3
Wofuŋzi Samue wiracnewec
1 Eme Samue motec e Elire maŋfuŋko juhuc Wofuŋ kiŋaŋ qacnewec. Erâ dameŋ ira Wofuŋte dâŋ i riŋkoa sawa fuame manakicne â maŋbâwiŋ wâc boc mi fuawec.
2 Ehame Eli e dameŋ ira ʒâŋe‐ticne mâteŋkewecte sâcne mi fiwec. E fofo‐ticnao sawa fowec.
3 Anuture lambezi mi hâpohame Samue e Wofuŋte taha ufuŋko Anuture katapa ŋewecko waha guŋ fowec.
4 Fohame Wofuŋzi Samue wiracnehuc muwec: “Samue, Samue.” Eme Samuezi muwec, “No ʒi.”
5 Iŋuc murâ Elirao gasacke rarâ muwec: “Wira‐naremec no hâcne ʒi.” Mume Elizi muwec: “No mi wira‐garepac, go risierâ mocwâc foc.” Iŋuc mume Samue e risierâ mocwâc fowec.
6 Fohame Wofuŋzi mocwâc wiracnewec, “Samue.” Wirame e faharerâ Elirao rarâ muwec, “Wira‐naremec no hâcne ʒi.” Mume Elizi muwec, “Motec‐mae, no mi wirapac, go risierâ mocwâc foc.”
7 Samue e ine Wofuŋ biac mi mana tarawec â Wofuŋte dâŋzi wâc erao biac mi fua taniŋkewec.
8 Eme Wofuŋzi Samue wiracneme arec jahec â moc ewec. Eme fahare Elirao rarâ muwec, “Wira‐naremec no hâcne ʒi.” Wiwira iŋuc fuame Elizi ʒiŋuc mana tarawec: I Wofuŋzi motec wiracnejec.
9 Irec Elizi Samue ʒiŋuc âzâcnewec: “Rarâ foc. Ehame mocwâc wira‐gareocmuo ine ʒiŋuc muzemec: ‘Wofuŋ, dâŋ mutec manape; kiŋaŋ motecge no hazec râekopac!’ ” Iŋuc mume Samue e rarâ fofo‐ticnao waha fowec.
10 Eme Wofuŋ e fisirâ domahuc juwicnao wirawec iŋuc jaha wiracnehuc muwec: “Samue, Samue.” Eme Samuezi muwec, “Go dâŋ mutec manape; kiŋaŋ motecge no hazec râekopac.”
11 Mume Wofuŋzi Samue ʒiŋuc âzâcnewec: “Dameŋ mi ʒoraha no Israe guruo wiac epe mananiŋmu sasawa jaŋere hazecko qaqazuocmu.
12 Dameŋ i maickeme Eli â garikiŋfâc‐ticne jaŋerao mâsi bazo mupo i fuŋkerâ baku batarapemu.
13 Eli e sâqocne irec biŋe i manawec hâcne, irec no garikiŋfâc‐ticne mutara‐jarehuc bâtiŋ‐jopa sanaŋkepemurâ ʒi hâcne mufuacnekopac. E ŋokâ jahec‐ticne jahe Anutu mana wahapire moc mi hecke‐jactewec.
14 Irec no Eli garikiŋfâcne ʒiŋuc mupaŋke‐jarepo: Eli garikiŋfâcne jaŋere sâqocne i bâzi me tahazi moc mi bâtâmire‐jambâŋkeocmu.”
15 Samue e fohame hae fureme Wofuŋte ficmotâc rowec. Erâ Samue e maŋbâwiŋ ecnewec i Eli âzâcneocte hâwickewec.
16 Eme Elizi Samue hefârerâ muwec, “Motec‐nane, Samue.” Eki muwec: “No ʒi.”
17 Mume Elizi muwec, “Wofuŋ e wemo dâŋ gazajec? Go mi hesoŋke‐narec. Dâŋ sasawa gazajec irecnec moc hesoŋkecmuo ine Anutuzi kiŋge râeme fozejec.”
18 Irec Samue e wiac moc mi hesoŋkehuc mâmâc sasawa âzâcne‐fârewec. Âzâcneme Elizi muwec, “E Wofuŋ, irec wiac i me i ezo murâ ezejec.”
19 Wofuŋ e Samuehec juhame soka sanaŋ ewec. Erâ dâŋticne dopeckeme moc mi wahawec.
20 Ehame Israe guru sasawa, Daŋ mâreŋkonec raku Bere‐Seba mâreŋko fisikac jaŋe Samuere ʒiŋuc manambiŋ: E Wofuŋte porofete moc erâ juocte dope hutuŋ ecnekicne.
21 Eme Wofuŋ e dâŋticnere sâcko Silo haeo Samue fuacne jujec.