2
Nehemia Jerusalem haeo sorekicne
1 Arataʒeʒe e ŋicwofuŋ juhame jara 20 ewec dameŋ ira mosa Nisaŋte ʒoaŋ mocko waiŋ rorâ ŋicwofuŋ râcnepo. No juwicnao ʒâŋe mai‐ticnao busâqoc hawari mi jujupac.
2 Irec ŋicwofuŋzi wio‐narehuc muwec: “Go huc mi bacguha wemocte ʒâŋe maige busâqoc hawari ekac? No honecgupe maŋ kukumbuc faio jukomec tinac ekac.” E iŋuc wio‐nareme mâretec hâwicnuwec.
3 Eme ŋicwofuŋ ʒiŋuc âzâcnepo: “Ŋicwofuŋ go juraʒihuc juzemec sanaŋ! Apa ŋosafâc‐nane ducjopakicne hae mâreŋ i â haesac motâc ʒoczi rikekicnere sesucne fuarâ foha weniŋuc busâqoc tâmiric jupemu?”
4 No iŋuc mupe ŋicwofuŋzi wio‐narerâ muwec, “Go wemo wiacte numu‐narekomec?” Iŋuc wio‐nareme sambâŋte Anutu numucnepo.
5 Numucnerâ ŋicwofuŋ kecʒiŋuc âzâcnepo: “O ŋicwofuŋ, go manatec sâckeha â kiŋaŋ qaqage no honecnutec biaŋkekacko ine Juda mâreŋko apa ŋosafâc‐nane ducjopakicne hae ira sorecnutec rarâ hae i heɋârerâ bazepac.”
6 Eme ŋokac wofuŋ e gâjoŋne ŋifecnao ŋehame ŋicwofuŋzi wio‐narerâ muwec, “Go mo dameŋko razo mukomec â mo dameŋko risiecmu?” Ine hâcne, ŋicwofuŋ e sorecnuocte maname sâckewec; eme no dameŋ bacnepo.
7 Ehuc ʒiŋuc âzâcnepo: “Ŋicwofuŋ, go manatec sâckekacko ine Eufrata opâ ocniŋucnao mâreŋ fokac irec soŋaŋ juŋgopieŋ jaŋere papia qâreŋkerâ narezemec. Eme jaŋe mana‐narepie fotâcnerâ raku Juda mâreŋko fisizepac.
8 Erâ jâckâtegere soŋaŋ Asafa ere papia wâc qâreŋkezemec. Eme eki taha ufuŋte ficsanaŋ motâc‐ticnere â haesac erâ no nahac ŋeŋe juju epemu fic irec katapa wiac narezejec.” Eme Anutu‐nanere mesanaŋzi basanaŋnuwecte ŋicwofuŋ e numucnepo sâc mana‐narewec.
9 Eme no Eufrata opâ ocniŋucnao mâreŋ fokac irec soŋaŋ jaŋerao fisirâ ŋicwofuŋte papia jarepo. Ŋicwofuŋ e becâsicko rara ŋic â momori jaŋere fekicnefâc jaŋehec sorecnuwec.
10 Eme Horoni ŋic Saŋbalati â Amoŋŋic kiŋaŋ qaqa Tobia jahe biŋe i manarâ manapire mi sâcke‐jâmbâŋkewec. Jahe ŋic moczi Israe ŋic juju bapa‐jeŋicte bafic‐jopaocte fisime honerâ mâretec takic‐jopawec hâcne.
Nehemiazi esoc qafeŋ ejarewec
11 Eme no Jerusalem haeo fisirâ juhape ʒoaŋ gie bapa jahec â moc tarawec.
12 Tarame ŋafeo faharepe ŋic afecne mac nohec mâmâc faharembiŋ. Ehame Jerusalem haere wiac epemurâ Anutuzi maŋnaneo dâŋ râewec i ŋic moc mi mufua‐jarepo. Erâ no qowi moc aricne, mâc fainao ŋehuc rapo i sawa doma‐narewec.
13 Eme no ŋafeoa Wâneŋ Motâc ira hurâ rapo. Raku Kâte Qâto Opâ Nombâŋ ira fisirâ fotâcnerâ Homotâcko fisipo. Ehuc Jerusalem haesac hetâtiekicne â motâc‐ticne ʒoczi imacke‐fârewec i hone manac efârepo.
14 Eme izi Opâ Ʒâŋe Motâcko fisirâ fotâcnerâ Ŋicwofuŋte Opâ Ʒâkâŋko fisipo. Eme ira qowi fainao ŋehuc rapo izi fotâcneocte hata basawec.
15 Iŋuc eme no ŋafeoa wâneŋko ferâ haesac honepo. Izi mocwâc risierâ Wâneŋ Motâcko fotâcnerâ haeo raʒipo.
16 Ehame ŋic fekicne jaŋe, no wena rapo â wemo wiac jaha epo i moc mi manambiŋ. No Judaŋic me taha bapa me soŋaŋ micne me ŋic fekicne me ŋic gâcne sâko hae heɋârerâ baniŋmu jaŋe irec dâŋ i juwicnao biac mi mufua‐jarepo.
17 Eme no ʒiŋuc jazapo: “Ŋoŋe juju repicnao juŋgopieŋ â Jerusalem hae sesucne fuawec fokac â motâc‐ticne sasawa ʒoczi ʒafârewec i hone‐fâreŋgopeneŋ. Ajoc, nâŋâc Jerusalem haesac banaŋ! Ehuc mimi busâqoc faio boc mi junʒepeneŋ.”
18 Erâ no Anutu‐nanere mesanaŋzi bâwâzâŋnuwec â ŋiwofuŋzi dâŋ nazaweo i mâmâc mufua‐jarepo. Jazape mumbiŋ, “Nâŋâc faharerâ banaŋ.” Iŋuc murâ gie biaŋ i baniŋte meo roroc embiŋ.
19 Ehame Horoni ŋic Saŋbalati â Amoŋŋic kiŋaŋ qaqa Tobia â Araba ŋic Gesem jaŋe biŋe manarâ mana wahac‐nâpohuc mu surec enârehuc mumbiŋ, “Ŋoŋe keci wemo wiac baŋgopieŋ? Ŋoŋe ŋicwofuŋ maŋrâŋgeŋ bâfuacneŋgopieŋ hâcne.”
20 Jaŋe iŋuc mupie dâŋ kecʒiŋuc bâtikie‐jarepo: “Sambâŋ Anutuzi bafic‐nâpome juhâc qâhâmonaŋmu irec kiŋaŋ qaqafâcne nâŋe faharerâ banaŋmu, ehuc ŋoŋere dâŋ i mi mananaŋmu â ʒâŋe biŋe‐ŋeŋic i Jerusalem haeo wâc mi foocmu.”