7
Wofuŋzi nânâ sowa burecne i qikiŋnewec
1 Dariusi e ŋicwofuŋ juhame jara 3 tarame mosa namba 9, ʒâŋene Kisilewo, irec gie bapa 4 maickeme Wofuŋte dâŋ Ʒekariarao fuawec.
2 Bete‐Sareze e Regemelec â ŋicfâc‐ticne jaŋe Wofuŋ bâmiriŋkeniŋte Jerusalem haeo sorec‐jopawec.
3 Erâ wâc Anutu Tâpiri Ɋuŋɋasaŋ Wofuŋ ere ufuŋko taha bapa â porofete jaŋe mâmâc ʒiŋuc mu wioc ejareniŋte sorec‐jopakicne: “Nâŋe jara bocjaha ki mamakuc ehuc sowa juwefumbeŋ sâc ijaha mosa namba 5‐ko ehuc junaŋte muŋgopieŋ me?”
4 Iŋuc mupie Anutu Tâpiri Ɋuŋɋasaŋ Wofuŋ ere dâŋ i norao ʒiŋuc fuawec:
5 “Go mâreŋ ʒirec ŋic ŋokac â taha bapa ʒiŋuc wio‐jarezemec: Ŋoŋe jara 70 irec maŋnao mosa 5 â 7 sâc sowa juhuc makuc bambiŋ i jâmbomac nore manasuhuc embiŋ me weniŋuc?
6 Me nânâ opâ nâ bac eeŋgopieŋ i ŋaŋacnere manasuhuc mi eeŋgopieŋ me?
7 Jerusalem â rârec rârec hae ŋerambiŋ jaŋe sesuctac fuarâ mi fombiŋ â Negebe mâreŋ erâ wâneŋko ŋic jufârembiŋ dameŋ ira Wofuŋzi dâŋ keci porofetefâc‐ticne micjeŋicko râeme mi ŋazambiŋ me?”
Micrereŋ tâmiric jumbiŋte kâpâcwâru bacjopakicne
8 Eme Wofuŋte dâŋ ʒi Ʒekariarao ʒuhuckerâ ʒiŋuc fuawec:
9 “Anutu Tâpiri Ɋuŋɋasaŋ Wofuŋ e ʒiŋuc mukac: Ŋoŋe ŋaŋackoaŋ mumutiŋ gie biaŋne bahuc maŋjauŋ eec erâ buuruchec junʒepieŋ.
10 Ŋoŋe hozec bekâ â ŋic jabane me hapetacne jaŋe fific mi bacjopanʒepieŋ, ehuc ŋaŋaczia eebapa sâqocne maŋzi manasu biric i wâc mi enʒepieŋ.”
11 Jaŋe ine dâŋnane i mananiŋte qikiŋnembiŋ, erâ maŋrâŋgeŋ juhuc hazec‐jeŋic bâbâzickembiŋ.
12 Jaŋe maŋsanaŋ epie maŋjeŋiczi buse iŋucne ewec; ehame Anutu Tâpiri Ɋuŋɋasaŋ Wofuŋ e mârâc jaha mumutiŋ â mumutâc dâŋ porofetefâc‐ticne jareme muhuc jumbiŋ i mana rereŋ mi embiŋ. Iŋuc epie Anutu Tâpiri Ɋuŋɋasaŋ Wofuŋ eki jaŋere boc aaricke sâqorewec.
13 Eme ʒiŋuc muwec: “No wira‐jarepe mi manambiŋ, irec jaŋe moc wira‐narepie no iŋuc jaha mi mana‐jarepemu.
14 No mâreŋ sâc ŋic furune jaŋere ŋondeŋko bâtâtiec‐jopapo; eme ratâmirepie mâreŋ‐jeŋic niniŋ siarereŋ fuarâ foha ŋiczi ira sicne fotâc mi embiŋ. Mâreŋ biaŋ‐jeŋiczi tuhutac fuarâ fowec hâcne.”