3
Lewiŋic jaŋere ʒare â gie biri irec dâŋ
1 Wofuŋzi Sinai tikio Mose dâŋ âzâcnewec dameŋ ira Mose â Aroŋ jahere ɋâricfâc kecʒiŋuc jumbiŋ:
2 Aroŋ ŋokâfâc‐ticne janere ʒâŋe ine kecʒiŋuc: Mârâc motec ere ʒâŋe Nadaba, ere râpeo ine Abihu â Eleaʒa erâ Itama.
3 Aroŋte ŋokâfâc, taha bapa gie baniŋte mufiriec‐jopahuc wokemaŋ rua‐jarekicne jaŋere ʒâŋe iŋuc hâcne.
4 Nadaba â Abihu jahe ine Sinai mâreŋ burocnao Wofuŋte maio taha bâzi wâwânâŋhec rikehuc izia hâmopic. Jahe naru motec tâmiric. Irec Eleaʒa â Itama jahe mamac‐jekic Aroŋ eki hone soŋaŋ ejacteha taha bapa gie bahuc jupic.
5 Eme Wofuŋzi Mose kecʒiŋuc âzâcnewec:
6 “Go Lewiŋic jaŋe ejaretec warepie taha bapa Aroŋ ere maŋfuŋko râec‐jopatec kiŋaŋ qacnehuc junʒepieŋ.
7 Jaŋe tutumaŋ qoruc bozeo taha bapa â kikefuŋ sasawa jaŋere gie fokac i hâcne bahuc tiri bozere kiŋaŋ gie banʒepieŋ.
8 Jaŋe tutumaŋ qoruc bozere wâcwiac i hone soŋaŋ ehuc Israe ŋic gie mujarekicne jaŋe âkehoc‐jopahuc tiri bozere kiŋaŋ qanʒepieŋ.
9 Go Israe ŋic jaŋeraonec Lewiŋic hâcne Aroŋ â ŋokâfâcne jaŋerao ʒuhuc‐jopatec Aroŋte biŋe efârenʒepieŋ.
10 Eme go Aroŋ â ŋokâfâc‐ticne jaŋe taha bapa giere âkendâŋ‐jopazemec, ehame ŋic omane moczi taha bapa gieo ʒuhuckezo mume qâhâmonʒepieŋ.”
11 Eme Wofuŋzi Mose kecʒiŋuc âzâcnewec:
12 “Manakic, no Israe ŋic jaŋeraonec mârâc motec jaŋere âkehoc Lewiŋic rowosâec‐jopapo, jaŋe hâcne nore biŋe erâ junʒepieŋ.
13 Mârâc motec jaŋe sasawa nore biŋe. No Aigita mâreŋko ŋic â qowi mârâc fufuafâc‐jeŋic qâhâmoc‐jopa‐fârepo, dameŋ ira hâcne Israe ŋic jaŋere mârâc fufua sasawa no nahacne biŋe rowosâec‐jopapo. Jaŋe nore biŋe erâ junʒepieŋ. No Wofuŋ jukopac hâcne.”
14 Eme Wofuŋ e Sinai mâreŋ burocnao Mose kecʒiŋuc âzâcnewec:
15 “Go Lewire ɋâricfâc jaŋe fic sâc â mamacfâc‐jeŋic jaŋere ʒâŋe biri forakac irec sâcko wose qâreŋ ejarezemec, ehuc ŋic mosa‐jeŋic wâŋko domarâ fekac jaŋe wosec‐jopazemec.”
