28
1 Eme dameŋ ira Filisa ŋic jaŋe Israe ŋic jaŋehec qaqac eniŋte momorifâc‐jeŋic hetumaŋ‐jopambiŋ. Eme Akisizi Dawidi ʒiŋuc âzâcnewec: “Go ŋicfâcge ŋoŋe mâmâc ʒikao ranaŋmu iŋuc manapaŋkezemec.”
2 Iŋuc mume Dawidizi dâŋ ʒiŋuc bâtikiecnewec: “Sâcne, kiŋaŋŋicge e weniŋuc jaha eocmu i honezemec.” Iŋuc mume Akisizi muwec, “Sâcne, go sahac soŋaŋ‐nane raŋɋa raŋɋa jucmurâ âkendâŋgupemu.”
Saulozi Eŋdoro haeo faŋfaŋ ŋokac moc iqickewec
3 Samue e hâmome Israe ŋic jaŋe ki mamakuc eku Rama hae‐ticnaoa duckembiŋ. Eme Saulo e faŋfaŋdâŋ mumu ŋic â qaŋgecŋic jaŋe mâreŋ ira mi juniŋte mujarewec.
4 Ehame Filisa ŋic jaŋe tumaŋne‐fârerâ fisi Sunem haeo teuŋ âtembiŋ. Eme Saulo e wâc Israe ŋic hetumaŋ‐jopame fisi Giliboa tikio teuŋ âtembiŋ.
5 Eme Saulozi Filisa momori honec‐joparâ mâretec hâwickeme ɋarac ɋarac qawec.
6 Ehuc Wofuŋ mu wioc ecneme Wofuŋzi okacne guŋko me ɋâsâio me porofete jaŋere micko mi bâtikiecnewec.
7 Eme irec kiŋaŋ qaqafâcne ʒiŋuc jazawec: “Ŋoŋe faŋfaŋdâŋ mumu ŋokac moc bâfua‐narepie no erao rarâ mu wioc ezepac.” Iŋuc mume kiŋaŋ qaqafâcne jaŋe âzâcnerâ mumbiŋ, “Faŋfaŋdâŋ mumu ŋokac moc Eŋdoro haeo jukac.”
8 Iŋuc âzâcnepie Saulo e ŋaqi qoruc omane heme hume hawarine hetikieme ŋic jajahec rocjofame rambiŋ. Raku ŋafeo faŋfaŋdâŋ mumu ŋokac erao fisimbiŋ. Ehuc Saulozi muwec, “Go faŋfaŋdâŋ muhuc no nahac ŋic hâmokicne mocte ʒâŋe mupe e bârisie‐narezemec.”
9 Iŋuc mume ŋokaczi muwec, “Go Saulozi wiac ewec i mana‐fârekic. E faŋfaŋdâŋ mumu â qaŋgecŋic jaŋe mâreŋ ʒira mocwâc mi juniŋte muwec. Eme go wemocte hâmopemurâ juju‐nane doc bakomec?”
10 Mume Saulozi Wofuŋte maio mujomirecnehuc muwec, “Wofuŋ e jukacte wiac ʒirec bâbâtiŋzi gorao mi fisiocmu.”
11 E iŋuc mume ŋokaczi muwec, “Mo ŋic hefârepe wefuocmu?” Wiome muwec, “Samue jowa wefu‐narec.”
12 Eme Samuezi fuame honerâ ŋokac e owackehuc Saulo ʒiŋuc âzâcnewec: “Go wemocte eatucnumec? Go Saulo hâcne.”
13 Mume ŋicwofuŋzi ŋokac âzâcnerâ muwec, “Mi hâwicguoc, wemo wiac honekic?” Iŋuc wiome ŋokaczi âzâcnewec, “No nemu moc mâreŋmaŋkonec wefume honekopac.”
14 Mume ʒiŋuc muhuc wiocnewec: “Hawari‐ticne weniŋucne?” Eme ŋokaczi muwec, “Ŋic raŋɋa moczi wefukac, erâ ŋaqi ʒora moc rojukac.” Iŋuc mume Saulozi ʒiŋuc mana tarawec: I Samue. Ehuc fodaperâ ʒâŋe maine mâreŋko hetutuckerâ dape qâhâŋ ewec.
15 Iŋuc eme Samuezi ʒiŋuc âzâcnewec: “Go wemocte qâsifuc qanarehuc jowacnu wefumec?” Mume Saulozi dâŋ ʒiŋuc bâtikiecnewec: “No hume serereŋ sâkore maŋnao jukopac, Filisa ŋic jaŋe nohec ʒika qaŋgopieŋ â Anutuzi wâc râpecnuwecte dâŋ okacne moc porofete jaŋere micko me guŋko moc mi nazakac. Eme irec goki wiac weniŋuc jaha epemu i nazacmurâ hefârecgupac.”
16 Eme Samuezi muwec, “Wofuŋ e râpecgurâ kisâge ewecko go wemocte no wio‐narekomec?
17 Wofuŋ e nore micko dâŋ muwec irec sâcko hâcne egareekac. Ehame Israe uucmaŋ i gore meonec rorâ qomâge Dawidi râcnekac.
18 Go Wofuŋte mic reŋkehuc kimbeŋ sâko‐ticnere fârine Ameleke ŋic jaŋerao mi bâfuameŋte Wofuŋzi dameŋ ʒi wiac iŋucne hâcne egarekac.
19 Erâ Wofuŋzi go gahacne â Israe ŋicfâcge ŋoŋe Filisa ŋic jaŋere meo râec‐ŋopaocmu. Eme go â ŋokâfâcge ŋoŋe tomâcko nohec juniŋmu. Eme Wofuŋzi Israe momori jaŋe wâc Filisa ŋic jaŋere meo râec‐jopaocmu.”
20 Eme Saulo e Samuezi dâŋ muwec i manarâ hâwicke sâqoreme izia mâreŋko rândiŋke qarâ fowec. E ŋafe ʒoaŋ nânâ moc mi nâwecte betaŋkewec hâcne.
21 Eme ŋokac e Saulorao fisirâ hâhâwic âkohec fome honerâ ʒiŋuc âzâcnewec: “Manakic, kiŋaŋ naruge no dâŋge manarâ micge reŋkepemurâ juju‐nane qaisockepac. Ehuc mumec irec sâcko epac.
22 Irec go wâc kiŋaŋ naruge nore dâŋ manazemec. No nânâ piticne mac moc râe‐garepe nâqiŋnerâ hata ʒuhuckerâ razemec.”
23 Âzâcneme qikiŋnehuc muwec, “Mi nâpemu.” Eme kiŋaŋ qaqa jahecne â ŋokac jaŋe mâmâc ʒoɋac ecnepie dâŋjeŋic manarâ mâreŋkonec faharerâ ŋeŋeo ŋewec.
24 Eme ŋokac e bulimakao motecne wokemaŋ sâkohec moc domacnewec i picpac jaha qarâ hezuwec. Erâ poroŋ uucne gâcne rorâ jârickerâ goreŋ tâmiric rikewec.
25 Eme i Saulo â kiŋaŋ qaqa jahecne hejareme nârâ ŋafe ijaha fahare rambiŋ.