148
Wofuŋte meqâreŋfâc sasawazi e muteŋkeniŋ
1 Wofuŋ muteŋkeniŋ!
Sambâŋkonec Wofuŋ muteŋkeniŋ,
faic irec, ŋoŋe muteŋkeniŋ.
2 Aŋelofâcne sasawa, ŋoŋe muteŋkeniŋ,
momori gurufâcne, ŋoŋe muteŋkeniŋ.
3 Mosa ʒoaŋ, ŋohe muteŋkeniŋ,
bâpiŋ tamaeŋgopieŋ sasawa, ŋoŋe muteŋkeniŋ.
4 Sambâŋte sambâŋ, go muteŋkec,
sawao opâ fokic, go muteŋkec.
5 Jaŋe Wofuŋte ʒâŋe muteŋkeniŋ,
eki hâcne mume fuambiŋ.
6 Eki hâcne ŋeŋe sanaŋ ŋeniŋte râec‐jopawec;
eki aka hejarewec i mi huhuckene.
7 Mâreŋkonec ŋoŋe Wofuŋ muteŋkeniŋ:
Hâwecte oâ sâko â hâwec ʒâkâŋ sasawa ŋoŋe;
8 ʒoc â aisi hândâŋ, sinou â hâweŋ,
erâ mâŋâŋ micticne reŋkeekic go;
9 tiki â mâreŋ facne sasawa,
jâc hândâŋnehec â jâmâzâc sasawa;
10 qowi sasawa, kâteo â haeo,
homa gisic â wipe fakec‐ŋeŋichec;
11 mâreŋte ŋicwofuŋ â ŋic gurune gurune,
ŋicbomboŋ â mâreŋte mumutara ŋic sasawa;
12 ŋicʒeŋoŋ â ŋokac ʒeŋoŋ,
ŋic ŋokac qizec â naru motec!
13 Jaŋe ʒeŋgoma Wofuŋte ʒâŋe muteŋkeniŋ;
ere ʒâŋe mocjaha fekicne sâko,
eri tatamac‐ticnezi mâreŋ â sambâŋ qâhuckekac.
14 E kikefuŋfâc‐ticne ʒâŋe biŋe‐jeŋic bafaharewec;
izi mitiŋicfâcne ʒeri mumuteŋ bâfua‐jarekac,
Israe ŋic bufuŋfâcne jaŋe hâcne.
Wofuŋ muteŋkeniŋ!