16 Eme Mose e Wofuŋzi mutâcnecnewec irec sâc wose qâreŋ ejarewec.
17 Lewire ŋokâfâc jaŋere ʒâŋe biri ine kecʒiŋuc: Geresoŋ, Kohati â Merari.
18 Geresoŋ ŋokâ jahec‐ticne garikiŋfâc‐jekichec jaŋere ʒâŋe ine kecʒiŋuc: Libini â Simei,
19 Kohati ŋokâfâc‐ticne garikiŋfâc‐jeŋichec jaŋere ʒâŋe ine Amaram, Izara, Heboroŋ erâ Uʒiele.
20 Merari ŋokâ jahec‐ticne garikiŋfâc‐jekichec jahere ʒâŋe ine Mali â Musi. Lewire ɋâricfâc mamacfâc‐jeŋic jaŋere ʒâŋe biri forawec irec sâc iŋuc hâcne jumbiŋ.
21 Libini â Simei ŋicguru i jaŋe Geresoŋtaonec fua wefumbiŋ, jaŋe Geresoŋte ɋâricfâc hâcne.
22 Ʒare‐jeŋic ine kecʒiŋuc: Ŋic mosa‐jeŋic wâŋko domarâ fekac jaŋe wosec‐jopakupie ʒare‐jeŋic 7 tauseŋ 500 ewec.
23 Geresoŋte ɋâricfâc jaŋe ʒoaŋ huhunaopec tiri boze râpenao teuŋ âterâ ŋec foc embiŋ.
24 Micne‐jeŋic ine Laele ŋokâ‐ticne Elisafa eki juwec.
25 Geresoŋte ɋâricfâc jaŋe wiac kecʒiŋuc soŋaŋkeniŋte mujarekicne: Tutumaŋ qoruc bozeo tiri boze ŋewec i mecne erâ qoruc boze â bupu‐ticne erâ motâc‐ticnere ââketâc,
26 hae ʒoŋa kâcɋenere ââketâc qoruc erâ hae ʒoŋa piticne alata â tiri boze rârec‐jofahuc forakac irec motâcte ââketâc â mucticne i mecne erâ ba bâpiaŋ eere wiac mâmâc.
27 Amaram â Izara â Heboroŋ erâ Uʒiele ŋicguru i jaŋe Kohatiraonec fua wefumbiŋ, jaŋe Kohatire ɋâricfâc hâcne.
28 Ʒare‐jeŋic ine kecʒiŋuc: Ŋic mosa‐jeŋic wâŋkonec domarâ fekac jaŋe wosec‐jopakupie ʒare‐jeŋic 8 tauseŋ 600 ewec. Jaŋe hâcne furuficte kiŋaŋ gie baniŋte mujarekicne.
29 Kohatire ɋâricfâc i jaŋe mâreŋ juwicpec tiri boze râpenao teuŋ âterâ ŋec foc embiŋ.
30 Micne‐jeŋic ine Elisafaŋ eki juwec.
31 Jaŋe wiac kecʒiŋuc soŋaŋkeniŋte mujarekicne: Qorac tapa katapa, tebo, lambe dodoma, alata â taha bapa jaŋe taha gie bambiŋ irec wâcwiac â furufic irec ââketâc, erâ i ba bâpiaŋ eere wiac.
32 Ehame Aroŋ ŋokâ‐ticne Eleaʒa eki Lewiŋic jaŋere micne juhuc furuficko gie bambiŋ jaŋe soŋaŋ‐jopawec.
33 Mali â Musi ŋicguru i jaŋe Merariraonec fua wefumbiŋ, jaŋe Merarire ɋâricfâc hâcne.
34 Ʒare‐jeŋic ine kecʒiŋuc: Ŋic mosa‐jeŋic wâŋkonec domarâ fekac jaŋe wosec‐jopakupie ʒare‐jeŋic 6 tauseŋ 200 ewec.
35 Micne‐jeŋic ine Abihaire ŋokâ Zuriele eki juwec. Jaŋe mâreŋ faicpec tiri boze râpenao teuŋ âterâ ŋec foc embiŋ.
36 Jaŋe wiac kecʒiŋuc soŋaŋkeniŋte mujarekicne: Tiri bozere paraŋ â babasanaŋ‐ticne, erâ wâtuŋ â râqâc wiac ŋesiŋ‐ticne erâ wâcwiac‐ticne sasawa, erâ i ba bâpiaŋ eere wiac.
