21
Joramzi Juda ŋicwofuŋ juwec
(Ŋic II 8:16–24)
1 Josafata e juku apa ŋosafâc‐ticne jaŋe qâtec‐jopahuc hâmome jaŋe fombiŋkoa Dawidire hae qizecko duckembiŋ. Ehame ŋokâ‐ticne Joramzi tucticne qarâ ŋicwofuŋ juwec.
2 E ɋafâc‐ticne ʒiŋuc jumbiŋ: Aʒaria, Jehiele, Ʒekaria, Aʒaria, Mikae â Sefatia. Ŋic i jaŋe sasawa Juda ŋicwofuŋ Josafatare ŋokâfâc hâcne.
3 Jaŋe mamac‐jeŋiczi siliwa â gol â wiac furi sâko bocjaha tahac‐jopawec, erâ ʒuhuckerâ Juda mâreŋko hae sacsanaŋ‐jeŋichec ŋerawec i mâmâc jarewec. Â uucmaŋ ine Joramzi mârâc fufua juwecte e râcnewec.
4 Eme Joram e mamac‐ticnere eri ŋeŋeo ŋehuc tâpirihec erâ ɋafâc‐ticne ʒikazi qâhâmoc‐jopawec, erâ wâc Israe ŋic fekicne gâcne mâmâc qâhâmoc‐jopawec.
5 Joram e jara‐ticne 32 bazurâ ŋicwofuŋ ehuc Jerusalem haeo jara 8 juwec.
6 Erâ e Ahabare kikefuŋfâc jaŋe embiŋ irec sâc jaha ehuc Israe ŋicwofuŋ jaŋere kike hata bâjâpewec. E Ahabare otâzi ŋonâŋ‐ticne ewecte iŋuc hâcne ewec. Erâ e Wofuŋte ʒâŋe faio wiac mamakâcne ebac ewec.
7 Wofuŋ e ine Dawidihec ʒâʒâfic ehuc e jahacne â ɋâricfâc‐ticne lambe moc jare sanaŋkeocte mupaŋkecnewec irec Dawidire kikefuŋfâc bâsirowec‐jopaocte mi manasuwec.
8 Eme ere dameŋko Edomŋic jaŋe Judaŋic jaŋere rurumaŋko ʒuhuckerâ juniŋte takic‐jopame maŋrâŋgeŋ bâfuarâ jaŋe jaŋacne ŋicwofuŋ moc âkendâŋnembiŋ.
9 Iŋuc epie Joram e ŋafeoa faharerâ keretacfâc‐ticne â keretac guriŋ bapafâc‐ticne jaŋehec rahapie Edomŋic jaŋe rârec‐jopahuc imac‐jopambiŋ.
10 Eme Edomŋic jaŋe Juda guriŋ bapa‐ticnere takic‐jopame maŋrâŋgeŋ bâfuambiŋzi bâfuahuc juŋgopieŋ jaha. Ehame Libina haeonec jaŋe wâc dameŋ ijaha Joram e apa ŋosafâc‐ticne jaŋere Wofuŋ Anutu râpeckewecte ere guriŋ bapare takic‐jopame maŋrâŋgeŋ bâfuambiŋ.
11 Erâ Joram e Juda tiki mâreŋko furu mâreŋ wâc barawec. Ehuc Jerusalem haere ŋecjucfâc eeatucko bânie‐jarewec â Judaŋic ejareme qâsoriembiŋ.
12 Ehame porofete Eliaraonec papia ʒiŋuc erao fisiwec: “Apage Dawidire Wofuŋ Anutu e ʒiŋuc mukac. ‘Go mamacge Josafatare kike hata mi bâjâpeekic â Juda ŋicwofuŋ Asare kike hata wâc mi bâjâpeekic.
13 Go ine Israe ŋicwofuŋ jaŋere kike hata bâjâpeekic. Ehuc Judaŋic â Jerusalem haere ŋecjucfâc jaŋe Ahabare kikefuŋfâc jaŋe embiŋ irec sâc ehuc eeatucko bânie‐jareekic. Erâ wâc ɋafâcge, mamacgere kikefuŋfâc hâcne, qâhâmoc‐jopameŋ; jaŋe gore sâc sirickehuc biaŋne jumbiŋ.
14 Manakic, Wofuŋzi ŋicfâcge, naru motecfâcge, ŋonâŋfâcge â wiac fogarekac sasawa ŋoŋerao wiac hâhâwicne moc bâfuaocmu.
15 Â go gahacne ine hucukic repic qapicne jâmbâŋ moc homotecgao fuahame hucukic irec erâ ʒoaŋ gie bapa sâc homotecge wahaocmu.’ ”
16 Eme Filisa â Etiopia ŋic jaŋe Araba ŋic jaŋere heririŋko juŋgopieŋ jaŋe Wofuŋzi aaric bâfua‐jareme Joram râsi rocnembiŋ.
17 Eme jaŋe Juda mâreŋko râsi fisirâ ŋicwofuŋte ficko wiac sasawa fowec bawec i ame susuckerâ wisembiŋ. Erâ ŋokâfâcne mecne â ŋonâŋfâcne mecne mâmâc bacjopa rafârembiŋ, ehame ŋokâfâcne jaŋeraonec ŋokâ‐ticne ʒâcne, ʒâŋene Joahaʒi eki sawa juwec.
18 Eme irec faicnao Wofuŋzi mume homotec‐ticnao wicsanaŋ fuawec.
19 Eme juku jara jajahec tarame dameŋ mocko wicte erâ homotec‐ticne wahame ʒâic sâko manahuc hâmowec. Hâmome ŋicfâc‐ticne jaŋe, apa ŋosafâcne jaŋe hâmopie ʒoc ruqe‐jare jumbieŋ irec sâc ere manasuhuc moc mi ruqembiŋ.
20 E jara‐ticne 32 bazurâ fuŋkerâ ŋicwofuŋ ehuc jara 8 Jerusalem haeo juwec. Juku hâmome moczi moc ere busâqoc moc mi manawec. Eme jaŋe Dawidire hae qizecko duckembiŋ, erâ i ŋicwofuŋ jaŋere ʒâŋeruŋko aricne.