27
Jotamzi ŋicwofuŋ juwec
(Ŋic II 15:32–38)
1 Jotam e jara‐ticne 25 bazurâ fuŋkerâ ŋicwofuŋ ehuc Jerusalem haeo jara 16 juwec. Neŋgoc‐ticne ʒâŋene Jerusa e Zadokore otâ.
2 Jotam e mamac‐ticne Uʒijare sâcko Wofuŋte ʒâŋe faio wiac sasawa ebac eme sâcke‐fârewec. Mocjaha, Wofuŋte ufuŋko fefe ine mi ewec, â ŋic ŋokac jaŋe eebapa repicne bajumbiŋ jaha.
3 Jotam e Wofuŋ ufuŋ‐ticnere sacmotâc ʒâʒâŋiŋ i bawec â Ofele haere sacgie boc bawec wâc.
4 Erâ ʒuhuckerâ Juda tiki mâreŋko hae barawec, ehuc tiki jâckâtenehec ira huec â ʒae barawec.
5 E Amoŋŋic jaŋere ŋicwofuŋhec qaqac ehuc sanaŋke‐jâmbâŋkewec. Iŋuc ejareme Amoŋŋic jaŋe jara ira siliwa ŋemâc‐ticne 100 â padi ɋaɋacne ŋemâc‐ticne 10 tauseŋ â âmuc âmucnere ŋemâc 10 tauseŋ jaha râcnembiŋ. Erâ Amoŋŋic jaŋe sâc ijaha râcnehuc juhapie jara jahec â moc tarawec.
6 Jotam e Wofuŋ Anutu‐ticnere mic sâcko wiac ebac ewecte tâpiri sâkohec juwec.
7 Eme Jotamzi wiac sasawa ebac ewec, ʒika qawec â hata âte rawec irec binaŋ i ʒeŋgoma Israe â Juda Ŋicwofuŋ jaŋere Papia Qizecko qâreŋke‐fârekicne.
8 Jotam e jara‐ticne 25 bazurâ fuŋkerâ ŋicwofuŋ ehuc Jerusalem haeo jara 16 juwec.
9 Juku apa ŋosafâcne jaŋerao ʒuhuckehuc hâmome Dawidire hae qizecko duckembiŋ. Ehame ŋokâ‐ticne Ahaʒizi tucticne qârâ ŋicwofuŋ juwec.