25
Dawidi â Abigai jahere binaŋ
1 Juku Samue hâmome Israe ŋic jaŋe tumaŋnerâ ki mamakuc ehuc Rama haeo ficticnao jaha duckembiŋ. Eme Dawidi e faharerâ Paraŋ mâreŋ burocnao huwec.
2 Eme Maoŋ mâreŋko ŋic moc juwec, e giegaŋ‐ticne i Karamele haeo fowec. Erâ e lama bulimakao guru sâkohec juwec. E lamafâc‐ticne 3 tauseŋ jucnembiŋ â noniŋfâcne ine 1 tauseŋ domacnembiŋ. Eme e Karamele haeo lama kanʒaŋ bâtâcnehuc juwec.
3 Ŋic ere ʒaŋe Nabali â ŋonâŋ‐ticnere Abigai. Abigai e sahac hawari‐ticne biaŋne â mamanahec juwec, â ŋowe‐ticne Nabali e ine Kalebere soctofa, erâ e ŋic ʒâʒâicne â maŋʒoc‐ticne bembeŋne.
4 Eme Dawidi e mâreŋ burocnao juhuc ʒiŋuc mupie manawec: Nabali e lama kanʒaŋ bâtâcnehuc jukac.
5 Iŋuc manarâ ŋicfâc‐ticne jaŋeraonec 10 sorec‐jopahuc ʒiŋuc jazawec: “Ŋoŋe Karamele haeo ferâ Nabali bâfuarâ nore bubiaŋ dâŋ âzâcnenʒepieŋ.
6 Ehuc ʒiŋuc munʒepieŋ: ‘Go gahacne â wiacfâcge erâ wiacte wiac fogarekac sasawa ŋoŋerao wama â mazuc mâriri fofo dunduŋ jaha fozejec.
7 Go lama kanʒaŋ bâtâcnekomec iŋuc mupie manakopac. Eme lama soŋaŋfâcge jaŋe jucne mac nâŋehec jumbiŋ, ehame nâŋe mi bâʒâic‐jopambeŋ. Jaŋe nâŋehec dameŋ ʒora Karamele hae mâreŋko juhapie wiac moc mi sifucke‐jarewec.
8 I ŋicfâcge wio‐jaretec sâcne gazaniŋmu. Irec go ŋicfâc‐nane uruc ʒuhuc jaha rocjopazemec. Nâŋe dameŋ biaŋko wareŋgopeneŋte go kiŋaŋŋicfâcge â motecge Dawidi nâŋe wiac fogarekac sâc nârec.’ ”
9 Eme Dawidire ŋicfâc jaŋe Nabalirao fisirâ dâŋ i âzâcne‐fârerâ woŋec domambiŋ.
10 Eme Nabalizi Dawidire ŋicfâc dâŋ ʒiŋuc bâtikie‐jarewec: “Dawidi e mo? Isaire ŋokâ e mo? Dameŋ ʒi kiŋaŋ qaqa jaŋe bomboŋfâc‐jeŋic râpec‐jopa‐fâreŋgopieŋ.
11 No lama kanʒaŋ bâbâtâcfâc‐nane jaŋere poroŋ, opâ â qowi bâmockepac i wemocko mâreŋ mi manakopackonec warembieŋ ŋoŋe ŋarepemu.”
12 Iŋuc mume Dawidire ŋicfâc jaŋe risierâ dâŋ sasawa muwec i Dawidi âzâcnembiŋ.
13 Âzâcnepie ʒiŋuc jazawec: “Ŋoŋe ʒika‐ŋeŋic rofâreniŋ.” Eme ŋic jaŋe ʒika‐jeŋic rofârepie Dawidi e jahacne wâc iŋuc jaha ʒika‐ticne rowec. Eme ŋic 200 jaŋe mafa soŋaŋ ŋehapie 400 jaŋe Dawidi bâjâpepie rambiŋ.
14 Ehame ŋicmotec moczi Nabali ŋonâŋ‐ticne Abigai ʒiŋuc âzâcnewec: “Manakic, Dawidi e bomboŋ‐nâŋectao wiac moczi jauŋ piticne bacjopaocte kiŋaŋ sorec‐jopame fisipie owacke‐jarejec.
