12
Havi vayaꞋmoꞋya vaini* hoyaleꞋma yagaimainaya vayate avame kea humaine.
1 YisasiꞋa aepa heno avame kea mage huno hamapaiye nago kanomoꞋa vaini* nofi alaga hoya humaleteno kegiꞋya hugove humaleneno ani alagayagamo timaꞋa ayelatisigeno timaꞋamoꞋa tavino umaisia komua kafiteno yagaiꞋyama maisaya nona anafi kimaleteno alu vayafe ke huno “Etama hoyaꞋnile me yagaitama maineho. Ani nofiꞋmo alagafitila aye fako hutama nagoꞋa aliho.” huno humateteno alu kotega umaine.
2 Umaineno fuma nelea kanafina ani hoyamona nefaꞋa nagola aliꞋya kanoa hutegeno ani vaini hoyaleꞋma neꞋyagaiya vayatega alaga aligahe umaine.
3 VigeꞋya hoyaleꞋma neꞋyagaiya vayaꞋmoꞋya ani aliꞋya kanoꞋamona atafa huꞋya kaꞋyo amiteꞋya mage hae “Okamigahunagi kagaya eteka vuo.” huꞋya hageno eteno umaine.
4 Eteno vigeno hoyamona nefaꞋa alu aliꞋya kanoꞋa hutegeno viana aniꞋa huꞋya atafa huꞋya anu aliteꞋya tusiꞋa agaye hisifa kava hutenae.
5 Hutageno vigeno eteno alu aliꞋya kanoꞋa hutegeno ani hoyafi viana atafa huꞋya hayageno falimaine. Falitegeno hoyamona nefaꞋa kasagoꞋya aliꞋya vayaꞋyaga humategeꞋya vageꞋya nagoꞋa aliꞋya vayala amatafa huꞋya nehamaeꞋya nagoꞋa kuyafa neꞋamataleꞋya nagoꞋa tefa hamae falimainae.
6 MukiꞋa vageno hau ayamopafima nehaiya nafaꞋneꞋa agaiꞋage maigeno nefaꞋa mage huno hie “NafaꞋneꞋnimo kea havigahae.” huteno hutegeno haenagalafa ani hoyalega umaine.
7 VigeꞋya ani hoyafima yagaimainaya vayaꞋmoꞋya mage huꞋya hae “Mamona mani hoyamona nefa nafaꞋne. NefaꞋma falisigenofena mani nafaꞋnemoꞋa hoyaꞋa aligahianagita ago haegetao. Haesunageno falisigeta mani hoya tagai ya hapaegahie.” huꞋya hae.
8 HuteꞋya atafa huꞋya hayageno faligeꞋya augafaꞋa aliꞋya hoyafinagati ai halatu huꞋya malaga hagaꞋyu hutalenae.” huno hie.
9 Huteno YisasiꞋa mage huno hamavige “NaꞋa hayanagino hoyamona nefaꞋa hanaꞋa humategahie? Eno hoyaꞋafima yagaimainaya vayala tavata me hamaesigeꞋya faligahae. Fali haꞋno hisageno alu vayafe “Tamakaya hoyalela kava me yagaiho.” huno humategahie.” huno hie.
10 NagoꞋene YisasiꞋa mage huno hie “Manima Anumaya Koti avopima hanea kea ago hapalitama havimainao? Mage huno humaineane
‘VayaꞋmoꞋya yafa noma kiyana nago yafafena ‘Haviya humaine.’ huꞋya atalayanagi ani yafamoꞋa haenagaꞋa ‘TusiꞋa kanale yafanagino amakaseno haimainea yafane.’ huꞋya nomo ayetagenale malenae.
11 AnumayamoꞋa aniꞋa humaineanagita neꞋageta tusiꞋa kanale ya hane huta nehune.’ huꞋya kaemalenayane.” huno hie.
12 YisasiꞋa mani kea higeꞋya mono note kava vayaꞋmoꞋya “Mani avame kema hiana tagaife nehie.” huꞋya amakesa haviteꞋya mage hae “Avaleta kina nopi ategahune.” huꞋya hayanagi alitalu humainaya veafe koli huteꞋya Yisasina ataleꞋya umainae.
Sisana takisi monea amisao ifi oꞋamigahae?
