25
Amaziazi ŋicwofuŋ juwec
(Ŋic II 14:1–22)
1-2 Amazia e jara‐ticne 25 bazurâ fuŋkerâ ŋicwofuŋ ehuc Jerusalem haeo jara 29 juwec. Neŋgoc‐ticne ʒâŋene Joadaŋ e Jerusalem haeonec. Amazia e Wofuŋte ʒâŋe faio wiac sasawa ebac eme sâcke‐fârewec, erâ i maŋ hâcbuc jaha mâcne.
3 Juku ŋicwofuŋ ŋeŋe‐ticnao ŋesanaŋkehuc mamac‐ticne ŋicwofuŋ qâhâmombiŋ kiŋaŋ qaqafâc‐ticne i jaŋe iŋuc jaha qâhâmoc‐jopawec.
4 E Mosere sâcmutâc dâŋte papia qizecko Wofuŋte mumutâc dâŋ ʒiŋuc qâreŋkekicne fokac irec sâcko naru motecfâc‐jeŋic mi qâhâmoc‐jopawec: “Naru motec jaŋere erâ mamacfâc‐jeŋic jaŋe mi qâhâmoc‐jopazo me mamac jaŋere erâ naru motecfâc‐jeŋic mi qâhâmoc‐jopazo. Ŋic buc buc jaŋe jaŋacne sâqocnere erâ hâmonʒepieŋ.”
5 Eme Amazia e Juda ŋicguru hetumaŋ‐jopa‐fârerâ Juda â Benjamiŋ ŋic mâmâc sasawa garikiŋ‐jeŋic sâc momori tauseŋ gurune gurune â 100 gurune gurune jaŋere micnefâc râec‐jopa rawec. Ehuc ŋic jara‐jeŋic 20‐o domarâ fekac jaŋe biric‐joparâ honeme ŋic bâwosâec‐jopakicne ʒikare sâc erâ sându maro bapare sâc 300 tauseŋzi jumbiŋ.
6 E Israe mâreŋkonec ŋic tâpirihec 100 tauseŋ jaŋe siliwa ŋemâc‐ticne 100‐zi furi bacjopawec wâc.
7 Ehame Anuture ŋic moczi erao fisirâ muwec, “O ŋicwofuŋ, go Israe momori mana‐jaretec gohec mi raniŋ, Wofuŋ e Israe ŋic, Eferaim ŋic jaŋehec hâcne mi jukac.
8 No iŋuc ehuc ʒikare sanaŋkepemu, go iŋuc mukicko ine Anutuzi râsi jaŋere maio tuŋguocmu. Anutu e ŋic babafic‐jopare tâpiri â tuŋtuŋ‐jopare tâpiri i mâmâc focnekac hâcne.”
9 Iŋuc mume Amaziazi Anuture ŋic ʒiŋuc âzâcnewec: “Eme no Israe momori ŋic jaŋere furi siliwa ŋemâc‐ticne 100 jarepo i weniŋuc enaŋmu?” Iŋuc mume Anuture ŋiczi dâŋ ʒiŋuc bâtikiecnewec: “Wofuŋ e irec sâc jâuruhuc wiac tahacguocte tâpiri focnekac wâc.”
10 Iŋuc âzâcneme Amazia e Eferaim mâreŋkonec momori ŋic erao fisimbiŋ jaŋe hae‐jeŋicko mocwâc risieniŋte râec‐jopawec. Iŋuc ejareme jaŋe Judaŋic mana sâqore‐jarehuc aaric sâkohec hae‐jeŋicko risiembiŋ.
11 Ehame Amazia e hâbihec jaha ŋicfâc‐ticne bânie‐jareme Hâwec Wâneŋko rarâ Seiri ŋic 10 tauseŋ jopambiŋ.
12 Â ŋic gâcne 10 tauseŋ jaha ine ɋâricne rocjoparâ qânâ hârâc sâko mocte botâŋnao bacjopa ferâ domahuc sâroc‐jopapie hurâ qanʒaŋ banʒaŋ‐jopa‐fârewec.
13 Ehame Amazia e jahacnehec ʒikao mi rahuc sorec‐jopame risiembiŋ momori ŋic i jaŋe Juda hae gâcne Samaria haeonec fuŋkerâ ŋeraku Bete‐Horoŋ haeo fisikac hae i imacke‐fârembiŋ. Ehuc hae irec maŋnao ŋic ŋokac 3 tauseŋ qâhâmoc‐jopahuc mafa mateŋ wiac hâhâwicne rombiŋ.
14 Eme Amazia e Seiri ŋic, Edomŋic hâcne, joparâ risiehuc jaŋere nemure ɋâŋ qâqâtâc ameckerâ fisi âkendâŋ‐jopame domapie dape‐jarehuc taha bâzi rike‐jare jujec.
