11
Dawidi â Batiseba jahere binaŋ
1 Ʒoaŋ dameŋ fuŋkeme ŋicwofuŋ jaŋe ʒikao rajumbieŋ. Irec Dawidi e Joabe â micnefâc‐ticne gâcne, erâ Israe momori sasawa sorec‐jopawec. Eme jaŋe rarâ Amoŋŋic jopahuc Raba hae somâckembiŋ. Dawidi e jahacne ine Jerusalem haeoa juwec.
2 Juku owâ gie mocko guŋ foweckonec faharerâ ficticnere bupuo ferâ ira rac warec ehuc ŋokac moc opâ ruahuc juha honewec. Ŋokac e sahac hawari‐ticne biaŋne jâmbâŋ.
3 Eme Dawidi e dâŋ râehuc ŋokac ere mu wioc eme ʒiŋuc âzâcnembiŋ: “Ŋokac ʒâŋene Batiseba, e Eliamte otâ, Hitiŋic Uria ere ŋonâŋ.”
4 Eme Dawidi e kiŋaŋ sorec‐jopame jaŋe ra jowa warepie ehec fowec. (Ŋokac e mosa huc ecneme tarame opâ ruawec hâcne.) Eme ŋokac e risierâ ficticnao rawec.
5 Risierâ juhuc kiwec fuŋkecneme Dawidirao dâŋ râehuc kiwechec ewec i âzâcnewec.
6 Eme Dawidizi Joaberao dâŋ râehuc muwec, “Go Hitiŋic Uria e soretec wareoc.” Iŋuc mume Joabezi Uria soreme Dawidirao risiewec.
7 Risierâ Dawidirao fisime eki Joabe â momori gâcne jaŋe weniŋuc jumbiŋ erâ ʒikazi weniŋuc jaha hatackewec i manaocte mu wioc ecnewec.
8 Erâ ficticnao sorehuc muwec, “Ficgao rarâ kikege ʒurec.” Iŋuc mume Uria e Dawidire fickonec waharâ razo eme taha wiac râecnewec.
9 Uria e ine ficticnao mi rahuc fekicne‐ticnere ficmotâcko kiŋaŋ qaqa jumbiŋ jaŋehec ŋec foc ewec.
10 Eme Dawidi ʒiŋuc âzâcnembiŋ: “Uria e ficticnao mi rajec.” Iŋuc âzâcnepie Dawidizi Uria ʒiŋuc âzâcnewec: “Go dameŋ ʒora jumeŋ, eme wemocte ficgao mi ramec?”
11 Iŋuc mume Uriazi dâŋ ʒiŋuc bâtikiecnewec: “Wofuŋte katapa â Israe ŋic â Judaŋic jaŋe bozeo foforâ juŋgopieŋ, erâ wâc fekicne‐nane Joabe â mume rereŋfâcne jaŋe mâreŋ taniŋnao foforâ juŋgopieŋ. Iŋuc juhapie no ficnaneo rarâ nânâ opâ biaŋne nâhuc ŋonâŋ‐nanehec sâcne fopemu? Jâmbomac jâmbâŋ, no i sâcne mi epemu.”
12 E iŋuc mume Dawidizi ʒiŋuc âzâcnewec: “Miŋecgac ʒi jaha juc, eme tomâcko râecgupe razemec.” Iŋuc âzâcneme Uria e ʒoaŋ jajahec ʒuhuckerâ Jerusalem haeo juwec.
13 Eme Dawidizi e jahacnehec nânâ nâocte hefârerâ ecneme waiŋ mâretec nâku maŋne bibiriwawec. Iŋuc ecneme sifu ficticnao mi rahuc ŋicwofuŋte kiŋaŋ qaqafâc jaŋehec jaha fowec.
14 Hae fureme Dawidizi Joabere papia moc qâreŋkerâ Uria râcneme barawec.
15 Papia ira dâŋ ʒiŋuc qâreŋkewec: “Ʒikazi boc ɋârâŋkeme honerâ ŋoŋe Uria ira behepie râsi jaŋe fisirâ qapie hâmozejec.”
16 Eme Joabe e hae somâckerâ fohuc Uria rorâ ŋic momori wânʒâŋ jumbiŋkopec râewec.
17 Eme hae rune jaŋe haeonec waharâ Joabehec qaqac embiŋ. Eme Dawidire momori gâcne jaŋe ʒika ira hâmombiŋ. Erâ Hitiŋic Uria e wâc qapie hâmowec.
18 Ehame Joabe e dâŋ râehuc ʒikare biŋedâŋ Dawidi âzâcne‐fârewec.
19 Erâ kiŋaŋŋic ʒiŋuc muhuc âzâcne sorec ewec: “Go ʒikare biŋedâŋ ŋicwofuŋ âzâcne‐fâretec
20 maŋʒoc‐ticne fahareme ʒiŋuc mecne muocmu: ‘Ŋoŋe qaqac eniŋte wemocte haeo jâmbâŋ rambiŋ? Jaŋe haesacko domahuc tepe qâtâcneniŋmu i mi manambiŋ me?
21 Jerubese ŋokâ‐ticne Abimelec e mozi qâhâmowec? E ŋokaczi padi qaqanʒaŋ qânâ moc sârockeme waharâ heme Tebezi haeo hâmowec i. Ŋoŋe haesac maŋfuŋko jâmbâŋ wemocte rambiŋ?’ E iŋuc mume ʒiŋuc âzâcnezemec: ‘Kiŋaŋ qaqage Hitiŋic Uria e hâmowec wâc.’ ”
22 Eme kiŋaŋŋic e raku Dawidirao fisirâ Joabezi âzâcne mutâc ewec sâc binaŋ bacnewec.
23 Ehuc muwec, “Hae rune jaŋe honec‐nâporâ sanaŋkerâ nâŋerao warepie nâŋe jopa jâpec ejare raku sacmotâcko fisimbeŋ.
24 Ehame tepeŋic jaŋe sacko domahuc kiŋaŋ qaqafâcge nâŋerao tepe qâtâcnembiŋ. Eme kiŋaŋ qaqafâcge gâcne hâmombiŋ â kiŋaŋ qaqage Hitiŋic Uria e wâc hâmowec.”
25 Iŋuc âzâcne‐fâreme Dawidizi kiŋaŋŋic ʒiŋuc âzâcnewec: “Go Joabe ʒiŋuc âzâcnezemec, ‘Go wiac irec maŋge mi rokaweoc. Ʒikazi ʒuhuckeme ʒuhuc fohuc ŋic ɋâcjopaocmu hâcne. Irec go tâpirihec jaha ʒika qahuc hae i heropiec!’ Iŋuc âzâcnehuc hâbi qacnec!”
26 Eme Uria ŋonâŋ‐ticnezi ŋowe‐ticne hâmowec biŋe i manarâ ere ki busâqoc ewec.
27 Eme ki busâqoc ehuc juwec i tarame Dawidizi kiŋaŋ sorec‐jopame ra jowapie warerâ ficticnao juhuc ŋonâŋ‐ticne ewec. Erâ ŋokâ‐ticne moc fuawec. Dawidizi mâsi ewec i ine Wofuŋzi honeme mi sâckewec.