9
Maŋɋârâŋhec juju â mutuc matacne juju irec fuŋne
1 Maŋɋârâŋ e ficticne baocte wâtuŋ 7 âkendâŋne‐fârewec.
2 Erâ tiwâ bâzi bâmockeocte qowi moc qa hezuc ewec â waiŋ opâ‐ticne i wiac âsu biaŋneheczi bâsifuckewec, erâ wâc tela kasoŋ wiac râe‐fârewec.
3 Ehuc kiŋaŋ narufâcne jaŋe haetoŋko domahuc dâŋ kecʒiŋuc musokahuc muniŋte sorec‐jopawec:
4 “Ŋic ŋokac mamana tâmiric ŋoŋe wefuniŋ!” Â ŋic mutuc matacne jaŋe wâc ʒiŋuc jazaekac:
5 “Ŋoŋe wefurâ nânâ‐nane â waiŋ opâ wiac âsu biaŋneheczi bâsifuckepac i nâ bac eniŋ.
6 Ŋoŋe ŋic ŋokac mamana tâmiric jaŋe behec‐joparâ maŋzi wiac mamana tara irec hata bâjâpehuc juhâc qâhâmonʒepieŋ.”
7 Go ŋic mu âke sisicne moc mu bâtiŋ ecnecmuo ine mimi qaqa faigao feocmu. Me ŋic hehesicne moc dâŋ mucnecmuo ine eki râsi egarehuc bâʒâicguocmu.
8 Irec go ŋic mu âke sisicne mu bâtiŋ moc mi ecnezemec, sifu ecnecmuo ine qaisocguocmu. Ŋic maŋɋârâŋhec dâŋ mucnecmuo ine âgo egareocmu.
9 Go ŋic maŋɋârâŋhec dâŋ i me i moc âzâcnetec maŋɋârâŋ‐ticne soka sanaŋ eocmu. Me ŋic tiŋne moc dâŋ i me i âzâcne qazuc ecmuo ine mamana‐ticne soka ŋedâmârec eocmu.
10 Wofuŋ araŋ babacne izi maŋɋârâŋte hata fufuŋkene ekac. Go Tiri rune mana ʒakiehuc maŋzi mamana tara bâfuacmu.
11 Maŋɋârâŋzi jarage bafehuc jujuge bâʒoraocmu.
12 Manakic, go maŋɋârâŋhec jucmuo ine irec fârine biaŋne fua‐gareocmu, me maŋɋârâŋ râpecketec irec okacne ʒâic busâqoc fua‐gareocmu.
13 Wiac moc ʒâŋene mutuc matac e ŋokac mamana tâmiriczi mimi tâmiric jaha dâŋmarac sâko eekac ere sâc.
14 E ficticnere motâcko me haetoŋko ŋeŋerâ juekac.
15 Ehuc ŋic ŋokac hata‐jeŋic sâc rac warec eeŋgopieŋ jaŋe dâŋ ʒiŋuc muhuc wira hefârec ejareekac:
16 “Ŋic ŋokac mamana tâmiric, ŋoŋe wefuniŋ!” Â ŋic mutucne jaŋe ʒiŋuc jazaekac:
17 “Opâ fiuc rokicne i nâpie aŋac ʒizine eekac, â nânâ poroŋ fiuc rokicne i wâc nâpie aŋac baŋacne jâmbâŋ eekac.”
18 Ŋic ŋokac eatuc‐jopaekac jaŋe, ira rarâ hâmonaŋmu i mi mana taraeŋgopieŋ, ehuc mârâc ira rambiŋ jaŋe biac hâmoc haeo humbiŋ, i wâc kâuc baeŋgopieŋ.