14
Wofuŋzi mâreŋŋic jaŋere sindaŋ honeekac
(Mi Mâ 53:1–6)
1 Mutucne jaŋe maŋjeŋiczi mueŋgopieŋ:
“Anutu moc mi jukac.”
Jaŋe repicne, eebapa‐jeŋic mamakâcne,
moczi moc wiac biaŋne mi eekac.
2 Wofuŋ e sambâŋkonec fime wahaekac,
ehuc mâreŋŋic ŋondeŋ‐jeŋicko mamanahec moc juhuc,
Anutu wira basac ecneeŋgopieŋ me mâcne i honeekac.
3 Jaŋe qâsoriekicne sasawa,
ʒeŋgoma repirembiŋ;
moczi moc wiac biaŋne mi eekac,
arictac jâmbâŋ.
4 Sâqocne bapa, ŋicfâc‐nane ki sipiric ejareeŋgopieŋ,
jaŋe qicqucne jufâreŋgopieŋ me?
Jaŋe Wofuŋ noraonec nânâ nâipiehuc,
sifu no mi wâsicnueŋgopieŋ.
5 Dameŋ mocko bipic tatara embiŋ,
ine Anutuzi tiŋne guru qâtec‐jopawecko.
6 Ŋoŋe ŋic qarâ suriŋne hata‐ticne hesifuckezo muhapie,
eki Wofuŋte dapeŋko soŋkeme qurutuaniŋmu.
7 Zioŋkonec Israerao bâbâpiaŋ fuazac me!
Wofuŋzi ŋicfâcne jaŋere juju hata herisieocmuo
ine Jakobozi ʒeri eocmu,
â Israezi bubiaŋ manaocmu.