32
Sanheribezi râsi fisiwec
(Ŋic II 18:13–37; Jes 36:1–22)
1 Hisikia e Wofuŋ‐ticnerao siŋkehuc wiac ebac ewec irec faicnao Asiria ŋicwofuŋ Sanheribe e jahac rauc‐jopaocte manasuhuc râsi fisirâ Juda hae sacsanaŋ‐jeŋichec ŋerawec sâc ira teuŋ âterâ fowec.
2 Eme Hisikia e Sanheribezi Jerusalem haeonec jaŋehec qaqac eocte maŋkehuc fisiwec i honerâ
3 fekicnefâc‐ticne â ŋic tai tâpiri‐jeŋichec jaŋehec hae sahao opâ ʒâŋe forawec i âte bâzickeocte maŋkewec. Iŋuc eme jaŋe bafickembiŋ.
4 Ehame ŋic bocjaha jâmbâŋ jaŋe ʒiŋuc muhuc opâ ʒâŋe â mâreŋ ira opâ forawec i âte bâzicke‐fârembiŋ: “Asiria ŋicwofuŋ jaŋe warerâ opâ bocjaha mi bâfuanʒepieŋ.”
5 Eme Hisikia e ʒuhuckerâ haesac ʒaŋkekicne i ʒoɋachec jaha bafârewec, ehuc irec fainao ʒae wiac barawec â sahacnao sac mocwâc ʒuhuckerâ bawec. Iŋuc ehuc Dawidire hae qizecko Milo hae i basac qasanaŋke‐jâmbâŋkewec. Erâ ʒikare wiac â maro bocjaha jâmbâŋ bame fewec.
6 Erâ momori ŋic jaŋere micne âkendâŋ‐joparâ haesac motâcte hae ʒoŋao hâbi hejarehuc ʒiŋuc muhuc jazawec:
7 “Ŋoŋe sanaŋkerâ hâbihec enʒepieŋ. Ŋoŋe Asiria ŋicwofuŋ â ŋic guru sâko jâmbâŋ ehec juŋgopieŋ jaŋere hâhâwic me memeŋ garu mi enʒepieŋ. Nâŋâcnao ere sâc jâuruhuc fekicne sâko moc jukac wâc.
8 Siria ŋicwofuŋ erao ŋic tâpiri sawa fokac; â nâŋâcnao ine Wofuŋ Anutu‐nâŋeczi bafic‐nâpohuc ʒika qaocte jukac.” Eme ŋic jaŋe Juda ŋicwofuŋ Hisikiazi dâŋ jazawec i manarâ tâpiri‐jeŋic fuawec.
9 Ehame irec faicnao Asiria ŋicwofuŋ Sanheribe e momorifâc‐ticne jaŋehec Lakisi hae somâckerâ fohuc Juda ŋicwofuŋ Hisikia â Judaŋic sasawa Jerusalem haeo jumbiŋ jaŋerao dâŋ ʒiŋuc muhuc kiŋaŋ qaqafâc‐ticne sorec‐jopawec:
10 “Asiria ŋicwofuŋ Sanheribe e ʒiŋuc mukac: ‘Ŋoŋe wemo wiacte manapie sâckeme ira roweckehuc Jerusalem haeo ŋeŋgopieŋ?
11 Hisikia e nânâ opâre hâmo sipiric eniŋte ʒiŋuc ŋazahuc eatuc‐ŋopakac hâcne: “Wofuŋ Anutu‐nâŋeczi Asiria ŋicwofuŋte meonec batarac‐nâpoocmu.”
12 Hisikia eki hâcne furu mâreŋ â alata‐ticne ŋerawec i hetâtie‐fârehuc Judaŋic â Jerusalem hae rune ʒiŋuc muŋarewec: “Alata mocjahare maŋfuŋko sawa fodapehuc irec faio taha bâzi‐ŋeŋic rikenʒepieŋ.”
13 Ŋoŋe no â mamac‐nane nâhe mâreŋ gâcnaonec ŋicne ŋicne wiac ejarepec i mi manaeŋgopieŋ me? Mâreŋ irec ŋic gurune gurune nemufâc‐jeŋic jaŋe nore meonec mâreŋ‐jeŋic moc rombiŋ me?
14 Mamac ŋosafâc‐nane jaŋe ŋic gurune gurune bâsirowec‐jopambiŋ jaŋere nemufâc jaŋeraonec moczi ŋicfâc‐ticne nore meonec moc batarac‐jopawec, irec ŋoŋere Anutuzi nore meonec sâcne batarac‐ŋopaocmu me?
15 Irec ŋoŋe Hisikiazi wiac iŋucnao eatuc‐ŋopame mi qâsorieniŋ â e mi mana ʒakieniŋ. Ŋic gurune gurune me uucmaŋne uucmaŋne jaŋere nemu moczi moc ŋicfâc‐ticne nore meonec me mamac ŋosafâc‐nane jaŋere meonec moc mi batarac‐jopawec, irec ŋoŋere Anutuzi wemocko nore meonec batarac‐ŋopaocmu?’ ”
16 Eme kiŋaŋ qaqafâc‐ticne jaŋe Wofuŋ Anutu â kiŋaŋŋic‐ticne Hisikia mana wahac‐jofahuc dâŋ muhuc jaha domambiŋ.
17 Eme Asiria ŋicwofuŋ e Israere Wofuŋ Anutu mu surec ecnehuc papiao dâŋ kecʒiŋuc muhuc qâreŋkewec: “Mâreŋ gâcnaonec ŋic gurune gurune jaŋere nemufâc jaŋe ŋicfâc‐jeŋic nore meonec mi batarac‐jopambiŋ iŋuc jaha Hisikiare Anutuzi ŋicfâc‐ticne menaneonec mi batarac‐jopaocmu.”
