7
Boe sau ŋokac jaŋe mâsi fuŋne fuŋne eeŋgopieŋ
1 Motec‐mae, go dâŋ gazaekopac i manasuhuc juzemec, ehuc sâcmutâc dâŋnanere moc mi nikecguzejec.
2 Go sâcmutâc dâŋnane mana rereŋ erâ juhâc qâhâmocmu. Go ʒâŋe hândâŋge soŋaŋkeekic irec sâc jaha mu qaqazuc dâŋnane soŋaŋkezemec.
3 No dâŋ gaza qazuc eekopac i dameŋ sâc paŋʒâic jaha bajuzemec, ehuc maŋgao qâreŋketec fozejec.
4 Go maŋɋârâŋte manatec seŋgere sâc ezejec, â maŋzi wiac mamana tara irec manatec âgo fuŋfuŋge ezejec.
5 Jahe hâcne ŋic gâcne jaŋere ŋonâŋfâc jaŋerao mecne, â esâicguhuc wokemaŋ dâŋ egareeŋgopieŋ ŋokac i jaŋerao mâmâc razicte aka hegareekopirec.
6 No dameŋ mocko ficnaneo ŋehuc qâqâtâc kataŋko ʒâŋe fipe rawec.
7 Eme ŋicmotec socɋâri mamanasu tâmiric jaŋere ŋondeŋko motec mutuc matacne moc jume honepo.
8 E hata sâko fotâcnerâ hata ŋeŋehasicko boe sau ŋokac moc juwec irapec rarâ ere ficko fisiwec.
9 Erâ i hae ŋafeme dapâc foha iŋuc ewec.
10 Ehame ŋokac e mi fickonec waharâ bâfuazejec i! Ŋokac e hata ŋokac jaŋere rurufa â eri qoqonaŋ wiac iŋucne rojuwec, ehuc eesâic gie baocte mâsi fuŋne fuŋne ewec.
11 E mimi tâmiric hata sâkoo sisi hâhâŋ faio ifi aifi jaha rac warec ewec.
12 Ehuc doma qatara rarâ hata ŋeŋehasicko domawec, izi irecnec ra hata sâkoo domawec, izi rarâ wiac nareŋ gareŋ eere tomao domawec.
13 Iŋuc ehuc motec mutucne e honerâ izia hâpo mumuduc ecnerâ sasec ʒâŋe fihuc dâŋ kecʒiŋuc âzâcnewec:
14 “No miŋecgac qowi bâzi rikepacte qowi tiwâne fonarekac.
15 Irec no fickonec waharâ gore ʒâŋe fihuc juku bâfuacgukopac hâcne.
16 Manakic, no Aigita mâreŋkonec fofo qoruc erinehec i biac fofo‐naneo rumackepac.
17 Ehuc siŋsiŋ saŋkarac â ʒineŋ sâfânâŋ wiac âsu biaŋ i wâc biac râe‐fârepac.
18 Irec go biac waretec waha hâhâpoc erâ fohuc ʒeri bubiaŋ manahuc fohapere hae furezejec.
19 Ŋowe‐nanezi ʒira mi jukac, e ʒoricko rawec.
20 Ehuc moneŋ bocjaha amecke rawec, irec juku Sonda 2 tarame risieocmu.”
21 Ŋokac e iŋuc muhuc motec esâickeme wokemaŋ dâŋticnere dockewec.
22 Eme izia bulimakao qa hezuc eniŋte baraeŋgopieŋ, me qowi moczi bitiŋ mi hone tarahuc ututuŋ jaha raʒime kime foha
23 ŋic jaŋe fisirâ tepe moteczi murupie hâmoekac, irec sâc ehuc ŋokac bâjâpeme ficticnao fepic. E wipezi sisipiric fokac i mi mana tarahuc uficko jowaekac irec sâc jaha ehuc juju‐ticne omaeocmu i mi mana tarawec.
24 Irec motec‐mae, go hazec râe‐hâmohuc micdâŋ‐nane manazemec.
25 Go ŋokac iŋucnezi maŋ bâsifuc egareme hata‐ticne moc mi bâjâpezemec.
26-27 Ŋokac e ŋic bocjaha sipiric‐jopawec, erâ ŋic guru sâko bâdoc‐jopame hâmo‐fârembiŋ. Irec go ere ficko fecmuo ine hâmoc haere hatao racmu. Izi hâcne hâmoc haere hata bembeŋne ekac.