29
1 Go ŋic jaŋe qa bâtiŋ egarepie sâc râŋgeŋkecmuo ine dameŋ mocko qanʒaŋ banʒaŋgupie mocwâc mi jucmu.
2 Ŋic tiŋne jaŋe ŋic ŋokac guriŋ bajarehapie ʒeri bari eniŋmu, â ŋic sindaŋne jaŋe guriŋ bajarehapie ine ki busâqoc eniŋmu.
3 Go maŋɋârâŋte manatec wiac furi sâko eha mamacgezi gore maname fefene eocmu, â moc e sasec ŋokac jaŋerao qohotaocmuzi ine moneŋ mafa wiac‐ticne sipirickeocmu.
4 Ŋicwofuŋ moc e guriŋ bapa gie tiŋne baocmuzi mâreŋ‐ticne bafahareocmu, â moc e moneŋte sawa manasuhuc gie baocmuzi ine mâreŋ‐ticne ima baocmu.
5 Ŋic moc e âgofâcne wokemaŋ dâŋ ejareocmuzi e jahacne bitiŋ baocmu.
6 Ŋic hehesicne jaŋe jaŋacne hehesiczi bitiŋ ejareha raʒipie kicjopaekac, â ŋic siocmâc jaŋe ine bubiaŋ faio rambaŋ jueŋgopieŋ.
7 Ŋic tiŋne jaŋe qarâ suriŋne jaŋere dâŋ dopeckeeŋgopieŋ, â ŋic sindaŋne jaŋe ine jaŋere mana mezac moc mi eeŋgopieŋ.
8 Ŋic pepec penaroŋ jaŋe hae moc irec rune maŋbâiŋ ejareniŋmu, â ŋic maŋɋârâŋhec jaŋe ine buuruc qajareniŋmu.
9 Ŋic maŋɋârâŋheczi ŋic mutucne moc dâŋgieo râeocmuo ine ŋic mutucne eki mâc gâwiecneocmu, erâ wâc aaric manacnehuc dâŋ sâqocne mucneocmu.
10 Ŋic socnânâ jaŋe ŋic sioc tâmiric qaisockeeŋgopieŋ, â ŋic tiŋne jaŋe ine juju‐ticne ŋezickeeŋgopieŋ.
11 Ŋic mutuc matacne jaŋe kimbeŋ aaric‐jeŋic mi bawahahuc tomao bataniŋkeeŋgopieŋ, â ŋic maŋɋârâŋhec jaŋe ine wiac iŋucne hetapaickehuc uruerâ jueŋgopieŋ.
12 Guriŋ bapa ŋic moczi burecdâŋte hazec râeocmuo ine gieŋicfâc‐ticne fekicne jaŋe burecŋic jaha efâreniŋmu.
13 Ŋic hapetac mecne â kisâfâc‐jeŋic mecne jaŋe mâmâc Wofuŋzia ʒâŋe hândâŋ râe‐jarewec.
14 Ŋicwofuŋ moc e ŋic waha qaqane jaŋe dopec‐jopaocmuo ine guriŋ bapa gie‐ticne i dameŋ ʒora barahuc juocmu.
15 Naru motec jaŋerao mumutiŋ â bâbâtiŋ gie bapene biaŋkeocmu, me jaŋe jaŋacne maŋte wiac ebac eniŋmuo ine neŋgocfâc‐jeŋic mimi qaqa ejareniŋmu.
16 Ŋic sindaŋne jaŋe guriŋ bapa gie bahuc juhapie wiac sâqocnezi soka ŋedâmârec eocmu, â ŋic tiŋne jaŋe ŋic sindaŋne waha jopame honec‐joparâ ʒeri eniŋmu.
17 Go ŋokâge qa bâtiŋ ecnetec neneŋ bâneneŋ mi egareha ere bubiaŋ manahuc jucmu.
18 Ŋicguru moc jaŋe Anutu guriŋ bapa‐ticnere takic‐jopame sâcmutâc tâmiric kosa juniŋmu, â ŋicguru moc jaŋe Anuture sâcmutâc dâŋ mana rereŋ eniŋmu jaŋere manapene ʒerine eocmu.
19 Go kiŋaŋ qaqa moc dâŋ sawa âzâcnehuc sâcne mi bâtiŋnecmu, ine dâŋge hazeczi sawa manahuc mana rereŋ mi eocmu.
20 Ŋic moc e dâŋticne manasu biric mi ehâmohuc kosa muocmu e ŋic mutuc matacne jaŋere waha micne erâ juocmu.
21 Kiŋaŋ qaqa moc e ɋieonecteaŋ wiac irec me irec mume râcne tahac enaŋmuo ine juku sokarâ wiac‐nâŋec sasawa ro rauc eocte muocmu.
22 Ŋic maŋʒochec jaŋe mu qaqatarac erâ dâŋgie sâko bâfuaeŋgopieŋ.
23 Ŋic pepec penaroŋhec jaŋe waha jopaocmu, â ŋic maŋhuhuŋ jueŋgopieŋ jaŋere manapene fefene eocmu.
24 Hata kecʒiŋuc fokacte fiuc roro ŋic ere babaficzi juju‐ticne qaisockeekac: E dâŋgieo domahuc dâŋ fârine mufuame bâtiŋneniŋmu, â dâŋ fârine hesoŋkeocmuo ine Anutuzi sâweckeocmu.
25 Ŋic jaŋere hâhâwic bajupene bitiŋzi kicnâpoocmu tinac eocmu, â Wofuŋtao roweckehuc junaŋmuo ine eki huec sanaŋ enâreocmu.
26 Ŋic bocjaha jaŋe ŋic fekicnezi mana‐jareme biaŋkeocte maŋjeŋic domaekac, erâ Wofuŋzi sawa ine dâŋnâŋec mutarame sâckeocmu.
27 Ŋic tiŋne jaŋe ŋic sindaŋne qaisoc‐jopaeŋgopieŋ, â ŋic sindaŋne jaŋe ine ŋic tiŋne qaisoc‐jopaeŋgopieŋ.