15 Ŋic i jaŋe biaŋne jâmbâŋ enârembiŋ. Nâŋe jaŋehec kâteo jumbeŋ dameŋ ira wiac i me i basahuc hume serereŋ me ʒâic busâqoc i mi bâfuambeŋ.
16 Nâŋe jaŋehec lama soŋaŋ‐jopahuc jumbeŋ ira jaŋe hâcne ŋafeo â ʒoaŋko sac sapa biaŋ enârehapie jumbeŋ.
17 Irec go dâŋ ʒi manarâ wiac weniŋuc jaha ecmu i mana wosâc ec. Ʒi wiac hâhâwicnezi bomboŋ‐nâŋec â wiacfâcne nâŋâcnao fuaocte manasupie fokac. Bomboŋ‐nâŋec e ine maŋʒoc‐ticnehec, irec moczi dâŋ sâcne mi âzâcneocmu.”
18 Iŋuc âzâcneme Abigaizi bâruŋ jaha poroŋ 200 â waiŋ ʒopo jajahec, erâ lama hezukicne 5 â jacgoŋ faŋfaŋkekicne gâcne, erâ waiŋ hândâŋ kereŋne makenehec 100 â jâmbo hândâŋzi poroŋ bakicne 200 iŋuc rorâ doŋgio râewec.
19 Iŋuc erâ ŋicmotecfâcne ʒiŋuc jazawec: “Ŋoŋe barâ bâniehapie ʒâhec fâpe.” E wiac ewec i ŋowe‐ticne Nabali moc mi âzâcnewec.
20 Eme ŋokac e doŋgi‐ticnao ferâ ŋehuc raku tiki râpenao huhame Dawidi â ŋicfâcne warepie bâfuac‐jopawec.
21 Dawidi e ʒiŋuc muhuctecne faharewec: “Nâŋe mâreŋ burocnao maŋgâŋ jaha ŋic ere wiac soŋaŋkehapene wiac moc mi sifuckecnewec. Eme e wiac biaŋnere okacne hehesic bâtikie‐narekac.”
22 Dawidi e iŋuc muhuc ʒiŋuc mupaŋkewec: “No hae fureme jaŋeraonec ŋic moc hetiripe juocmuo ine Anutuzi okacne bâmâmâckehuc enarezejec.”
23 Eme Abigaizi Dawidi honerâ bâruŋ jaha doŋgionec waharâ dapecnehuc ʒâŋe mai‐ticne mâreŋko hetutuckewec.
24 Ehuc kikefuŋnao fodaperâ muwec, “Bomboŋ‐nane, kiŋ i nore biŋe ezejec. Kiŋaŋ qaqage no mana‐naretec dâŋ muhape bomboŋ‐nane go mâc manazemec.
25 Bomboŋ‐nane, go maŋʒocŋic Nabalire manatec fârine mi ezejec. E ʒâŋe‐ticnezi mukac irec sâcko hâcne juekac, ʒâŋe‐ticne ‘Mutuc’, eme irec eebapa‐ticnezi mutucnea efârekac. Bomboŋ, go ŋic sorec‐jopameŋ i no nahac mi honec‐jopapo.
26 Bomboŋ‐nane, Wofuŋte maio â gore maio mujâmbâŋkekopac: Aaricgere okacne jarehuc soc kosa hohoŋke i Wofuŋzi qatara‐garewec. Eme kisâfâcge mecne â omaetec honecguzo ejarekac jaŋe mecne Nabalire sâc efârenʒepieŋ.
27 Eme bomboŋ‐nane, kiŋaŋ qaqage noni taha bawarepac ʒi ŋicfâcge jarezemec.
28 Bomboŋ‐nane, kiŋaŋ qaqage nore kiŋ behec. Go Wofuŋte ʒika gie bameŋte Wofuŋzi garikiŋfâcge basanaŋ‐jopame juranʒoŋgopieŋ. Go juhaŋte wiac mimicnezi mi maicguzejec.
29 Ŋic i me izi jâpecguhuc qâhâmocguzo eocmu ine Wofuŋ Anutugezi jujuge fosâockehuc e jahacne ʒeŋaŋko râezejec, â jujuge sipirickezo eŋgopieŋ jaŋere juju ine tacbaŋko qânâ râehuc qapene raekac iŋuc ezejec.
