5
Tofa babazu i qatarambiŋ
1 Juda ŋic ŋokac omane jaŋe Judaŋic qomâfâc‐jeŋic jaŋere manapie mi sâckeme dâŋsâko bâfuambiŋ.
2 Ehuc gâcne jaŋe ʒiŋuc hâcne mumbiŋ: “Nâŋe ŋokâ otâfâc‐nâŋec jaŋehec bocjaha eŋgopeneŋ, irec jacgoŋ qikiŋne‐nârepie nâhuc junʒepeneŋ.”
3 Ehame gâcne jaŋe wâc ʒiŋuc mumbiŋ: “Nâŋe rorocte erâ hesarac mâreŋ‐nâŋec â waiŋ gie‐nâŋec â ficnâŋec qikiŋnenaŋte muŋgopeneŋ.”
4 Eme gâcne jaŋe mumbiŋ, “Naŋe hesarac mâreŋ â waiŋ gie‐nâŋec izi moneŋ jaba kitâcneme ŋicwofuŋte sahac taha râembeŋ.
5 Nâŋere soc biuc i qomâfâc‐nâŋec jaŋere soc biuc irec sâc, â naru motecfâc‐nâŋec jaŋe wâc iŋuc jaha jaŋere naru motecfâc jaŋere sâc jaha. Erâ ine sifu nâŋe otâ ŋokâfâc‐nâŋec kiŋaŋ qaqa erâ juniŋte fotarie‐jareŋgopeneŋ, erâ otâfâc‐nâŋec gâcne biac kiŋaŋ qaqa bacjopakicne. Ehame ŋic gâcne jaŋe hesarac mâreŋ â waiŋ gie‐nâŋec nâwoc rombiŋte iŋuc me iŋuc ezore tâpiri basaŋgopeneŋ.”
6 No dâŋ mumbiŋ i manarâ aaricnu sâqorewec.
7 Ehuc dâŋ irec manatâc qâtâc eku soŋaŋ micne â ŋic fekicne dâŋ mujarepo. Ehuc ʒiŋuc jazapo: “Ŋoŋe Judaŋic qomâfâc‐ŋeŋic tofa bafehuc bazu‐ŋareniŋte fotarie‐jareŋgopieŋ.” Iŋuc murâ jaŋere dâŋ munaŋte mupe tutumaŋ sâko fuawec.
8 Eme no ʒiŋuc jazapo: “Nâŋâc tâpiri‐nâŋecte sâc Judaŋic qomâfâc‐nâŋec ŋic gurune gurune jaŋerao râec‐jopakicne i mocwâc bârisiec‐jopambeŋ. Ehame ŋoŋe ʒi qomâfâc‐ŋeŋic moneŋte erâ qikiŋ‐jopapie nâŋe mocwâc furi bacjopapene risieniŋte muŋgopieŋ me?” No iŋuc jazape jaŋe dâŋ basarâ mâc niniŋkerâ ŋembiŋ.
9 Eme no ʒiŋuc jazapo: “Ŋoŋe wiac eŋgopieŋ i biaŋne aricne. Ŋoŋe Anutu araŋ bacnehuc, kisâfâc‐nâŋec ŋic gurune gurune jaŋe mu surec enârenʒipiŋte sacfozic sâcne mi foniŋmu me?
10 Erâ wâc no â qomâfâc‐nane â gieŋicfâc‐nane nâŋe moneŋ â jacgoŋ jaba jarepene tofa fuawec i sifu behe‐jarenaŋte mukopac.
11 Â ŋoŋe miŋecgac jaha hesarac mâreŋ â waiŋ gie â oliwa gie â ficjeŋic erâ moneŋ sasawa â jacgoŋ â waiŋ â wokemaŋ jowac rombiŋ i mocwâc bâtikie‐jarenʒepieŋ.”
12 Iŋuc jazape jaŋe mumbiŋ, “Nâŋe wiac i bârisie‐jarehuc jaŋeraonec wiac mocte moc mi munaŋmu. Go mukomec irec sâcko enaŋmu hâcne.” Jaŋe iŋuc mupie no taha bapa hetumaŋ‐joparâ ejarepe mupaŋkembiŋ irec sâcko eniŋte mujomirembiŋ.
13 Erâ no ŋaqi‐nane ititiŋkehuc mupo, “Ŋic i me i moczi mumupaŋ ʒirec sâcko ebac mi eocmuo ine Anutuzi e wâc iŋuc jaha ficticnaonec â gie‐ticnaonec ititiŋkezejec. Iŋuc eme ŋic e mafa tâmiric erâ hapetac juzejec.” No iŋuc mupe kikefuŋ jaŋe “Jâmbomac” muhuc Wofuŋ muteŋ bâteŋ ecnembiŋ. Ehuc ŋic jaŋe mupaŋkembiŋ irec sâc hâcne embiŋ.
14 Erâ i sawa mâcne, Arataʒeʒezi ŋicwofuŋ juhame jara 20 ewec dameŋ ira Judaŋic jaŋere mâreŋ soŋaŋ âkendâŋnumbiŋ. Eme jara 12 jufehape e jahacne ŋicwofuŋ juju jara 32 ewec. Eme no nahacne â qomâfâc‐nane mecne nâŋe dameŋ ŋondeŋ irec maŋnao mâreŋ soŋaŋte nânâ biŋe mukicne i moc mi nâmbeŋ.
15 Mâreŋ soŋaŋ raŋɋane nore juwicnao jumbiŋ jaŋe ŋic ŋokac jaŋere faio tagi afecne mi hembiŋ. Ehuc ʒoaŋ sâc siliwa moneŋ 40 irec sâc nânâ â waiŋ jowac rombiŋ. Ehame kiŋaŋ qaqafâc‐jeŋic jaŋe wâc ŋic ŋokac ŋicbomboŋ ejarembiŋ. No ine Anutu araŋ bacnehuctecne iŋuc mi epo.
16 Erâ wâc no sacgie i paŋpaŋnea bahuc domapo, ehuc mâreŋ moc mi rauckepo. Ehame gieŋicfâc‐nane jaŋe giere ijaha tumaŋne‐fârembiŋ.
17 Eme Judaŋic â ŋic fekicne 150 jaŋe nore ficko nânâ nâjumbieŋ. Erâ ŋic gurune gurune rârec‐nâporâ jumbiŋ irecnec fisi‐nârembiŋ jaŋe ine mi wosec‐jopakicne.
18 Irec ʒoaŋ gie bapa sâc nânâ ʒiŋuc bâmocke‐narekicne: Bulimakao mocjaha â lama hone wosâc ekicne 6, erâ qâqâc wâc iŋuc jaha bâmocke‐narembiŋ. Eme ʒoaŋ gie bapa 10 tarame sâc waiŋ ʒopo mâretec gurucke‐narembiŋ. Erâ no wiac sasawa i ŋic ŋokac jaŋe tagi bâmâmâcke‐jarekicnere mâreŋ soŋaŋte nânâ biŋe fuaocte mukicne irec sâc fua‐nareocte mi fotarie‐jarepo.
19 O Anutu‐nane, go ŋic ŋokac jaŋere wiac sasawa efârepo irec mana‐naretec biaŋkezejec.