DÂKÂNE NAMBA 4
90
Anutu juju sanaŋzi ŋic sisirowene nâŋâcne huec ekac
1 Wofuŋ, goki dameŋne dameŋ sâc
huec sanaŋ enâre warehuc jumeŋ.
2 Tiki jaŋe huhuckerâ mi fehapie,
â sambâŋ mâreŋ mi bâfuac‐jofahuc
goki Anutu jumeŋzi jurâ juraʒizokic.
3 Goki mutec ŋic jaŋe rufeo risie raeŋgopieŋ,
eha wâc muekic, “Ŋoŋe harierâ wareniŋ.”
4 Jara wâŋ tauseŋ i gore maio
jac ʒoaŋ tarajec irec sâc eekac,
me ŋafe dâkâne sawa irec sâc.
5 Go ŋic ofaŋ‐jopatec raeŋgopieŋ;
juju‐jeŋic i guŋ manaeŋgopeneŋ iŋucne,
me furicte hofâ qinʒiŋ wefuekac iŋucne tinac.
6 Hofâ qinʒiŋ e furicte ɋârerâ haŋ baekac,
hae owâeme ɋaŋarâ ururuckeekac.
7 Gore kimbeŋzi hâcne ʒâtâmirec‐nâpoekac,
aaricgezi hecnâpokume siroweeŋgopeneŋ.
8 Go sâqocne‐nâŋec ʒâŋe maigao birickemeŋ,
wiac soŋsoŋko embeŋ i tatamacko fua‐gareekac.
9 Jei, ʒoaŋ gie bapa‐nâŋec kimbeŋgere erâ
beraŋnea wise tâmireeŋgopieŋ;
jara‐nâŋec i aŋ baeŋgopeneŋ
irec sâc tinac jutaraeŋgopeneŋ.
10 Juju‐nâŋecte dameŋ i jara 70 eekac,
â riŋkoa sawa 80 bâfuaekac;
maŋnao wiac fuaekac i neneŋ â ʒâic,
erâ biac qosackeme ratâmireeŋgopeneŋ.
11 Mozi aaricgere tâpiri wânʒâŋ mana wosâeekac,
â araŋ bagarehuc kimbeŋgere manasuekac?
12 Irec ʒoaŋ gie bapa‐nâŋecte sâc
qazu‐nâretec maŋɋârâŋhec enʒepeneŋ.
13 O Wofuŋ, risie‐nârec; ʒâic wezimucko taraocmu?
Kiŋaŋ qaqafâcge nâŋere buge sâqoreoc me.
14 Furictea aki anonocgezi bâgunuc‐nâpoc,
eme juju dameŋ‐nâŋec sâc
ʒeri ehuc bubiaŋ mananʒepeneŋ.
15 Bâʒâic‐nâpo warehuc jumeŋ, ʒoaŋ gie bapa
irec sâc jaha bubiaŋ qanârehuc juzemec;
â ʒârâ ʒâpâ honehuc jukicne jara irec sâc.
16 Gie baekic i kiŋaŋŋicfâcge fua taniŋke‐jarezejec,
â ɋâricfâc‐jeŋic jaŋe eri tatamacge honenʒepieŋ.
17 Wofuŋ Anutu‐nâŋecte aki anonoczi fai‐nâŋecko wahazejec,
eme menâŋecte gie goki jambuŋke‐nârezemec,
jâmbomac, menâŋecte gie jambuŋkezemec.