30 Eme Wofuŋzi mupaŋke‐garewec irec sâcko wiac biaŋne egarehuc Israe ŋic jaŋere micne bapa âkendâŋguocmu.
31 Eme bomboŋ‐nane, go gahac okacne kosa jarenʒaŋ me fuŋne tâmiricko soc hoŋkenʒaŋ irec manasurâ busâqoc â buʒâic fua‐garezac. Ʒi ine mi fua‐garezejec. Eme juku Wofuŋzi bomboŋ‐nane go ehâmo‐areme kiŋaŋ qaqa nore mac manasuzemec.”
32 Iŋuc mume Dawidizi Abigai dâŋ ʒiŋuc bâtikiecnewec: “Israere Wofuŋ Anutuzi miŋecgac sorecgume ware bâfuacnukicte e mumbiaŋkezo.
33 Erâ mamanasu biaŋge i mumbiaŋkezo, â go soc hoŋkehuc kiŋhec ezipore â aaric‐nanere fârine bâfuazipore aka henaremecte mumbiaŋguzo wâc.
34 Erâ Israere Wofuŋ Anutu e jukacte mi bâʒâicgupemurâ muacnuwec. Go fâro erâ norao mi fisinʒaŋ muzac ine hae fureme Nabalire ficko ŋic mocjaha mac moc mi jujâmbâŋkezac.”
35 Dawidi e iŋuc murâ Abigaizi wiac sasawa bafisiwec i rowec. Ehuc ʒiŋuc âzâcnewec: “Go wamao ficgao razemec. No dâŋge manahuc kio wâwâsicgere sâcko mana‐garekopac.”
36 Eme Abigai e risierâ Nabalirao fisiwec. Ehuc honeme Nabali e ficticnao ŋicwofuŋte tiwâ bâzi qaqane tinac e jahacne tiwâ bâzi sâko qame fisiwec. Eme opâ sanaŋ boc nâwecte ʒeri sâko bâfuawec. Eme e risierâ wiac ebac ewec irec biŋe i ŋowe‐ticne biac mi âzâcnewec, hae fureme sawa ine âzâcnewec.
37 Hae fureme waiŋte tâpiri fâre wahame ŋonâŋ‐ticnezi dâŋ sasawa i Nabali binaŋ bacne‐fârewec. Eme maŋticne gâckeme qânâ tinac erâ fowec.
38 Ehame ʒoaŋ gie bapa 10 tarame Wofuŋzi Nabali qame hâmowec.
39 Eme Dawidi e Nabali hâmowec irec biŋe manarâ ʒiŋuc muwec: “Wofuŋ e jahac mumusoriŋte okacne Nabali bâtiŋnekac, ehuc kiŋaŋŋic‐ticne no bahac bâfuazipore aka henarewec, irec e mumbiaŋkezo. Wofuŋ e Nabalire hehesic sasawa i bâtikieme e jahacne faio fekac.” Iŋuc murâ Abigaizi ŋonâŋ‐ticne ezac me mâcne, irec wiocneniŋte Dawidizi kiŋaŋ sorec‐jopame rambiŋ.
40 Raku Karamele haeo Abigairao fisirâ ʒiŋuc âzâcnembiŋ: “Dawidi e jowacgupene rarâ ŋonâŋ‐ticne ecmurâ sorec‐nâpojec.”
41 Iŋuc âzâcnepie faharerâ dapehuc ʒâŋe mai‐ticne mâreŋko hetutuckehuc muwec, “Kiŋaŋ naru‐ŋeŋic no kiŋaŋ qaqa moc erâ juhuc bomboŋ‐nanere kiŋaŋ qaqafâc jaŋere kike ʒuʒurere sâc ekopac.”
42 Iŋuc murâ Abigai e picpac jaha faharerâ doŋgi faio feme kiŋaŋ narufâcne 5 jaŋe qâtepie rambiŋ. E Dawidire kiŋaŋŋic bâjâpec‐joparâ raku fisirâ Dawidire ŋonâŋ ewec.
43 Dawidi e Jesere haeonec ŋokac moc ʒâŋene Ahinoam e wâc iŋuc jaha ŋonâŋ‐ticne rowec. Eme jahe mâmâc jaha ŋonâŋ jahec‐ticne epic.
44 Â ŋonâŋ‐ticne moc, ʒâŋene Mikali, e mamac‐ticne Saulo e jahac rorâ Laisi ŋokâ‐ticne Palati, Galim haeo juwec, e râcnewec.