65
Anutu jambuŋ‐ticnere daŋge gae
1 Mumuteŋ i go egarezo, Anutu, Zioŋko;
mumupaŋte fârine go bâfua‐garezo.
2 Nunumu manaekicte gorao hâcne
mâreŋŋic sasawa fisieŋgopieŋ.
3 Bahac bâfua fekupene siric‐nâpoha
goki hâcne kiŋ behe‐nâreekic.
4 Go ŋic moc bâwosâerâ hefâretec,
fisi ufuŋgere hae ʒoŋao juocmu,
ere manapene ʒerine eocmu.
Ficgere mâriri nâ gapec enʒepeneŋ,
tiri ufuŋgere hâcne.
5 Go mâsi hâhâwicne bahuctecne,
nunumu‐nâŋec manarâ batarac‐nâpoekic,
bâbâpiaŋ‐nâŋecte Anutu go;
erâ mâreŋ â hâwec qaŋeŋnao juŋgopieŋ,
jaŋe go jaha woricgueŋgopieŋ.
6 Go tâpiri hetec hume tiki râec‐jopameŋ,
eme qiŋ herâ ŋeŋgopieŋ.
7 Go hâwec siri fânâŋ‐ticne,
â ŋicne ŋicne ojowa‐jeŋic,
bâmâteŋketec tiŋbenoŋ fuaekac.
8 Eme mâreŋ sâko mâreŋ mecqaŋeŋnao juŋgopieŋ,
jaŋe fuŋne qaqa mâsigere bipic tara‐jareekac;
go ʒoaŋ wewefu‐ticne â huhu‐ticne,
bubiaŋ afusecnetec kiwac qawac eekac.
9 Go mâreŋ iqickerâ bâgunuckeekic,
eme mâriri biaŋ fuaekac,
Anuture opâ i opâ ɋârâŋ.
Go mâreŋ bâmocke baʒawiec ekutec,
nânâ wiac fâri biaŋ fuaekac.
10 Go opâwâc‐ticnao râehuc tikine heɋâreekic,
hoe mutec heme mâreŋ urueekac,
eme jambuŋketec wiac fua‐hâmoekac.
11 Go qa roro dameŋ buafecgezi erickekomec,
hatage nânâ mâririhec sasawa.
12 Sopâc wâneŋne wâneŋne ira rame fusucmarâ juŋgopieŋ,
tikine tikine jaŋe kiwaeŋgopieŋ.
13 Noniŋ bulimakaozi hae mâreŋ foŋkeŋgopieŋ,
giene giene padi jacgoŋ bârârâŋnekac;
ʒeŋgoma ʒeri epie gae micʒonʒoŋ faharekac.