30
Aakic hombaŋ ŋembiŋ
1 Hisikia e dâŋ râeme Israe ŋic â Judaŋic jaŋerao rafârewec. Erâ wâc papia qâreŋkerâ Eferaim â Manase guru jaŋerao râeme rawec. Eme jaŋe fisipie Jerusalem haeo Israere Wofuŋ Anutu ere manasuhuc aakic hombaŋ ŋeniŋte iŋuc hâcne ewec.
2 Jerusalem haeo ŋicwofuŋ â mefârofâc‐ticne, erâ kikefuŋ sasawa jaŋe mosa namba 2 ira aakic hombaŋ ŋeniŋte muc manac embiŋ.
3 Taha bapa sasawa jaŋe eemasaŋ gie mi bafârembiŋ â ŋic ŋokac jaŋe wâc Jerusalem haeo mi tumaŋnembiŋ irec erâ aakic hombaŋ dameŋ‐ticnao jâmbâŋ mi ŋembiŋ hâcne.
4 Irec dameŋ âke suepie fewec i ŋicwofuŋ â kikefuŋ jaŋe manapie sâckewec.
5 Irec jaŋe Israe mâreŋ sâko Bere‐Seba haeonec raku Daŋ mâreŋko fisikac, ira musawepie ŋic ŋokac jaŋe fisirâ Jerusalem haeo Israere Wofuŋ Anutu ere manasuhuc aakic hombaŋ ŋeniŋte mupaŋkembiŋ. Jaŋe mutâcnekicne irec sâc guru sâkozi mi tumaŋne jumbieŋ hâcne.
6 Irec kiŋaŋŋic jaŋe ŋicwofuŋ â mefârofâc‐ticne jaŋeraonec papia rorâ Israe ŋic â Judaŋic jaŋerao rafârembiŋ. Ŋicwofuŋ e dâŋ kecʒiŋuc hâcne mutâcnehuc qâreŋkewec: “O Israe ŋicbureŋ, ŋoŋe Abraham, Isaka â Israe jaŋere Wofuŋ Anutu erao mocwâc risieniŋ. Iŋuc epie Anutuzi wâc Asiria ŋicwofuŋ jaŋere meonec ŋic ʒanʒaŋne wisembiŋ ŋoŋe mocwâc maic‐ŋopaocmu.
7 Ŋoŋe mamacfâc‐ŋeŋic â qomâfâc‐ŋeŋic jaŋe apa ŋosafâc‐jeŋic jaŋere Wofuŋ Anutu erao mi siŋkepie omatac bacjopawec, i ŋoŋe hone manac eeŋgopieŋ, irec jaŋe iŋucne mi enʒepieŋ.
8 Ŋoŋe mamacfâc‐ŋeŋic maŋsanaŋ bâfuambiŋ jaŋe iŋucne mi ehuc Wofuŋte rurumaŋko juhuc e jahac furu ufuŋ‐ticne raŋɋa raŋɋa ŋeocte mutiriwec ʒira warerâ Wofuŋ Anutu‐ŋeŋic kiŋaŋ qacnenʒepieŋ. Iŋuc epie kimbeŋ‐ticnere ʒocbâruŋzi ŋoŋeraonec rârieocmu.
9 Ŋoŋe Wofuŋtao mocwâc risieniŋmuo ine qomâfâc‐ŋeŋic â naru motecfâc‐ŋeŋic kâpâcwâru bacjopambiŋ jaŋe busâqoc mana‐jarerâ mâreŋ ʒira mocwâc bârisiec‐jopaniŋmu. Wofuŋ Anutu‐ŋeŋic e aki anonoc â buuruchec jukac. Irec ŋoŋe erao mocwâc risieniŋmuo ine eki mi râpec‐ŋopaocmu.”
10 Eme irec kiŋaŋŋic jaŋe Eferaim â Manase mâreŋko haene haene fotâcne‐fârerâ Sebuloŋ mâreŋko wâc fisimbiŋ. Mâreŋ irec rune jaŋe ine mu surec â mu sopec ejarehuc gâwie‐jarembiŋ.
11 Ehame Ase â Manase â Sebuloŋ mâreŋkonec ŋic afecne sawa jaŋe rumerâ Jerusalem haeo fisimbiŋ.
12 Eme ŋicwofuŋ â mefârofâc‐ticne jaŋe Wofuŋte micte Judaŋic giedâŋ mujarembiŋ i maŋ mocjaha ehuc ebac eniŋte Anuture tâpirizi basanaŋ‐jopawec.
13 Eme ŋic ŋokac bocjaha jaŋe mosa namba 2 ira aakic hombaŋ ŋeniŋte Jerusalem haeo fisikupie tutumaŋ sâko jâmbâŋ fuawec.
14 Eme jaŋe gie fuŋkerâ bahuc Jerusalem haeo alata ŋerawec i hetâtie‐fârembiŋ, ehuc hosâc ririkere alata ŋerawec i wâc iŋuc jaha hetâtierâ Kidoroŋ wâcko behepie huwec.
