8
Dawidizi uucmaŋ‐ticne bâsokawec
(Bin I 18:1–13)
1 Eme irec faicnao Dawidizi Filisa ŋic joparâ bawahuc‐jopahuc Metege‐Ama hae jowac rowec.
2 Erâ Moabi ŋic jaŋe wâc bawahac‐joparâ ejareme mâreŋko waha fohapie muczi sâc bacjopame muc jajahecte sâc embiŋ jaŋe qâhâmoc‐jopaocte muwec â muc ʒoricne mocjahare sâc embiŋ jaŋe ine juniŋte mujarewec. Eme Moabi ŋic jaŋe Dawidire rurumaŋko juhuc sahac taha wiac râcnehuc jumbiŋ.
3 Erâ Rehobore ŋokâ Hadadeze, Zoba ŋicwofuŋ hâcne, e mârâc jaha uucmaŋ‐ticnezi Eufrata opâo fowec i heɋâreocte rahame Dawidizi e iŋuc jaha bawahawec.
4 Erâ Dawidi e iŋuc ehuc becâsicko rara ŋic 1 tauseŋ 700 jâoc rowec â momori kikezi rarane 20 tauseŋ jâoc rowec. E iŋuc ehuc keretac fâfâre becâsic jaŋere rua hetâcnewec, erâ keretac 100 jaŋere sâc akic‐jopawec.
5 Eme Siria ŋic jaŋe Zoba ŋicwofuŋ Hadadeze bafickeniŋte Damasko haeonec fisipie Dawidizi Siria ŋic 22 tauseŋ qâhâmoc‐jopawec.
6 Iŋuc erâ Aram mâreŋko Damasko haeo ira momori râec‐jopawec. Ehame Siria ŋic jaŋe Dawidire rurumaŋko juhuc sahac taha‐jeŋic râcnehuc jumbiŋ. Eme Dawidi e ira me ira rawec sâc Wofuŋzi bafickehuc dopecke‐jâmbâŋkewec.
7 Erâ Dawidi e Hadadeze kiŋaŋ qaqafâcne jaŋe maro wiac golzi bakicne barâ jujumbieŋ i rorâ bara Jerusalem haeo râewec.
8 Erâ ŋicwofuŋ Dawidi e Hadadezere hae jajahec Beta â Berotai irecnec aeŋ bâbâroŋ bocjaha jâmbâŋ rowec.
9 Eme Hamati ŋicwofuŋ Toi e Dawidizi Hadadezere momori guru ʒeŋgoma bawahac‐jopawec irec biŋe manarâ
10 ŋokâ‐ticne Joram Dawidi bubiaŋ dâŋ âzâcneocte erao soreme rawec. Hadadeze e dameŋ sâc Toihec ʒika qahuc juwec irec. Eme Joram e siliwa â gol â aeŋ bâbâroŋzi wiac bakicne i barâ fisiwec.
11 Eme wiac i wâc Dawidizi Wofuŋte biŋe qahuc siliwa â gol gâcne, ŋicguru gâcne bawahac‐jopahuc jowac rorâ râe jujec ijaha ʒuhuckewec.
12 E ŋicguru ʒiŋuc jaŋeraonec wiac i rowec: Edom, Moabi, Amoŋ, Filisa â Amaleke, erâ Rehobo ŋokâ‐ticne Hadadeze, Zoba ŋicwofuŋ hâcne, eraonec wâc mâmâc rowec.
13 Dawidi e iŋuc ehuc ʒâŋe biŋe sâkohec ewec. Erâ Edomŋic 18 tauseŋ hâwec wâneŋko jopawec.
14 Iŋuc erâ hae‐ticnao risieocte ehuc Edom mâreŋ sâcke‐fârerâ momori râec‐jopawec. Ehame Edomŋic jaŋe Dawidire rurumaŋko jumbiŋ. Eme Dawidi e ira me ira rawec sâc Wofuŋzi kime dopec ecnewec.
Dawidire micnefâc jaŋere ʒâŋe
(Sam II 20:23–26; Bin I 18:14–17)
15 Dawidi e Israe ŋic jaŋere ŋicwofuŋ juwec. Ehuc ŋicfâcne sasawa wiac sâckoa ejarehuc mutiŋ bâtiŋ ejare jujec.
16 Ehame Zerujare ŋokâ Joabe e momori jaŋere micne juwec. Â Ahiludu ŋokâ‐ticne Josafata eki ine giedâŋ mujujec.
17 Ehame Ahitubu ŋokâ‐ticne Zadoko â Abiata ŋokâ‐ticne Ahimelec jahe ine taha bapa jupic. Â Serajazi ine qâqâreŋ ŋic juwec.
18 Ehame Jojada ŋokâ‐ticne Benaja eki ine Kereti â Peleti ŋic qaŋeŋ‐jopawec. Â Dawidi ŋokâfâcne jaŋe ine taha bapa jumbiŋ.