115
Anutu jujune e mocjaha sâsezo
1 Nâŋe mâcne, Wofuŋ, nâŋe mâcne,
gahacne ʒâŋe ine eri qaraweŋ bâfuacnec,
aki anonocge â jauŋ fârigere erâ.
2 Ŋicne ŋicne jaŋe wemocte ʒiŋuc muniŋmu:
“Anutu‐jeŋic weni?”
3 Anutu‐nâŋec e sambâŋko jukac,
ehuc wiac mana biaŋkeekac sâc bâfuaekac.
4 Jaŋere nemuɋâŋ ine siliwa â gol,
ŋicmezi ba akic ekicne.
5 Mic fojareha dâŋ mi mueŋgopieŋ;
ʒâŋe fojareha wiac mi honeeŋgopieŋ.
6 Hazec fojareha sifu dâŋ mi manaeŋgopieŋ;
sâke‐jeŋic fokac, â âsu ine mi manaeŋgopieŋ.
7 Me fojareha wiac ba bâuac mi eeŋgopieŋ;
jaŋe kike‐jeŋichec, hata ine mi jueŋgopieŋ;
erâ marac‐jeŋiczi dâŋfânâŋ mi eeŋgopieŋ.
8 Ɋâŋ bâfuaeŋgopieŋ jaŋe wâc ɋâŋ iŋucne tinac,
erâ ɋâŋte mamanac jueŋgopieŋ jaŋe ɋâŋte sâc jaha.
9 O Israe, Wofuŋtao roweckec!
Eki babafic‐ŋeŋic â maro‐ŋeŋic jukac.
10 O Aroŋte kikefuŋ, Wofuŋtao roweckeniŋ!
Eki babafic‐ŋeŋic â maro‐ŋeŋic jukac.
11 Wofuŋ araŋ bacneeŋgopieŋ, ŋoŋe Wofuŋtao roweckeniŋ!
Eki babafic‐ŋeŋic â maro‐ŋeŋic jukac.
12 Wofuŋzi manasuc‐nâpohuc juwec,
eki jambuŋ‐nâpoocmu,
eki Israe kikefuŋ jambuŋkeocmu,
eki Aroŋ kikefuŋ jambuŋkeocmu.
13 E Wofuŋ araŋ bacneeŋgopieŋ jaŋe jambuŋ‐jopaocmu,
piticne mecne kâcɋene mecne jambuŋ‐jopaocmu.
14 Wofuŋ e basawec‐ŋopazejec, ŋoŋe â ɋâricfâc‐ŋeŋic.
15 Wofuŋ sambâŋ â mâreŋ bâfuac‐jofawec eki jambuŋ‐ŋopazejec.
16 Sambâŋ i Wofuŋte sambâŋ,
mâreŋ ine ŋic nâŋâc nârewec.
17 Hâmokicne jaŋe Wofuŋ mi mumbiaŋkeeŋgopieŋ,
niniŋ siarereŋ haeo raeŋgopieŋ jaŋe mâcne,
18 nâŋâc ine Wofuŋ muteŋkenʒepeneŋ,
ʒiŋuczia fuŋkerâ dameŋ tâmiric erahuc junʒepeneŋ.
Wofuŋ mumbiaŋkeniŋ!