15 Eme irec Wofuŋ e Amaziare aarickeme porofete moc soreme fisirâ ʒiŋuc âzâcnewec: “Go Seiri ŋic jopahaŋtec jaŋere nemure ɋâŋ qâqâtâc gore meonec ŋicfâc‐jeŋic batarac‐jopaniŋte eipiembiŋ i jaŋe wemocte ro qânusuc ejaremeŋ.”
16 E dâŋ iŋuc muha muhame izia ŋicwofuŋzi âzâcnerâ muwec, “Go nore mumutiŋ ŋic râecgumbeŋ me? Dâŋ behec! Manakic, go hâmocmu.” Iŋuc mume porofete e dâŋ gâcne beherâ ʒiŋuc sawa muwec: “Go nore mumutiŋ dâŋte hazec mi râehuc wiac ʒi emeŋte Wofuŋzi bâsirowecguocte maŋkeme fokac i mana‐jâmbâŋkekopac.”
17 Iŋuc mume Juda ŋicwofuŋ Amazia e ŋic gâcne jaŋehec muc manac erâ Jehu ŋokâ‐ticne Joahazi ere ŋokâ Jehoasi, Israe ŋicwofuŋ hâcne, erao ʒiŋuc muhuc dâŋ râeme rawec: “Go waretec nâhâc tâpiri‐nâhecte fuŋne nowac gowaruŋ ezeperec.”
18 Iŋuc mume Israe ŋicwofuŋ Jehoasizi Juda ŋicwofuŋ Amaziarao dâŋ ʒiŋuc râeme rawec: “Lebanoŋ mâreŋko ʒârâ moczi Lebanoŋ mâreŋkoa jâmâzâc jâctao ʒiŋuc muhuc dâŋ râewec: ‘Go otâge ŋokâ‐nanere ŋonâŋ eocte râcnec.’ Iŋuc muhame Lebanoŋ mâreŋkonec jaha kâte qowi moczi fotâcnehuc ʒârâ i âtenʒaŋnewec.
19 Eme go ʒiŋuc mukomec: ‘No Edomŋic imac‐jopapo,’ iŋuc muhuc maŋfefe ekomec. Go haegaoa juc; go wemocte go gahacne mecne â Juda kikefuŋ mecne ŋoŋe mâmâc jaha waha ŋopaocte suru jâiŋ ehuc bahac bâfuacmurâ giene bakomec?”
20 Iŋuc mume Amazia e dâŋ i mi manawec. Jaŋe Edom mâreŋte ɋâŋ qâqâtâc wira basac ejarembiŋte Anutuzi kisâfâc‐jeŋic jaŋere meo râec‐jopaocte maŋkeme fowec hâcne.
21 Irec Israe ŋicwofuŋ Jehoasi e ferâ Juda ŋicwofuŋ Amaziahec Juda hae moc ʒâŋene Bete‐Semesi ira bâbâfuac erâ qaqac epic.
22 Ehuc Israe ŋic jaŋe Judaŋic bawahac‐jopapie wiserâ hae‐jeŋic sâc rambiŋ.
23 Eme Israe ŋicwofuŋ Jehoasizi Joasire ŋokâ Ahaʒia ŋosa‐ticne, Juda ŋicwofuŋ Amazia hâcne, e Bete‐Semesi haeo rorâ Jerusalem haeo barawec. Erâ haesac i 400 kubi irec sâc Eferaim Motâckonec heropieha raku Tuturuŋ Motâcko fisiwec.
24 Ehuc gol â siliwa â kuʒi râqâc wiac Anuture ufuŋko fowec i â irec soŋaŋ Obededom e mâmâc rorâ barawec. Erâ wâc ŋicwofuŋte ficko ʒeŋaŋ wiac fowec i â ŋic ŋokac mâmâc ame susuc‐joparâ Samaria haeo risiewec.
25 Juda ŋicwofuŋ Joasire ŋokâ Amazia e ine Israe ŋicwofuŋ Joahaʒire ŋokâ Jehoasizi hâmome jara 15 juwec.
26 Eme Amaziazi wiac sasawa ebac ewec irec binaŋ i fuŋnaonecteaŋ ninic jaha Juda â Israe Ŋicwofuŋ jaŋere Papia Qizecko qâreŋke‐fârekicne.
27 E Wofuŋ râpeckeme ŋic gâcne jaŋe Jerusalem haeo soŋsoŋko râsi rocnepie wiserâ Lakisi haeo rawec. Ehame kiŋaŋ sorec‐jopapie Lakisi haeo rarâ ira qapie hâmowec.
28 Hâmome becâsic jaŋere faio râerâ bara apa ŋosafâc‐ticne fombiŋkoa Dawidire hae qizecko duckembiŋ.