Dawidi â Asafa jahere dameŋko gae hehe ŋic jaŋere micne jumbiŋ jaha â Anutu daŋge mumuteŋ ecnezore gae wâc forawec.
47 Eme Serubabe â Nehemia jahere dameŋko Israe ŋic sasawa jaŋe gae hehe ŋic â motâc soŋaŋ jaŋere nânâ biŋe ʒoaŋ sâc jare jumbieŋ. Eme jaŋe bâtâc barâ Lewiŋic jare jumbieŋ; ehame Lewiŋic jaŋe bâtâc barâ Aroŋte ɋâricfâc jaŋere biŋe râe jumbieŋ.