15 Eme jaŋe mosa 2 irec ʒoaŋ gie bapa 14 ira aakic hombaŋte lama motecne qa hezuc embiŋ. Iŋuc ehuc taha bapa â Lewiŋic mimi qaqa ejarepie jaŋe eemasaŋ gie bahuc Wofuŋte ufuŋko qowi bâzi baraʒimbiŋ.
16 Ehuc Anuture ŋic Mose ere sâcmutâc dâŋte sâcko dodoma‐jeŋic sâc doma rambiŋ. Eme taha bapa jaŋe Lewiŋic jaŋere meonec soc rorâ tiembiŋ.
17 Eme ŋic ŋokac bocjaha jaŋe tutumaŋko eemasaŋ gie mi bambiŋ. Irec Lewiŋic jaŋe Wofuŋtao râec‐jopahuc kiŋfâsâc bacjopaniŋte ŋic ŋokac jaŋere biŋe lama buc buc qa hezuc embiŋ.
18 Ŋic ŋokac hâmbâŋ sâko, Eferaim, Manase, Isasa â Sebuloŋ mâreŋkonec hâcne jaŋe eemasaŋ gie mi bambiŋ. Ehuc aakic lama nâniŋte mutâcnekicne irec sâcko mi nâmbiŋ. Irec Hisikiazi jaŋere kecʒiŋuc muhuc numuwec: “O Wofuŋ biaŋ, go ŋic buc buc kiŋjeŋic behezemec.
19 Jaŋe ufuŋte sâcmutâc fokac irec sâcko eemasaŋ gie mi bahuc sifu apa ŋosafâc‐jeŋic jaŋere Wofuŋ Anutu go hâcne wira basac egareniŋte maŋjeŋic domakac.”
20 Eme Wofuŋ e Hisikiare nunumu manarâ ŋic ŋokac bâpiaŋ‐jopawec.
21 Eme Israe ŋic ŋokac Jerusalem haeo jumbiŋ jaŋe bubiaŋ sâkohec ʒoaŋ gie bapa 7 aakic hombaŋ ŋembiŋ. Eme Lewiŋic â taha bapa jaŋe ʒoaŋ gie bapa sâc Wofuŋ gae tâpirihec jaha hecnehuc ʒeri mumuteŋ ecnembiŋ.
22 Eme Hisikia e Lewiŋic jaŋe Wofuŋte kiŋaŋ gie biaŋne bambiŋ irec muketeŋ dâŋ jaza‐fârewec. Ehame ŋic ŋokac jaŋe ʒoaŋ gie bapa 7 irec maŋnao hombaŋte nânâ nâmbiŋ. Ehuc wama bâzi rikerâ apa ŋosafâc‐jeŋic jaŋere Wofuŋ Anutu e daŋge âzâcnembiŋ.
23 Iŋuc ehuc kikefuŋ sâko jaŋe ʒuhuckerâ ʒoaŋ gie bapa 7 hombaŋ mocwâc ŋeniŋte maŋ mocjaha embiŋ. Irec jaŋe bubiaŋ faio ʒoaŋ gie bapa 7 mocwâc ŋembiŋ.
24 Eme ŋicwofuŋ Hisikia e Juda kikefuŋ jaŋe tahare biŋe bulimakao ŋicne 1 tauseŋ â lama 7 tauseŋ jarewec, â mefârofâc‐ticne jaŋe bulimakao ŋicne 1 tauseŋ â lama 10 tauseŋ kikefuŋ jarembiŋte iŋuc embiŋ. Ehame taha bapa jaŋe guru sâkozi eemasaŋ gie bambiŋ.
25 Eme Juda kikefuŋ â taha bapa â Lewiŋic erâ Israe mâreŋkonec kikefuŋ sâko fisimbiŋ i jaŋe mecne â ŋic jabane Israe mâreŋkonec fisimbiŋ â ŋic jabane jaha Juda mâreŋko ŋeŋe juju embiŋ jaŋe mâmâc kiwac qawac efârembiŋ.
26 Ehame Jerusalem haeo ʒeri sâko fuahuc fowec. Israe ŋicwofuŋ Dawidire ŋokâ Salomo hâmowec irec faicnao Jerusalem haeo wiac iŋucne mocwâc mi fua jujec hâcne.
27 Eme taha bapa â Lewiŋic jaŋe faharerâ ŋic ŋokac jambuŋ‐jopambiŋ. Ehame nunumu‐jeŋiczi sambâŋko Anuture tiri jujuo fisime Wofuŋzi mana‐jarewec.