3
Jiysis Nup Chiŋgiy Nep, Gor Biynimb Suŋ-tep Nuk Mindeniŋgambay
1 Mam ay sikop. Nimbip minim bap sek aŋgniŋg gispiyn. Gor ker mindpim rek miñmiñ ginimimb. Minim nimbip nind aŋgnik ak, tip ak aŋgiyn aŋgen yip miker ma gip. Tip ak aŋgen mindrep geniŋgambim mey, chinup maŋgiysek tep giniŋgamb.
2 Bi nimbip kumbak tikiy nep, Gor biynimb nuk mindeniŋgambim aŋgiy, per yesek apay gok; nimbip gey apyap piknimimb rek ayip. Minim kiyk apay kun ak ma niŋnimimb.
3 Chin mey, Gor biynimb nuk yipund giy mindpun. Yenen: Kawnan nuk ak yip mindiy, Ñinuk Jiysis nup chiŋgiy tep gakniŋ mindpun ak, Gor biynimb nuk mindpun aŋgiy, niŋrep gipun.
4-5 Pen yand kumbak tikpay minim ak aŋgniŋg, kunep apnip. Yand bi Jiwda yipund giy. Yip tikiy ñin onep jiy ak mindiy, kumbak ak tikyak. Basind yes chin Yisrel, ñinuk kisen Benjamen kiñiŋ ak mey, yand mindpiyn. Pen Jiwda low minim apay ak; yand bi Peresiy mindenik rek, minim kun ak niŋrep giy mindyiŋgipiyn.
6 Jiwda minim chin kun ak, niŋdand amiy kalrimey jiwiy, biynimb Jiysis ker gok kuyip niŋiy, girimey yimb giyiŋgipiyn. Chin Jiwda biynimb low minim siskoy keykey apun gok niŋyiŋgipiyn rek, biyomb gok yip pen aŋgniŋgiy rek ma ayak.
7 Pen kisen gos niŋiy, giyiŋgipiyn ar kun ak niŋrep giy ma giyiŋgipiyn ak niŋiy, Krays nup chiŋgiyn aŋgiy, tap chin Jiwda kilrimey giyiŋgipun kun gok kirginik.
8 Pen tap yerer gipun, gos yerip yerip biynimb niŋbay gok niŋen, tap day day rek ayek; Gor nep yip Jiysis Krays bi nup bap aŋgnimuŋ aŋgiy, tap yikop gok kirgiy, nup chiŋgipiyn.
9 Jiwda low minim apay ar ak gen amnimuŋ ak pen, yergiy keynep giy, Gor bi suŋrep nuk mindeniŋgayn? Nop chinup gos tep ñek, Ñinuk nup gosimb niŋon mey, chinup dip. Biynimb gunap low minim ar ak gon amek, chinup diniŋgamb aŋgniŋgambay ak pen, maŋgiysek kindik giniŋgiy rek ma ayip ak, Gor kuyip yergiy niŋek, tep giniŋgamb. Biynimb Ñinuk nup dipay gok nep, biynimb suŋ-tep nuk mindeniŋgambay.
10-11 Kun ak kumiy tip ak tikjaknim gos ak yomb ginimuŋ aŋgiy, Krays chinup direp gip rek, niŋrep giyn aŋgiy niŋbiyn. Nuk kumiy kilis mindek, tikjakak ak niŋrep giy, tip miker yomb diyiŋg mindrep gak ak niŋrep giy; nuk kumak ñin ak, yand yip kumnik rek ayip ak, niŋrep ginim aŋgiy niŋbiyn.
Pol Mindrep Giyn Aŋgiy Nep Gos Niŋyiŋgip
12-13 Mam ay sikop. Krays Jiysis chinup biynimb nuk gok dak ak pen, gos yand niŋbiyn ak; Gor mindrep yimb ginimimb aŋgip rek, ma mindpiyn. Pen aŋgip rek mindenim aŋgiy niŋbiyn ak mey; giyiŋgipiyn ak sakiy giy, am Gor yip mindenim aŋgiy gen amjap.
14 Biynimb puŋgrikind yimb aŋgiy am tap wiyn giy dinjun apay gok, gos nokom kun ak niŋiy, kilis giy nep amiy mey, wiyn giy tap dipay. Kun ak rek, am Gor yip per mindenim aŋgiy, Krays nup gosimb nokom niŋiy, kilis giy gen amjap.
15 Chin biynimb Gor nup chiŋgrep gipun gok maŋgiysek, gos kun ak rek nep niŋjun. Pen minim ar gunap gos key niŋeniŋgambim, Gor nimbip gos yipund giy niŋep ak yomniŋgamb.
16 Pen minim tep niŋiy dipun gok pisnep diy, niŋrep giyiŋg gon amnimuŋ.
17 Mam ay sikop. Yand gipiyn rek gi dand amiy, biynimb kun ak rek gey amimb gok niŋiy, kuyip dinimimb.
18-19 Pen biynimb chin gipun rek ma gipay gok, kuŋay mindpay. Nimbip minim kun ak nind aŋgnik ak pen, miñiy kunep mindrep ma gipay rek niŋen, yip simb yimb gip. Gos kiyk key amimb rek gun aŋgiy, Gor nup kirpay. Kiyk nambiŋ ma diy, yimb kiyk keynep dand araniy, tap man ar biy nep gos niŋiy, Jiysis chinup aŋgiy kumak ak nup, miluk niŋbay rek, miñmon timey mon key yinjap ak amniŋgambay.
20 Pen miñmon chin ak, Gor miñmon biyoŋ. Biyomb chin Jiysis Krays biynimb simb niŋiy dip ak apiy, chinup dand miñmon kun biyoŋ amniŋgamb aŋgiy, kond mindpun.
21 Nuk Bi kalrimey yimb yerip yerip giniŋg, giniŋgamb. Chinup gek, mumbwak nindnimb kuyiŋg yowip ak kirgiy, mumbwak kisenimb tep nuk rek ak diy mindoniŋgambun.