118
Râsi sanaŋke‐jarerâ mumuteŋ gae hekicne
1 Wofuŋ daŋge âzâcneniŋ, e uruc jauŋ‐ticnehec;
oc, aki anonoc‐ticne fofo sanaŋ fokac.
2 Eme Israezi muzejec:
“Oc, aki anonoc‐ticne fofo sanaŋ fokac.”
3 Eme Aroŋte kikefuŋzi muzejec:
“Oc, aki anonoc‐ticne fofo sanaŋ fokac.”
4 Eme Wofuŋ araŋ bacneeŋgopieŋ jaŋe munʒepieŋ:
“Oc, aki anonoc‐ticne fofo sanaŋ fokac.”
5 Ʒâic busâqoc faio juhuc Wofuŋ wâsickepo,
eme Wofuŋzi mana‐narerâ rambaŋko râecnuwec.
6 Wofuŋzi no siŋnukacte mi hâwicnukac,
ŋic jaŋe wemo enareniŋmu?
7 Wofuŋzi no baficnuocte siŋnukac,
irec no sanaŋkehuc râsifâc‐nane saoreŋ qajarepemu.
8 Wofuŋte dapeŋko sosoŋke izi fekac,
ehame ŋicko rorowecke izi wahakac.
9 Wofuŋte dapeŋko sosoŋke izi fekac,
ehame ŋicbomboŋko rorowecke izi wahakac.
10 Ŋicne ŋicne jaŋe ʒeŋgoma somâcnumbiŋ,
eme Wofuŋte ʒâŋeo qanʒaŋ‐jopapo.
11 Jaŋe orâŋnuhuc somâcnumbiŋ,
eme Wofuŋte ʒâŋeo qanʒaŋ‐jopapo.
12 Jaŋe baŋac neŋgoc iŋucne bârârâŋnumbiŋ,
hârijâc rehacnezi bâruŋkeekac iŋuc enarembiŋ,
eme Wofuŋte ʒâŋeo qanʒaŋ‐jopapo.
13 Hâhâwicne decnukupie farazo epo,
eme Wofuŋzi ine baficnuwec.
14 Wofuŋ e tâpiri‐nane â mumuteŋ‐nane;
e sisipirickonec babatara‐nane ewec.
15 A, tiŋne guru jaŋere qoruc bozeo
saoreŋ â ʒeri gae fuakac:
“Wofuŋ mefârenezi gie ɋicwânʒâŋ bakac,
16 Wofuŋ mefârenezi faharekac,
Wofuŋ mefârenezi gie ɋicwânʒâŋ bakac.”
17 No mi hâmopemu, ɋâricne jupemu,
ehuc Wofuŋ wiac bapa‐ticne mutaniŋkepemu.
18 Wofuŋ e ʒocnehec bâtiŋnuwec,
erâ hâmocte meo ine mi râecnuwec.
19 Taha ufuŋte motâc ronareniŋ,
eme no ira raʒirâ Wofuŋ daŋge âzâcnepe.
20 Wofuŋte sacmotâc ʒine hâcne,
tiŋne jaŋe ira raʒiniŋmu.
21 Go micnaneo romeŋte daŋge gazakopac,
micnaneo rorâ sisipirickonec bataracnumeŋ.
22 Ficbapa ŋic jaŋe wâtuŋ surehuc behembiŋ,
wâtuŋ izi mi jâmâ wâtuŋ ezejec i!
23 Wiac i Wofuŋte micte iŋuc fuame,
ŋiczi honepene mâsi furune ekac.
24 Dameŋ ʒi hâcne Wofuŋzi bâfuawec,
irec maŋnao ʒeri ehuc bubiaŋ mananaŋ.
25 O Wofuŋ, go bafic‐nâpoc!
O Wofuŋ, fâri biaŋ fua‐nârezejec!
26 Wofuŋte micte warekac e mumbiaŋkenaŋ;
Wofuŋte fickoneczi jambuŋ‐ŋopaŋgopeneŋ.
27 Wofuŋ e Anutu, eki tatamac nârewec.
Ʒunʒuŋko reso bândeŋne rakupie alata ʒuŋenao fisizejec.
28 Go Anutu‐nane, go hâcne daŋge gazape.
Go Anutu‐nane, go hâcne muafecgupe.
29 Wofuŋ daŋge âzâcneniŋ, e uruc jauŋ‐ticnehec;
oc, aki anonoc‐ticne fofo sanaŋ fokac.