3
Ŋokac jaŋere dâŋ
1 Ŋokac ŋoŋere iŋuc jaha mupe, ŋoŋe ŋowefâc-ŋeŋic jaŋere wahamicne junšepieŋ. Eme ŋowefâc-ŋeŋic gâcne miti qiqikiŋ jueŋgopieŋ jaŋe dâŋ mi jajaza mâc rume-jarehuc maŋɋaɋac jupie
2 ŋonâŋfâc-jeŋic ŋoŋere juju bapa hone manac erâ maŋjeŋic bârisienšepieŋ.
3 Ŋoŋe sahacte eri, qizec ba ericko bapa, kubu wiac furi sâko qoqonaŋ, ŋaqi qâreŋ biaŋ rojuju, irec manapie jawane ezejec.
4 Ehame buuruc fârine, maŋwâmbuŋko soŋkerâ tiŋbenoŋ bâfuaekac, izi eri fofo sanaŋ-ŋeŋic eme Anutuzi maname furi sâko eocmu.
5 Miti ŋokac mârâc jujumbieŋ jaŋe eri i hâcne baju jumbieŋ, ehuc Anuturao roweckehuc ŋowefâc-jeŋic sâsec-jopa jumbieŋ.
6 Sara eki hâcne Abraham dâŋticne reŋke jujec, ehuc ŋicbomboŋ mucne jujec. Eme ŋoŋe wiac biaŋne bahuc mu hâhâwicte mana mezac mi eniŋmuo otâfâc-ticne embiŋ juŋgopieŋ muŋarezo.
Ŋic jaŋere dâŋ
7 Ŋic ŋoŋere iŋuc jaha mupe” ŋokac e tâpirine wahakacte ŋonâŋfâc-ŋeŋic wiac mana manahuc ejarenšepieŋ. Erâ juju sanaŋte biŋe mâmâc qajarekicnere sâsec-jopahuc junšepieŋ. Eme nunumu-ŋeŋiczi ququŋke tâmiric qâfâsâerâ fezejec.
Dâŋ wirec-nâŋec
8 Erâ qâhâckehuc mupe” ŋoŋe mâmâc sasawa maŋ mocjaha erâ miriŋhec junšepieŋ, ehuc âgofâc-ŋeŋic maŋjauŋ ejarehuc wama ruaine â maŋhuhuŋ junšepieŋ.
9 Wiac sâqocne eŋarepie okacne sâqocne jaha mi ejarenšepieŋ, sosopec dâŋ ŋazapie okacne sosopec dâŋ jaha mi jazanšepieŋ, aricne, ŋoŋe jambuŋ hotâckeniŋte hefârec-ŋopakicnere jaŋe wâc jambuŋdâŋ jazanšepieŋ.
10 “Moc e jujure aŋackekac
â dameŋ biaŋ bâfuazo ecnekac,
e nameŋ-ticne soŋaŋkeha sâqocne mi bazejec,
â micbipic-ticne qataracneme burecdâŋ mi ezejec.
11 Eme sâqocne râpeckerâ wiac biaŋne ezejec,
erâ wamao juhuc irec giene fotarierâ bazejec.
12 Wofuŋ e ŋic tiŋne jaŋerao šâŋe fihuc
mu wâwâsic-jeŋicte hazec râeekac,
sâqocne bapa jaŋe ine Wofuŋzi hone qikiŋ ejareekac.”
Fific guguriŋte dâŋ
13 Ŋoŋe wiac biaŋnere henširiŋnehuc juhapie mozi wemo wiac eŋareocmu?
14 Me juju bapa tiŋnere erâ fific guguriŋ faio feniŋmu, ine manapie bubiaŋnehec ezejec. Ʒika hâhâwic eŋarepie ɋarac ɋarac mi qanšepieŋ â hâbi gogoroŋ mi enšepieŋ.
15 Maŋŋeŋic ba emasaŋ epie Kristo e tiri Wofuŋ juŋarezejec. Erâ maŋzi wiac worickehuc jueŋgopieŋ irec mu indiŋ eŋarepie afeckerâ fuŋne mutaniŋkenšepieŋ.
16 Erâ dâŋ i urucko â acmeruŋ ehuc, maŋŋeŋiczi mumu hehec mi eŋareha munšepieŋ. Iŋuc epie, Kristohec juhuc wiac ebac eeŋgopieŋ irec qoric-ŋopaeŋgopieŋ, ŋic i jaŋe burec-jeŋicte fuŋne taniŋkeme mimienšepieŋ.
17 Ŋoŋe wiac biaŋne ehuc juhapie Anutuzi maname sâckeha šika kâpâcwâru eŋareniŋmu irec manape fekac, â bahac bâfuapie eŋareniŋmu ine manape wahakac.
18 Kristo e iŋuc jaha tiŋnezi sâqocnere erâ arec moc hâmowec, e tiŋnezi hehesicne ŋoŋere erâ iŋuc ewec, Anuturao râec-ŋopaocte. E sahachec juwecte qapie hâmowec, â Mârohec juwecte ɋârewec.
Noa juhame jumbiŋ Jaŋere dâŋ
19 Mârohec wâc juhuc qâqâtâc kâpâcwâruo fombiŋ jaŋerao rarâ miti jazawec.
20 Jaŋe mârâc jaha Noa e woke bahuc juhame Anutuzi maŋuruc-ticnere erâ woŋec-jeŋic juipiehame dâŋticne qâsuambiŋ. Eme ŋic ŋokac jahec mac, 8 sawa, jaŋe wokeo fepie opâzi akic-jopame Jumbiŋ.
21 Eme ŋifecne ši opâzi wâc Miti Opâo bâpiaŋ-ŋopaekac. Miti Opâ e sahac wânâŋ mi šureekac, e Anutu hefâreme ware maŋŋeŋic šureme mumu hehec mocwâc mi eŋareekac” wiac i Jesu Kristozi hâmockonec ɋârehuc bâfuawec.
22 E jahacne sambâŋko Anutu fârenao fewec jukac” ira juhame aŋelo fekicne jaŋe ere wahamicnao jueŋgopieŋ.