18 Eme jaŋe Jerusalem haere sac faio ŋic domambiŋ jaŋe hâhâwic hejarehuc hae i roniŋte manasurâ Judadâŋko owa kâcɋene owackembiŋ.
19 Ehuc mâreŋ sâc ŋicne ŋicne jaŋere nemufâc, ŋicmezi bakicne musoriŋ‐jopambiŋ irec sâc jaha wâc Jerusalem haere Anutu e musoriŋkembiŋ.
Wofuŋzi Hisikia batarawec
(Ŋic II 19:1–37; Jes 37:1–38)
20 Jaŋe iŋuc epie ŋicwofuŋ Hisikia â Amozire ŋokâ porofete Jesaja jahe wiac irec erâ Wofuŋ wira wâwâsic ecnepire nunumu‐jekiczi sambâŋko fewec.
21 Eme Wofuŋzi aŋelo moc soreme eki Asiria ŋicwofuŋte teuŋko fisirâ ŋic qac momori â micnefâc‐jeŋic â ŋic fekicne jopawec. Iŋuc fuame ŋicwofuŋ e mimi busâqoc faio mâreŋ‐ticnao risiewec. Risierâ nemu‐ticnere ufuŋko fehame e jahacne ŋokâfâc jaŋeraonec tucne jaŋe ʒikazi qâhâmombiŋ.
22 Wofuŋzi iŋuc hâcne ehuc Hisikia â Jerusalem haere ŋecjucfâc jaŋe Asiria ŋicwofuŋ Sanheribe â kisâfâc‐jeŋic jaŋere meonec batarac‐jopawec. Ehuc ŋifec â ŋifec ira wama sâko bâfua‐jarewec.
23 Eme ŋic bocjahazi Wofuŋte taha Jerusalem haeo bafisihuc Juda ŋicwofuŋ Hisikiare wiac furi sâko bafisimbiŋ wâc. Iŋuc ehuc dameŋ ira fuŋkerâ ŋic gurune gurune jaŋere ʒâŋe faio ʒâŋe biŋe‐ticne bafaharepie qaŋreŋko rahuc fowec.
Hisikia hucsâko bawec
(Ŋic II 20:1–11; Jes 38:1–22)
24 Eme dameŋ ira Hisikia e hucsâko bame hâmozo erâ fohuc Wofuŋ numucnewec. Eme Wofuŋzi manacnerâ ma moc bacnewec.
25 Hisikia eki ine maŋfefe juwecte ehâmocnekicne irec bubiaŋ manahuc okacne wiac moc mi ewec. Irec Wofuŋte kimbeŋzi Judaŋic â Jerusalem hae rune jaŋere faio fewec.
26 Erâ ine Hisikia e maŋfefe juju‐ticnere maname sâqoreha e jahacne â Jerusalem haere ŋecjucfâc jaŋe rumembiŋte Wofuŋte kimbeŋzi Hisikiare dameŋko fai‐jeŋicko mi fewec.
Babe mâreŋkonec kiŋaŋŋic Hisikiarao fisimbiŋ
(Ŋic II 20:12–19; Jes 39:1–8)
27 Eme Hisikia e araŋ bacnehapie mafa sâkohec juwec. Erâ e siliwa â gol â qânâ furi sâko â nânâ ba bâziziwec eere wiac â maro, erâ kuʒi râqâc furi sâko fuŋne fuŋne irec rowaŋfic barawec.
28 Erâ padi â waiŋ â wokemaŋ irec rowaŋfic barawec wâc, â lama bulimakao sapa fuŋne fuŋne ira fic barawec jaha.
29 Erâ wâc e jahacne hae bocjaha barawec â lama bulimakao guru sâko jucnembiŋ. Anutuzi wiac bocjaha jâmbâŋ tahackeme bajuwec hâcne.
30 Hisikia ekizia Gihoŋ opâre hata faicpec i hebâzickerâ fâreme Dawidire hae qizec ʒoaŋ huhunaopec ira huwec. Hisikia e gie sasawa iŋuc bahuc juhâc qâhâmowec.
31 Eme mâreŋ ira mâsi sasawa fua rawec irec mu indiŋ eniŋte Babe mâreŋkonec ŋic fekicne jaŋe kiŋaŋ fisimbiŋ; irec Anutuzi esâickerâ maŋticnao wiac sasawa fowec i manaocte Hisikia beheme bucticne juwec.
Hisikia hâmowec
(Ŋic II 20:20–21)
32 Eme Hisikiazi wiac sasawa ebac ewec â eehâmo gie bawec irec binaŋ i ʒeŋgoma Amozi ŋokâ‐ticne Jesajazi maŋne raruŋkeme wiac hone manac ewec irec papiao erâ Juda â Israe Ŋicwofuŋ jaŋere Papia Qizecko qâreŋke‐fârekicne.
33 Eme Hisikia e apa ŋosafâc‐ticne jaŋerao ʒuhuckehuc hâmome jaŋe Dawidi ŋokâfâc‐ticne jaŋere ʒâŋeruŋ gie heâŋko fowec ira duckembiŋ. Ehuc Judaŋic â Jerusalem haere ŋecjucfâc jaŋe qâŋɋâŋ‐ticnao fisi sâqorembiŋ. Ehame ŋokâ‐ticne Manasezi tucticne qarâ ŋicwofuŋ juwec.