48
Zioŋ tikire mumuteŋ gae
1 Wofuŋ e kâcɋene, e Anutu‐nâŋecte hae sâkoo
samarierâ mumbiaŋkenʒepeneŋ.
2 Tiri tiki‐ticne hawari biaŋ fejec ŋekac,
mâreŋ sâc ŋic jaŋe hone aŋac eeŋgopieŋ.
Zioŋ tiki faic mâreŋkopec ŋekac, Wofuŋ Sâkore hae.
3 Erific‐ticne Anutuzi aimuŋ sabeckeekac,
i hone manac ehuc jukicne.
4 Manaŋgopieŋ, ŋicwofuŋ jaŋe hehenusuc erâ
mâmâc quruŋ herâ fisimbiŋ.
5 Izi honerâ warecke sâqorembiŋ;
erâ bipic tara‐jareme wisembiŋ.
6 Mâreŋ ira ɋarac ɋarac qambiŋ hâcne,
ŋokac moczi motec roocte gozi kiekac iŋuc embiŋ.
7 Ʒoaŋ wewefuonec mâŋâŋ mutec fisirâ
Tarasisi haeonec woke qanʒaŋ‐jopawec.
8 Biŋene manambeŋ irec sâc jaha ʒâŋezi honembeŋ,
Tâpiri Ɋuŋɋasaŋ Wofuŋte haeo,
Anutu‐nâŋecte hae sâkoo hâcne;
hae i Anutuzi ŋeŋe sanaŋ ŋeocte mucnewec.
9 O Anutu, nâŋe taha ufuŋgere maŋnao
aki anonocgere manasumbeŋ.
10 O Anutu, ʒâŋe biŋegezi mâreŋ qaŋeŋnao rawecte
mumumbiaŋgezi iŋuc jaha raekac;
mefâregao bâbâpiaŋ fusucmawec fokac.
11 Zioŋ tiki e irec bubiaŋ manakac;
Juda otâfâcne jaŋe mumutiŋgere erâ
ʒeri bari eeŋgopieŋ.
12 Zioŋ orâŋkehuc bârâreckenʒepieŋ,
ehuc rucbapa ficne ficne wosenʒepieŋ.
13 Qânâsac‐ticne hone qârâwiŋ enʒepieŋ,
ficsâko maŋne jufârenʒepieŋ,
ehuc ʒâhec fuaniŋmu jaŋe ʒiŋuc jazanʒepieŋ:
14 “Anutu, nâŋâcne Anutu, e jurâ juraʒihuc juocmu,
ehuc tatara tâmiric jowa qataŋ enâreocmu.”