36
Sindaŋŋic jaŋere fuŋne â Anuture aki anonoc
1 Sindaŋŋic e maŋfâhâŋ‐ticnao sâqocnezi qafeŋdâŋ râehuc juekac;
ʒâŋe mai‐ticnao Anuture hâhâwic mi fokac.
2 E jahacne maŋ eatuckehuc muekac,
“Hehesic‐nane i mi fua taniŋkeocmu,
â irec mamana sâqoc mi fuaocmu.”
3 Micdâŋ‐ticne i mumusifuc â eeatuc;
mana tarahuc wiac biaŋne ee i behewec.
4 Fofo‐ticnao wiac repicne manasu biric eekac,
bibiaŋte hata mi âteekac â sâqocne mi qikiŋneekac.
5 O Wofuŋ, aki anonocgezi feku sambâŋ heuakac,
erâ‐eesanaŋgezi feku karoracko fisikac.
6 Tiŋnegezi Anuture tiki iŋucne qiŋ herâ ŋekac,
mumutiŋge hâwec ʒâkâŋ sâko iŋucne,
Wofuŋ, go ŋic â qowi bafic‐nâpoekic.
7 Anutu gore aki anonoc furi sâko‐ticne mo iŋucne!
Mâreŋŋic jaŋe fakec rurumaŋgao soŋkeeŋgopieŋ;
8 ehuc ficgaonec mâriri sâko nâ bac eeŋgopieŋ,
â aŋacgere opâ fifisine gumec‐jopaekic.
9 Gorao hâcne jujure opâ ʒâŋe fokac,
â gore tatamacko tatamac honeeŋgopeneŋ.
10 Go manacgueŋgopieŋ jaŋe aki anonocge ʒuhucke‐jarehuc juzemec,
â maŋsioc tâmiric jaŋe bâbâpiaŋge tahac‐jopazemec.
11 Ŋic penaroŋhec ere kikezi mi âtecnuzejec,
â sindaŋŋicte mezi mi jâpecnuzejec.
12 Dameŋ mocko sâqocne bapa jaŋe raŋe foraniŋmu,
herândiŋ‐jopakicne, sâcne mocwâc mi fahareniŋmu.