96
Anutu mumutara gie‐ticnere muteŋkezo
(Bin I 16:23–33)
1 O ŋicbureŋ, Wofuŋ gae ɋâricne hecneniŋ,
mâreŋŋic ʒeŋgoma, Wofuŋ gae hecneniŋ.
2 Wofuŋ gae hecnehuc ʒâŋe‐ticne muteŋkeniŋ,
ʒoaŋne ʒoaŋne bâbâpiaŋ gie‐ticnere binaŋ baniŋ.
3 Eri tatamac‐ticne i qâpuc mutaniŋke‐jareniŋ,
gie‐ticne wawarecnehec i ŋicne ŋicne jaŋerao muiŋ musawec eniŋ.
4 Wofuŋ e kâcɋene, irec e fehuc mumbiaŋkezo,
nemu sasawa siric‐jopahuc e araŋ bacnezo.
5 Qâpuc nemufâc‐jeŋic jaŋe ɋâŋ qâqâtâc,
Wofuŋ e ine sambâŋne sambâŋne bâfuawec.
6 Ʒâŋe biŋe â ʒai ʒonʒoŋ‐ticnezi bâniecnekac,
tiri ufuŋ‐ticnao tâpiri â eri qâreŋ focnekac.
7 Ŋic gurune gurune ŋoŋe Wofuŋ muteŋkeniŋ,
Wofuŋte tatamac â tâpiri‐ticne musokaniŋ.
8 Wofuŋ e ʒâŋe‐ticnere sâcko sâseniŋ;
taha bafisirâ hae ʒoŋa‐ticnao feniŋ.
9 Tiri eri qonaŋkerâ Wofuŋ dapecneniŋ;
mâreŋ sâc mai‐ticnao jâjâwâckeniŋ!
10 Ŋicne ŋicne ʒiŋuc mufua‐jareniŋ: “Wofuŋ guriŋ bakac.”
Jâmbomac, e mâreŋ qasanaŋkewec qiŋ herâ ŋekac;
e ŋic gurune gurune jaŋere dâŋ sâcjeŋicko mutaraocmu.
11 Sambâŋ e bubiaŋ manaoc â mâreŋ e ʒeri eoc,
hâwec â maŋnao wiac qiriŋ qaŋgopieŋ jaŋe fânâŋkeniŋ.
12 Sopâc â bec qowifâcne jaŋe kiwaeniŋ,
erâ kâtere jâc sasawa jaŋe ʒeri gae heniŋ.
13 I Wofuŋzi warekacte ere maio eniŋ;
e mâreŋ sâc mumutara gie baocte warekac.
E mâreŋko mumutara gie‐ticne bâtiŋnehuc baocmu,
â ŋicne ŋicne dâŋjeŋic jâmbomacko mutaraocmu.