3
Salomozi Wofuŋte ufuŋ bawec
(Ŋic I 6:1–38)
1 Salomo e fuŋkerâ Jerusalem haeo Wofuŋzi mamac‐ticne Dawidi Moria tikio fuacnewec, tiki ira hâcne Wofuŋte ufuŋ bawec. Mâreŋ i Jebusi ŋic moc ʒâŋene Oronaŋ ere padi qâqâmârâŋ tomao Dawidizi bâwosâewec.
2 E ŋicwofuŋ juhame jara 4 irec mosa namba 2 wahame ufuŋ i fuŋkerâ bawec.
3 Salomozi Anuture ufuŋ bawec irec sâc i ʒiŋuc: Ʒoricne‐ticnere sâc i 60 kubi â otecne ine 20 kubi. Erâ i sâcmeda‐jeŋic raŋɋane fowec irec sâcko bakicne.
4 Eme hae gâŋgâŋ ficmaŋ kâcɋenao iticnewec ʒoricne‐ticnere sâc i ufuŋ otecne‐ticnere sâc 20 kubi â hâŋne‐ticnere sâc i 20 kubi jaha. Erâ maŋne i gol ɋaɋacnezi ɋorockewec.
5 Erâ maŋne kâcɋenao ine wete wâtuŋ birickerâ gol ɋaɋacnezia ɋorockehuc hâmu jâcne â ʒariŋ hawari barawec.
6 Ehuc ufuŋ i qânâ furi sâkozi erickewec. Erâ gol i Parawaim mâreŋkonec.
7 Irec e ufuŋ wâtuŋ‐ticne, sâpe‐ticne, motâc‐ticne â motâc fuŋnao ɋâriŋte foŋ i mâmâc golzi ɋorocke‐fârewec. Erâ sâpeo kerubim jaŋere hawari barawec.
8 Erâ furu dindiŋ bawec i ufuŋ otecnere sâcko, eme ʒoricne‐ticnere sâc 20 kubi â otecnere sâc 20 kubi jaha ewec. Ehuc fainao gol ɋaɋacne ŋemâc‐ticne 600 izi ɋorockewec.
9 Eme biriŋte ŋemâc i gol ŋemâc‐ticne 50, irec sâc ewec. Erâ ufuŋ feŋgaŋne faic ŋefewec i golzia ɋorocke‐fârewec.
10 Eme maŋne furu dindiŋ ira kerubim jajahec jahere hawari jâczi fasaerâ golzi ɋorockewec.
11 Eme kerubim jajahec jahere fakecte sâc i 20 kubi Ehame mocte fakec ŋifec ufuŋ sâpene âke uawec irec sâc i 5 kubi ewec â fakecne ŋifec izi ine kerubim mocte fakecko iticnewec; irec sâc i 5 kubi jaha ewec.
12 Eme kerubim mocte fakec ŋifecnezi ufuŋte sâpeoa âke uawec â fakecne ŋifec izi ine âgonere fakeckoa iticnewec. Fakec i jahere sâc buc buc 5 kubi jaha ewec.
13 Eme kerubim i jahere fakecte sâc i 20 kubi. Ehame jahe ufuŋ maŋne kâcɋene maickerâ domapic.
14 Erâ ââketâc qoruc i qoruc keŋkeŋne, âmuc âmucne, bâbâroŋ â qaŋqaŋzi barâ irec fainao kerubim hawari bawec.
Huramabizi taha ufuŋ maŋnao gie bawec
(Ŋic I 7:15–51)
15 Erâ ufuŋ mainao ira wâtuŋ jajahec ʒoricne‐jekicte sâc 35 kubi wiseme huwec, ehuc wâtuŋ utu‐jekic i 5 kubi irec sâc ba akic ewec.
16 Erâ qânâzi kâpâcwaru hawari barâ wâtuŋ botâŋ‐jekicko râewec. Erâ binawec hândâŋte hawari 100 barâ kâpâcwâru hawari ira birickewec.
17 Eme wâtuŋ i jahe taha ufuŋ mainao wiseme hurâ domapic, moc i juwicpec â moc i faicpec. Eme juwicpec domawec irec ʒâŋe Jakiŋ muwec â faicpec domawec irec ʒâŋe ine Boasi muwec.