6
Dawidizi Wofuŋte katapa bârisieocte rawec
(Bin I 13:5–14)
1 Dawidi e Israe ŋic bâwosâec‐jopakicne sasawa jaŋe mocwâc hetumaŋ‐jopame 30 tauseŋ ewec.
2 Eme Dawidi e ŋic i jaŋehec faharerâ Baali‐Juda haeo Anuture katapa ŋewec i roniŋte rambiŋ. Katapa irec faio hâcne Anutu Tâpiri Ɋuŋɋasaŋ Wofuŋzi kerubim jaŋere faicnao juekac ere ʒâŋe râekicne.
3 Eme jaŋe katapa i Abinadare fic tikio ŋewec irecnec rorâ keretac ɋâricnao râerâ barambiŋ. Eme Abinada ŋokâ jahec‐ticne Uʒa â Ahio jahe keretac ɋâricne i guriŋ bacnepire rawec.
4 Eme Abinadare fic tikio ŋewec irecnec keretac Anuture katapahec fâre wahapie Ahiozi bâniecnewec.
5 Ehame Dawidi â Israe ŋic jaŋe ʒeŋgoma ʒoɋachec jaha Wofuŋte maio gae hehuc kulele â gita â woŋgâŋ â kaŋkuc â wesic wiac‐jeŋichec domahuc ʒeri sâko embiŋ.
6 Eme jaŋe raku Nakoŋte padi qâqâmârâŋ tomao fisimbiŋ. Eme ira bulimakao jaŋe heguc qâguruc epie Uʒazi katapa i basanaŋkewec.
7 Uʒa e katapa bâuawecte Wofuŋzi mana gâpârecnerâ qame mai‐ticnoa hâmowec.
8 Eme Dawidi e Wofuŋte kimbeŋzi Uʒarao fua tâcnewec irec maname ŋemâckewec. Eme mâreŋ ŋondeŋ irec ʒâŋe Perese‐Uʒa mukicne, eme ʒâŋe i dameŋ ʒi fokac jaha.
9 Eme ʒoaŋ ira Dawidizi Wofuŋte hâwickeme ʒiŋuc muwec: “Wofuŋte katapazi wemocko norao sâcne fisiocmu?”
10 Irec Dawidi e Wofuŋte katapa i hae qizec‐ticnao râeocte mi afeckewecte rorâ bararâ Gitiŋic Obededom ere ficko râewec.
11 Eme Wofuŋte katapazi Gitiŋic Obededom ere ficko mosa jahec â moc ŋewec. Eme Wofuŋzi Obededom â wiacfâcne ehâmo‐jarewec.
Anuture katapa Jerusalem haeo barambiŋ
(Bin I 15:1—16:6)
12 Juku ŋicwofuŋ Dawidi ʒiŋuc âzâcnembiŋ: “Anuture katapare erâ Wofuŋzi Obededom â wiacfâcne, erâ wiac sasawa ehâmo‐jarekac.” Iŋuc mupie Dawidizi manarâ ʒeri sâko ehuc Obededomte fickonec Anuture katapa i ro barawec.
13 Eme Wofuŋte katapa reŋkembiŋ jaŋe kikezi âte rapie arec 6 eme Dawidizi bulimakao ŋicne moc â motecne moc iŋuc taha bawec.
14 Erâ Dawidi e taha bapa ŋaqi qaŋqaŋ moc heme hume tâpirihec jaha Wofuŋte maio gae wowec.
15 Ehuc Dawidi â Israe ŋic jaŋe ʒeŋgoma qeŋ qahuc aŋara herâ Wofuŋte katapa i bafembiŋ.
16 Eme Wofuŋte katapazi Dawidire hae qizecko fisime Saulo otâ‐ticne Mikali e qâqâtâc kataŋko firâ honeme Dawidizi Wofuŋte maio gae wohuc tarawec. Iŋuc eme ŋokac e maŋnezi ŋowe‐ticne qaisockewec.
17 Eme jaŋe Wofuŋte katapa i bararâ Dawidizi qoruc boze fârewec irec maŋnao hepie ŋewec. Ehame Dawidizi Wofuŋte maio qowi bâzi â wama bâzi rikewec.
18 Dawidi e qowi bâzi â wama bâzi i rike‐fârerâ Anutu Tâpiri Ɋuŋɋasaŋ Wofuŋ ere ʒâŋeo ŋic ŋokac jambuŋ‐jopawec.
19 Ehuc Israe ŋic guru dindiŋ tumaŋnembiŋ jaŋe ŋic me ŋokac buc buc poroŋ dadapic â qowi dâkâne â poroŋ waiŋ hândâŋhec bakicne i jarewec. Jareme tarame ŋic ŋokac jaŋe hae‐jeŋic sâc râwiŋnembiŋ.
20 Râwiŋnepie Dawidi e wiacfâcne mu jambuŋ ejareocte risiewec. Risiehame Saulo otâ‐ticne Mikalizi ra bâfuarâ ʒiŋuc muhuc âzâcnewec: “Ʒoaŋ ʒira Israe ŋicwofuŋ e mâsi fuŋmoc jâmbâŋ ejec. Ehuc kiŋaŋ qaqafâcne jaŋere kiŋaŋ naru jaŋere maio maŋ mamanasu tâmiric jaŋere sâcko mimi tâmiric jaha maŋticnere fuŋne bajaŋgeŋkejec.”
21 Iŋuc mume Dawidizi dâŋ ʒiŋuc bâtikiecnewec: “No mamacge â garikiŋfâcne jaŋere okacne rowosâecnuhuc Israe ŋic jaŋere fekicne jupemurâ âkendâŋnuwec Wofuŋ ere maio ekopac. Erâ no Wofuŋte maio ʒeri faio gae wohuc jupemu.
22 Erâ ʒuhuckerâ gore maio ʒâŋe biŋe‐nane bawahahuc jupemu, â kiŋaŋ naru jaŋere mumec, jaŋe ine mana‐narepie sâckeocmu.”
23 Eme Saulo otâ‐ticne Mikali e naru motec mi roro mâc juhame juku hâmoc dameŋ‐ticne maickewec.