55
Râsi repicne â âgo burecne moc jaŋere erâ mu wâwâsic fuakac
1 O Anutu, go nunumu‐nanere hazec râec,
â wâwâsic dâŋnane mi wisecnec.
2 Mana‐narehuc dâŋ okacne bârisie‐narec;
ʒârâ hâriŋ‐nanezi siricnukac.
3 Râsi owa‐jeŋicte â sindaŋŋic ʒika fânâŋ‐jeŋicte
maŋnane hâhâŋkekac.
Jaŋe ʒârâ ʒâpâ faio râecnuŋgopieŋ,
â aaric mana‐narehuc qaisocnuŋgopieŋ.
4 Maŋnanezi ʒâic serereŋ manakopac,
â hâmocte hâhâwiczi sipiricnukac.
5 Ɋarac ɋarac qahuc domakopac,
bipic‐nane tarame gâgâmârâkopac.
6 Ʒiŋuc mukopac: “Jei, hapâ iŋucne fakechec ezapo!
Ine fururuc qahuc wiserâ raku biaŋnuzac.
7 Jei, no taicko jâmbâŋ razapo,
erâ mâreŋ tuhuo soŋkezapo.
8 No ʒocnehec raku sâsâoc moc bâfuarâ
hoe mâŋâŋ sâkore ira soŋkerâ ŋezapo.”
9 O Wofuŋ, biri‐jeŋic hetâtiehuc dâŋjeŋic bâsifuckec.
No hae sâkoo qaqac â rârâsi honekopac;
10 ŋafe ʒoaŋ sâc haesac râreckehuc domaŋgopieŋ,
â maŋnao eesifuc â kikisâ fokac.
11 Ŋondeŋnao sisipiric fua rakac,
â nareŋ gareŋ toma‐ticnao fific guguriŋ â eeatuc
i moc mi omaekac.
12 Mumusoriŋ i râsi moczi mi enarekac,
i sâcne desuezapo;
pepecne eenare i jabane moczi mi ekac,
i sâcne rârierâ soŋkezapo;
13 mâcne, i goki enarekic, âgo qomâ‐nanezi,
mâmâc juhuc hohonec eekopereczi;
14 qâqâtec juhuc dâŋ mumac qamanac ejuperec,
hombaŋko Anuture ufuŋko mâmâc fejuperec.
15 Hâmoczi ɋeŋfâfâc jaha rocjopazejec,
ɋâricnea hâmoc haeo utuckenʒepieŋ,
bipic tatara ejareha ʒâŋeruŋ‐jeŋicko hunʒepieŋ.
16 No ine Anutu wira wâwâsic ecnekopac;
eme Wofuŋzi sisipirickonec bataracnuocmu.
17 Owâcne mecne, furicte mecne, ʒoaŋko mecne,
huacbuc dâŋnane mu huse epemu,
eme eki dâŋmarac‐nane manaocmu.
18 Eki bataracnume wamao raʒipemu,
eme wiac enarezo murâ quŋkeniŋmu,
jaŋe ŋic bocjahazi wiac enareniŋte birickembiŋ hâcne.
19 Anutuzi mana‐narerâ bawahac‐jopaocmu,
e mumutara ŋeŋeo mârâc jaha fuŋkerâ ŋeweczi;
jaŋe maŋjeŋic mi bârisieŋgopieŋte,
â Anutu araŋ mi bacneeŋgopieŋte.
20 E qomâ‐nanezi âgofâcne jopaocte meticne bafaharewec,
â jaŋehec ʒâʒâfic‐ticne hetâcnewec.
21 E micbipic‐ticne fâsâcne wokemaŋ iŋucne,
ehame sifu ʒika maŋkeekac;
dâŋticne urucne, tokicte sâc,
izi sifu damu erâ âkec‐jopaekac.
22 Tagige Wofuŋ qârâriecnec, eki sâcne dopecguocmu;
e ŋic tiŋnezi biric boroc eocte moc mi manacneekac.
23 O Anutu, go tuŋjopatec sisipiricte nombâŋko huniŋmu,
soc nânâ â eeatuc ŋic,
juju‐jeŋic nâfocne sawa i wâc mi jutaraniŋmu.
No ine Anutu, gorao roweckekopac.