27
1 Go tomâckore manasuhuc sahac fefe mi ezemec. Tomâcko wiac iŋuc me iŋuc fuaocmu i go mi manaekic.
2 Go gahac sahacge mi mumbiaŋkezemec, ŋic gâcne jaŋe mumbiaŋgupie sâckeocmu.
3 Qânâ i wiac ŋemâcne â moŋgeŋ i wâc wiac ŋemâcne jaha, erâ sifu ŋic mutucne moczi maŋbâiŋ enâreocmu i jahere sâc sirickerâ mocwâc ŋemâcne jâmbâŋ eocmu.
4 Aaric i wiac gâgâpâcne â sisipiric‐ticnehec, mamanauŋzi ine irec sâc jâururâ mocwâc mamakâcne jâmbâŋ ekac.
5 Hofao mu bâtiŋ ee izi wiac biaŋne, â maŋjauŋ aputacne izi ine wiac fâri tâmiric.
6 Âgogezi bâʒâicgume manatec mi sâqorezejec, â râsigezi hâpo qâqâic egareme ine rucge bazemec.
7 Ŋic moc e nânâ wiac gâcne nâ gapec erâ baŋacte maname aŋacmâc eocmu, â moc e ine nânâre hâmo sâqorehuc wiac hâtânere wâc maname aŋacne eha nâocmu.
8 Ŋic moc e fic hae‐ticne beherâ kosa juocmu e wipe jaŋe sareŋ‐jeŋic beherâ sawao rac warec ehuc jueŋgopieŋ irec sâc eocmu.
9 Wokemaŋ âsu â huc âsu izi bubiaŋ bâfua‐nâreekac, â wiac ʒârâ hâriŋneheczi ine busâqoc bâfua‐nâreekac.
10 Go gahacne âgofâc me mamacgere âgofâc jaŋere mi nikecguzejec. Go ʒârâ hâriŋ faio juhuc hahac ɋafâcge jaŋe baficguniŋte mi numu‐jarezemec; jaŋe ʒoricko juhapie âgoge moczi bembeŋko juhuc baficgume biaŋkeocmu.
11 O motec‐mae, go maŋɋârâŋhec jutec bunane biaŋkezejec, ehame nore dâŋ mueŋgopieŋ jaŋe okacne sâcne bâtikie‐jarepemu.
12 Ŋic maŋɋârâŋhec jaŋe sisipiriczi maic‐jopame hone tarahuc kizueŋgopieŋ; â ŋic maŋɋârâŋ tâmiric jaŋe ine hone‐bipiehuc rarâ sipirickeeŋgopieŋ.
13 Ŋic moczi mutuc erâ ŋic âgo‐ticnere tofa bazuocte mupaŋkeocmuo ine ŋaqi qoruc wiac‐ticne hotâ jâoc rorâ râepene foha mumupaŋ‐ticnere fârine bâfuazejec.
14 Go furi uupicte hahaŋne bahuc âgoge wiracnerâ furi biaŋ âzâcnetec maname sâwecnukac tinac eocmu.
15 Ŋokac râŋgeŋnere dâŋ i hoe micpiic furicte erâ hehuc domaha hae ŋafeekac irec sâc ehuc tatakic bâfua‐nâreekac.
16 Manakic, ŋic moc e mâŋâŋ bâniniŋkeocmu me mefâre‐ticnezi wokemaŋ opâne basanaŋkeocmu e ŋokac iŋucnere dâŋ wâc sâcne bâniniŋkeocmu.
17 Wiac aeŋzi bakicne i aeŋzia ʒâmueŋgopeneŋ irec sâc jaha nâŋâc ŋic âgofâc‐nâŋec jaŋeraonec mamana roeŋgopeneŋ.
18 Ŋic moc e nemuja jâc hone soŋaŋ ecneocmuzi fârine fuame sâcne nâocmu, â kiŋaŋ qaqa moc e bomboŋ‐ticne hone bafic ecneocmu e irec furine roocmu.
19 Nâŋâc opâo fipene hume mumuc‐nâŋec jaha honeeŋgopeneŋ, iŋuc jaha maŋnâŋecko fipene hume fuŋne‐nâŋec hone taraeŋgopeneŋ.
20 Hâmoc haezi ŋic ʒuʒuhuc jaha rocjopaocte ecneekac, irec sâc jaha ŋic ʒâŋe‐nâŋeczi wiac ʒâŋe furu honeocte boc ecneekac.
21 Siliwa â gol i ʒocko rike esâic eeŋgopeneŋ, ŋicte fuŋne ine ʒâŋe biŋe‐ticnezi bataniŋkeekac.
22 Go ŋic mutuc matacne qâhâmozo qatecne mutuc‐ticnezi sifu mi omaeocmu.
23-24 Ŋicne ŋicne nâŋâc juju sanaŋ mi jueŋgopeneŋ, iŋuc jaha mafa mâriri i wâc fofo sanaŋ mi foekac, irec go lama bulimakaofâcge hone soŋaŋ biaŋne ejarezemec.
25 Ehuc sapao nânâ wiac‐jeŋic saratec fuame râec‐jopatec nâhuc fua sawec enʒepieŋ.
26 Go iŋuc etec lama kanʒaŋnezi ŋaqi qoruc bâfua‐gareocmu, â noniŋfâcge gâcne jaŋe moneŋte râec‐jopatec moneŋ fuaocmu izi mâreŋ ɋâricne kitâcne‐gareocmu.
27 Ehame noniŋ gâcne jaŋere susuzi ine go gahacne â wiacfâcge erâ kiŋaŋ narufâcge ŋoŋere nânâ eocmu.