71
Ŋicqizec ekopacte mi behecnuzemec
1 O Wofuŋ, no gore dapeŋko soŋkekopac;
go mana‐naretec mimi faio moc mi fezepac.
2 Tiŋnegere sâcko asao rocnuhuc firuecnuc;
norao hazec râerâ bâpiaŋnuc.
3 Goki qânâuŋ enarehuc sabecnuc,
huec sanaŋ enarehuc ŋezicnuc,
go hâcne qânâ‐nane â huec‐nane.
4 O Anutu, go sindaŋŋic jaŋere meonec bataracnuc,
ŋic hehesicne â ʒâic bâbâfuare aŋac mamana jaŋere meonec.
5 O Wofuŋ, go hâcne woricgukopac,
no ɋieonecteaŋ Wofuŋ gore mamanac jupo.
6 Fuapoonecteaŋ gorao roweckehuc jupo,
goki hâcne neŋgoc bumaŋkonec baefucnumeŋ;
irec go jaha muteŋguhuc juekopac.
7 Ŋic bocjahazi nore manapie sowi tinac eekac;
ehame goki ine paŋnea sabecnuekic.
8 Gore mumuteŋzi micnaneo fusucmaekac,
ʒoaŋ ʒora muafecguhuc juekopac.
9 No ŋicqizec ehape mi mac suŋgiŋnuzemec,
tâpiri‐nane betaŋkeme mi behecnuzemec.
10 Râsifâc‐nane jaŋe nore dâŋ muŋgopeŋ,
hâmopemurâ ejarekac jaŋe muc manac eŋgopieŋ.
11 Ehuc muŋgopieŋ, “Anutuzi e behewec,
jâpe raku hâponiŋ me,
moczi moc mi ŋezickeocmu.”
12 O Anutu, go taicko mi junarec,
Anutu‐nane, go fâro barâ ware baficnuc.
13 Qoricnueŋgopieŋ jaŋe mimierâ omaenʒepieŋ;
no sisipiric fua‐nareocte mueŋgopieŋ,
jaŋere faio mimi qaqa â nifepupu fezejec.
14 No ine ʒuʒuhuc woricguhuc jupemu,
â ʒâŋe biŋege basawehuc jaha jupemu.
15 Micnanezi eebapage tiŋne irec binaŋ bazejec,
dameŋ sâc bâbâpiaŋ giege musokazejec;
irec ʒarezi mamana‐nane sirickekac.
16 Wofuŋ Anutu gore tâpirire biŋe bâroŋ bafisipemu;
gore tiŋne gie sawa muafeckepemu.
17 O Anutu, go ɋie‐naneonecteaŋ wiac qazu‐narehuc jumeŋ,
eme no mâsi bapage mutaniŋkehuc jaha juekopac.
18 Irec no ŋicraŋɋa epe jaŋɋâŋ âkecnume,
Anutu, go sifu mi behecnuzemec.
Eme no ŋic gaŋne gaŋne fua raniŋmu,
jaŋe tâpirige mutaniŋke‐jarezepac.
19 Anutu go tiŋnegezi feku sambâŋ heuakac.
Goki wiac kâcɋene sâko eekic;
mozi Anutu gore sâc jukac?
20 Go manahaŋ ʒârâ hâriŋ bocjaha bâfuac‐nâpowec;
eme ʒi mocwâc bâfiriec‐nâpocmu,
â mâreŋ hukicnaonec mocwâc baefuc‐nâpocmu.
21 Erâ nore ʒâŋe wâc bafaharecmu,
â bâbâmiriŋ bâfua‐narecmu.
22 O Anutu‐nane, no iŋuc jaha kâriŋɋaŋ qahuc
jauŋ fârigere mumbiaŋgupemu.
No gita qahuc muteŋ bâteŋ egarepemu,
Israere Tiri rune go.
23 Micbipic‐nanezi go muteŋguhuc ʒeri ezepac,
â maŋ qâqâtâc‐nane firuemeŋte e iŋuc jaha ezejec.
24 Â nameŋ‐nanezi dameŋ sâc tiŋnege mutaniŋkezejec.
No sipiricnuzo mumbiŋ jaŋe bawahac‐jopatec
mimi fai‐jeŋicko fewec.