23
1 Eme juku jara 7 eha Jojadazi e jahacne tâpirire maname sâckeme momori 100 gurune gurune jaŋere micne kecʒiŋuc jaŋehec ʒâʒâfic ewec: Jerohamte ŋokâ Aʒaria â Johanaŋte ŋokâ Isimae â Obedere ŋokâ Azaria â Adajare ŋokâ Maseja â Ʒikirire ŋokâ Elisafa.
2 Eme jaŋe Juda mâreŋ fotâcnerâ rahuc Juda hae sâc irecnec Lewi guru â Israe kikefuŋte garikiŋ sâc irec micne qânusuc‐joparâ rocjopapie Jerusalem haeo fisimbiŋ.
3 Eme kikefuŋ sasawa jaŋe Anuture ufuŋko ŋicwofuŋhec ʒâʒâfic embiŋ. Eme Jojadazi ʒiŋuc jazawec: “Honeniŋ, ŋicwofuŋte ŋokâ ʒine hâcne. E Wofuŋzi Dawidire ɋâricfâc jaŋere dâŋ muwec irec sâcko ŋicwofuŋ juzejec.
4 Irec ŋoŋe wiac kecʒiŋuc enʒepieŋ: Taha bapa â Lewiŋic sabata hombaŋko gie râerâ juniŋmu ŋoŋeraonec tucnezi haesac motâc soŋaŋ junʒepieŋ.
5 Â tucne jaŋe ŋicwofuŋte ficko junʒepieŋ â tucne jaŋe ine Ŋesiŋ Motâc ira junʒepieŋ; â ŋic ŋokac sasawa ine Wofuŋ ufuŋ‐ticnere hae ʒoŋao junʒepieŋ.
6 Moczi moc Wofuŋte ufuŋko mi raʒizejec, taha bapa â Lewiŋic kiŋaŋ gie baeŋgopieŋ jaŋe sawa raʒinʒepieŋ. Jaŋe tirine irec sâcne raʒinʒepieŋ â ŋic ŋokac sasawa ŋoŋe ine Wofuŋte mumutâc i soŋaŋkenʒepieŋ.
7 Lewiŋic jaŋe buc buc ʒika bafârerâ ŋicwofuŋ orâŋkehuc domanʒepieŋ. Ŋic moc e ufuŋko hefâme qâhâmozo. Ŋoŋe ŋicwofuŋzi juocmu sâc junʒepieŋ.”
8 Eme Lewiŋic â Judaŋic sasawa jaŋe taha bapa Jojadazi mutâcne‐jarewec irec sâcko efârembiŋ. Ehuc micne jaŋe ŋicfâc‐jeŋic sabata hombaŋko gie bapa dameŋ‐jeŋic mi fowec i jaŋe mecne â hombaŋko gie bapa dameŋ‐jeŋic fowec jaŋe mâmâc jowac‐jopa fisimbiŋ. Taha bapa Jojada e guru jajahec i jahe mâmâc jaha junicte muwec hâcne.
9 Erâ taha bapa Jojada e ŋicwofuŋ Dawidire sându â maro kâcɋene â piticne Wofuŋte ufuŋko fowec i rorâ momori micne jarewec.
10 Ehuc ŋic soŋaŋ râec‐jopame jaŋe ʒikare wiac mejeŋicko fefâreme ufuŋ ŋifec â ŋifec, faic â juwic erâ alata i mâmâc orâŋke‐fârerâ domambiŋ.
11 Eme Jojada e ŋicwofuŋte ŋokâ jowa waharâ qizec‐ticnao eri hendiŋ hecneme hume sâcmutâc dâŋqâhâc râcnewec. Eme ŋicwofuŋ âkendâŋnehapie Jojada â ŋokâfâcne jaŋe wokemaŋ ruacnembiŋ. Ehuc mumbiŋ: “Ŋicwofuŋ e juraʒihuc juzejec sanaŋ.”
12 Ehame Atalia e ŋic ŋokac jaŋe gasackehuc ŋicwofuŋ ʒeri mumuteŋ ecnembiŋ irec fâŋâŋ manarâ ŋic ŋokac jaŋerao Wofuŋte ufuŋko raʒiwec.
13 Ehuc ʒiŋuc honewec: Ŋicwofuŋ e motâc wâtuŋ heririŋko domawec â momori micne â qeŋ qaqa ŋic jaŋe ŋicwofuŋte gâjoŋko domambiŋ. Ehame mâreŋ irec ŋic ŋokac sasawa jaŋe kiwac qawac ehuc qeŋ qahapie gae hehe ŋic jaŋe musi wiac‐jeŋiczi bânie‐jarepie micʒonʒoŋ fuahuc fowec. Jaŋe iŋuc epie Atalia e ŋaqi qoruc‐ticne bâsuckerâ owackehuc muwec, “Doc bapa, doc bapa!”
14 Iŋuc mume taha bapa Jojada e momori guru jaŋere micne âkendâŋ‐jopakicne jaŋe jowac‐jopa fisirâ ʒiŋuc jazawec: “Momori ŋondeŋkonec bârârieniŋ. Ehuc ŋic i me i moczi bâjâpeme e wâc qâhâmozo.” Taha bapa e ʒiŋuc hâcne jazawec: “Ŋoŋe ŋokac e Wofuŋte ufuŋko mi qâhâmonʒepieŋ.”
15 Iŋuc mume jaŋe mâc rorâ barâ ŋicwofuŋte ficko Becâsic Motâcko fisirâ ira qâhâmombiŋ.
16 Eme Jojada e jahacne â ŋic ŋokâc â ŋicwofuŋ jaŋe Wofuŋte ŋicfâc erâ juniŋte ʒâʒâfic moc bâfuawec.
17 Eme ŋic ŋokac jaŋe Baali nemure ufuŋko rarâ ufuŋ i heropiembiŋ. Ehuc alata â ɋâŋ qâqâtâc‐ticne i henʒaŋ qanʒaŋne‐fârembiŋ. Erâ Baali nemure taha bapa Mataŋ e alata ŋerawec irec maŋfuŋko qapie hâmowec.
18 Iŋuc epie Jojada e Lewiŋic taha bapa â Lewiŋic gâcne Dawidizi biri râewec irec sâcko Wofuŋte ufuŋko gie bambiŋ jaŋe Wofuŋ ufuŋ‐ticnere ruc bapa ŋic râec‐jopawec. Jaŋe Mosere sâcmutâc dâŋte sâcko Dawidizi mumutâc râewec i bâjâpehuc ʒeri erâ gae hehuc Wofuŋ qowi bâzi rikecneniŋte râec‐jopawec hâcne.
19 Erâ ŋic moc wâwânâŋ‐heczi Wofuŋte ufuŋko raʒizacte ufuŋte motâc soŋaŋkeniŋte motâc soŋaŋ râec‐jopawec.
20 Jojada e iŋuc efârerâ momori ŋic jaŋere micne â ŋic fekicne â ŋic ŋokac jaŋere mâreŋ soŋaŋ, erâ ŋic ŋokac sasawa rocjopame Wofuŋte ufuŋkonec ŋicwofuŋ jowarâ asasai âtehuc Faic Motâc i fotâcnerâ ŋicwofuŋte ficko rambiŋ. Erâ ŋicwofuŋ e eri ŋeŋeo hepie ŋewec.
21 Iŋuc erâ mâreŋ irec ŋic ŋokac jaŋe kiwac qawac embiŋ. Eme Atalia ʒikazi qapie hâmome haezi fânâŋ tâmiric fowec.