57
Wâwâsic â mumuteŋ
(Mi Mâ 108:1–5)
1 Buuruc enarec, o Anutu, go buuruc enarec,
no gore dapeŋko soŋkekopac.
No fakecgere rurumaŋko soŋkerâ ŋehape,
sisipiricte mâŋâŋzi fotâcnerâ razejec.
2 No Anutu, Femicne sâko, e wiracnekopac;
gie‐ticne norao bataraocmu, Anutu e hâcne.
3 E sambâŋkonec okacne bâtikie‐narehuc baficnuocmu,
imacnuŋgopieŋ jaŋe mimi bâfua‐jareocmu;
Anutu e aki anonoc â jauŋ fâri‐ticne soreocmu.
4 No laioŋ, ŋic kisucke nâc ejareeŋgopieŋ,
jaŋere ŋondeŋko fokopac;
micsiec‐jeŋic i damu â tepe,
nameŋ‐jeŋic ine sâqe mictara.
5 Anutu, go fahare sambâŋ qâhuckerâ fezemec,
eri tatamacgezi mâreŋ sâko mâreŋ sâckezejec.
6 Jaŋe kike‐nanere bitiŋ râepie maŋnane wahawec;
jaŋe hata‐naneo nombâŋ rombiŋ,
erâ jaŋac ʒâziŋkerâ humbiŋ.
7 O Anutu, maŋzi qiŋ herâ domakopac,
maŋzi qiŋ herâ domakopac, no gae hehuc musi bape.
8 Maŋ qâqâtâc‐nane, mana ɋâɋârec,
kulele â gita, mana ɋâɋârec,
no furic wiwickepe mana ɋâɋâreoc.
9 O Wofuŋ, no qâpuc jaŋere ŋondeŋko daŋge gazape,
no ŋicguru jaŋere ŋondeŋko mumbiaŋgupe.
10 Aki anonocgezi feku sambâŋ heuakac,
jauŋ fârigezi feku karoracko fisikac.
11 Anutu go fahare sambâŋ qâhuckerâ fezemec,
eri tatamacgezi mâreŋ sâko mâreŋ sâckezejec.