37 Erâ hae ʒoŋare wâtuŋ doma rawec i jaŋere ŋesiŋ â fâzâ erâ mucwiac i mâmâc soŋaŋ‐jopambiŋ.
38 Eme mâreŋ ʒoaŋ wewefunaopec, tiri boze maŋfuŋnao hâcne, ira Mose â Aroŋ erâ Aroŋ ŋokâfâc‐ticne jaŋe teuŋ âterâ ŋec foc embiŋ. Jaŋe hâcne Israe ŋic jaŋere erâ furuficko taha gie bahuc jumbiŋ. Ehame ŋic omane moczi maŋfuŋ‐jeŋicko fisime qâhâmombiŋ.
39 Mose â Aroŋ jahe Wofuŋte micte Lewiŋic fic sâc mosa‐jeŋic wâŋkonec domarâ fekac jaŋe wosec‐jopapie ʒare‐jeŋic 22 tauseŋ ewec.
Lewiŋic â Israe ŋic mârâc fufua jaŋere dâŋ
40 Eme Wofuŋzi Mose kecʒiŋuc âzâcnewec: “Go Israe ŋic jaŋere mârâc motecfâc mosa‐jeŋic wâŋkonec domarâ fekac jaŋere ʒâŋe muhuc wosec‐jopazemec.
41 Ehuc Israe mârâc motecfâc‐jeŋic jaŋere okacne Lewiŋic jaŋe Wofuŋ nore biŋe erâ juniŋte rowosâec‐jopazemec. Erâ Israe ŋic lama bulimakaofâc‐jeŋic mârâc fufua irec okacne Lewiŋic jaŋere bulimakao mârâc fufua nore biŋe jaha qazemec.”
42 Eme Mose e Wofuŋzi mutâcnecnewec irec sâc Israe ŋic mârâc motecfâc‐jeŋic wosec‐jopawec.
43 Eme mârâc motec sasawa ʒâŋe biri‐jeŋic forawec irec sâc mosa‐jeŋic wâŋkonec domarâ fekac jaŋe wosec‐jopakume ʒare‐jeŋic 22 tauseŋ 273 fuawec.
44 Eme Wofuŋzi Mose kecʒiŋuc âzâcnewec:
45 “Go Israe ŋic mârâc motecfâc‐jeŋic jaŋere okacne Lewiŋic jaŋe Wofuŋ nore biŋe erâ juniŋte rowosâec‐jopazemec, ehuc Israe ŋic lama bulimakaofâc‐jeŋic jaŋere okacne Lewiŋic jaŋere lama bulimakao nore biŋe jaha qazemec.
46 Israe ŋic mârâc motecfâc‐jeŋic jaŋere ʒarezi Lewiŋic jaŋere ʒare jâurukac, 273 irec sâc jâurukac hâcne. Irec 273 jaŋe sahac taha‐jeŋic moneŋ râenʒepieŋ.
47 Ehame go moctaonec siliwa moneŋ 5 â moctaonec 5 jaha, iŋuczi iŋuc rofârezemec; ine furuficte moneŋ hawari fokac irec sâc hâcne rozemec. Ehame moneŋ bâbâroŋ 20 izi siliwa moneŋ wâŋ ezejec.
48 Eme go sahac taha moneŋ râepie Aroŋ â ŋokâfâc‐ticne jaŋe jarezemec.”
49 Eme Mose e Lewiŋic jaŋere okacne ŋic gâcne wose bâtiric ejarekicne jaŋere sahac taha moneŋ rowec.
50 Moneŋ ʒare ine kecʒiŋuc rowec: Furuficte moneŋ hawari fowec irec sâc siliwa moneŋ 1 tauseŋ 365 rowec hâcne.
51 Erâ Mose e Wofuŋzi mutâcnecnewec irec sâc ehuc sahac taha moneŋ i Aroŋ â ŋokâfâcne jarewec.