8
Eʒerazi ŋic ŋokac sâcmutâc dâŋ wose‐jarewec
1 Eme ŋic ŋokac jaŋe ʒeŋgoma Opâ Motâcte hae ʒoŋao tumaŋnehuc hâmbâŋ mocjaha embiŋ. Ehuc miti qaqazu Eʒera e Mosere sâcmutâc dâŋte papia qizec Wofuŋzi Israe ŋic jarewec i bawareocte âzâcnembiŋ.
2 Eme mosa 7 irec gie bapa fufuŋkenao ŋic â ŋokac erâ ŋic mamana tarahec jaŋe tumaŋ nehapie taha bapa Eʒera e sâcmutâc dâŋ i jaŋerao barawec.
3 Erâ Opâ Motâcko hae ʒoŋa maickehuc ŋic â ŋokac erâ ŋic mamana tarahec jaŋere ʒâŋe maio furictea fuŋkerâ wosehame juku guŋpitic ewec. Ŋic ŋokac jaŋe ine sâcmutâc dâŋte papia qizecko dâŋ fowec i mananiŋte hazec râe‐hâmombiŋ.
4 Eme miti qaqazu Eʒera e tutumaŋ irec biŋe jâczi kanʒeri bambiŋ ira ferâ domawec. Ehame gâjoŋne ŋifec fâreopec ine ŋic kecʒiŋuc jaŋe domambiŋ: Matitia, Sema, Anaja, Uria, Hilikia â Maseja. Eme qana‐ticnaopec ine kecʒiŋuc jaŋe domambiŋ: Pedaja, Misae, Malikia, Hasum, Hasibadana, Ʒekaria â Mesulam.
5 Eme Eʒera e ŋic ŋokac jowaru ferâ domawecte papia qizec i ŋic ŋokac sasawa jaŋere ʒâŋe faio qaratiewec, qaratiehame ŋic ŋokac jaŋe faharerâ domambiŋ.
6 Eme Eʒera e Wofuŋ Anutu fekicne muac baafec ecnewec. Ehame ŋic ŋokac jaŋe mejeŋic bafaharehuc dâŋ ʒiŋuc bâtikiecnehuc mumbiŋ: “Jâmbomac, jâmbomac.” Iŋuc muhuc daperâ ʒâŋe mai‐jeŋic mâreŋko hetutuckehuc Wofuŋ mu wâwâsic ecnembiŋ.
7-8 Eme Jesua, Bani, Serebia, Jamiŋ, Akubu, Sabetai, Hodia, Maseja, Kelita, Aʒaria, Joʒabada, Hanaŋ, Pelaja â Lewiŋic jaŋe ŋic ŋokac ijaha domahapie sâcmutâc dâŋ irec fuŋne jazambiŋ. Jaŋe Anuture sâcmutâcte papia qizec i ŋeŋnea wosembiŋ. Erâ dâŋ wosembiŋ sâc irec fuŋne ŋic ŋokac jaŋe mana taraniŋte mu rituc ejarembiŋ.
9 Eme mâreŋ soŋaŋ Nehemia â taha bapa â miti qaqazu Eʒera erâ Lewiŋic jaŋe ŋic ŋokac qazu‐jarehuc ʒiŋuc jazambiŋ: “Ʒoaŋ ʒi Wofuŋ Anutu‐ŋeŋicte tiri ʒoaŋ, irec ŋoŋe ki busâqoc wiac mi enʒepieŋ.” Ŋic ŋokac jaŋe sâcmutâc dâŋ i manarâ kiombiŋte iŋuc jazambiŋ hâcne.
10 Eme Eʒerazi jazarâ muwec, “Ŋoŋe hae‐ŋeŋic sâc râwiŋnerâ wokemaŋ â waiŋ aŋacnehec nâhuc tucne âgo gâcne nânâ wiac mi bâmockembiŋ jaŋe nâ gumec ejarenʒepieŋ. Ʒoaŋ ʒi Wofuŋ‐nâŋecte tiri ʒoaŋ hâcne. Erâ Wofuŋte ʒeri ee izi hâbi‐ŋeŋic ekacte ki busâqoc mi enʒepieŋ.”
11 Irec Lewiŋic jaŋe ŋic ŋokac bâniniŋ‐jopahuc kecʒiŋuc mumbiŋ: “Ʒoaŋ ʒi tiri ʒoaŋ, irec ŋoŋe niniŋkerâ ki busâqoc mi eniŋ.”
12 Eme ŋic ŋokac jaŋe dâŋ mutaniŋke‐jarekicne i mana tarambiŋte nânâ opâ nâhuc tucne âgo gâcne nâ gumec ejarehuc ʒeri bari eniŋte hae‐jeŋic sâc râwiŋnembiŋ.
13 Izi hae fureme ŋic ŋokac sasawa garikiŋ‐jeŋic sâc jurambiŋ jaŋere micnefâc jaŋe taha bapa â Lewiŋic jaŋehec sâcmutâc dâŋ irec mamana gie baniŋte miti qaqazu Eʒerarao fisi tumaŋnembiŋ.
14 Ehuc Israe ŋic jaŋe mosa 7 wahame tiwâ bâzi ehuc rehac bozeo juniŋte Wofuŋzi Mose sâcmutâc ecnewec irec dâŋ i sâcmutâc papiao qâreŋkekicne fome bâfuambiŋ.
15 Erâ jaŋe hae‐jeŋic sâc â Jerusalem haeo dâŋ ʒiŋuc mutaniŋkehuc musaweniŋte mukicne: “Ŋoŋe dâŋ qâreŋkekicne irec sâcko boze baniŋte tiki mâreŋko rarâ haeonec â kâteonec oliwa tieŋne â ɋareŋ â woŋgaŋ erâ jâc rehacnehec gâcne bafisinʒepieŋ.”
16 Eme irec ŋic ŋokac jaŋe ra rorâ bafisihuc buc buc ficbupu‐jeŋic sâc â hae ʒoŋac‐jeŋic sâc â Anuture ufuŋte hae ʒoŋao â Opâ Motâcte hae ʒoŋao â Eferaim Motâcte hae ʒoŋao boze barambiŋ.
17 Eme kâpâcwâruonec risiembiŋ jaŋe ʒeŋgoma boze barâ ira ŋeŋe juju embiŋ. Israe ŋic jaŋe Nuŋte ŋokâ Josuare dameŋkonecteaŋ wiac iŋucne moc mi ewefuhuc jumbiŋ. Jaŋe iŋuc ehuc mâretec kiwac qawac embiŋ.
18 Ehame Eʒera e hombaŋ fuŋkehuc Anuture sâcmutâc dâŋte papia qizec i ʒoaŋne ʒoaŋne wosehuc juhame juku hombaŋ tarawec. Jaŋe tiwâ bâzi hombaŋ i ʒoaŋ gie bapa 7 ŋembiŋ. Eme ʒoaŋ gie bapa 8 ira ine mumutâc dâŋte sâcko tutumaŋ sâko epie tarawec.