13 NagoꞋa Falasia vayaꞋene nagoꞋa Heloti vayaꞋene humatageꞋya YisasiꞋma havigaya keleti ayevataga huꞋya atafa huꞋya haegahe Yisasi mainelega umainae.
14 UmaineꞋya mage huꞋya havigae “Humavenelina kanomogae tagaya ago havunana kagaya tamageꞋage kano mainane. Amakima hanea vayaꞋene amakima omale vayaꞋenefena nagoke katekeꞋya havi neꞋamamika kelamage nehuka Anumaya Koti kea tahanepainane. Takisi monema ataleyatela SisaꞋa kava kanomotega kanale atalesuno ifi oꞋatalesune? huꞋya havigae.
15 Hageno YisasiꞋa amakupinagama haviya kea ago haviteno “Vagala vaya mainetama amegati ke nehae. NaꞋa higetama nagaila ayenavataga hutama natafa hisaya yafena nahavinegae? Nagola alaga monea alitama me namigeꞋna agano.” huno hie.
16 HigeꞋya nagola alaga monea aliꞋya memigeno ageteno mage huno hamavige “Mani alaga monelela ta augosaene ta agiene hane?” huno hamavigegeꞋya “Sisa augosaene agiene hane.” huꞋya hae.
17 Hageno YisasiꞋa mage hie “Sisana agaiꞋa yana agaila amiho. Nagi Anumaya Kotina agaiꞋa yana agaila amiho.” huno higeꞋya ani kehena amamaꞋyo aimaine.
Satiusi vayaꞋmoꞋya falimainesafiti hetisaya yafe Yisasina havigemainae.
18 NagoꞋa Satiusi vayaꞋmoꞋya* Yisasitega emainae. Ani vayaꞋmoꞋya mage nehaya vayale “Falimainaya vayala eteꞋya heotigahae.” huꞋya nehaya vayale.
19 VayalegiꞋya Yisasina me havigeꞋya mage huꞋya hae “Humavenelina kanomogae MoseseꞋa tagaifena mage huno kaemaleneane ‘Nago kanomona nepuꞋamoꞋa nafaꞋneꞋa oꞋate kanoa aꞋama ataleno falinagenoꞋa aganaꞋamoꞋa ani aala aliteneno agoꞋma falimainea kanomofe anonaꞋa nafaꞋne atesie.’ huno kaemaleneane.
20 Nago kanafina seveniꞋa (7) konaga mainayanagino nepuꞋamimoꞋa aala aliteneanagino nafaꞋnea oꞋate kano maineno falimaine.
21 Falitegeno anile aganaꞋamoꞋa ani aala aliteana nafaꞋnea aniꞋa huno oꞋatenea kano falitegeno anile aganaꞋamoꞋa aniꞋa humaine.
22 MukiꞋa seveniꞋa (7) konagamoꞋya aliteme aliteme ayana nafaꞋnea oꞋateꞋya fali haꞋno hageno haenagalafa ani aala falimaine.
23 SeveniꞋa (7) konagamoꞋya ani aala alitenayanagi falimainesafitiꞋma hetisaya kanafina hana kanomo ani aala aligahie?” huꞋya havigae.
24 Havigageno YisasiꞋa mage huno hamapaiye “Anumaya Koti kefima kaemalenea kene tokiya yamaꞋaenefena havilama hutama ohaviya yafe tamakaya havi tamakesageꞋya nehaviye.
25 VeaꞋma falimainesafiti hetisaya kanafina ensole vaya kana huꞋya vemoꞋya aala oꞋaligahae. AꞋmoꞋyaenena vea oꞋaligahae.
26 Falimainaya veaꞋma eteꞋya hetisaya yafe nahavinegao? Mosese kaemalenea avopima ohapalinao? Nagola osi yosaleꞋma ala ata anefela leanagi ani osi yosa otene.” huno kaemalenea kea ohavinao?
Anumaya KotiꞋa ani kanafina Mosesefena mage huno humaineane “Nagaya Apalahamunagi Aisakinagi Yekopugami Anumaya mainoe.” huno humaineane.
27 Ani anagala falimainayanagi “Nagaya Anumaya KotiꞋamimoꞋna mainoe.” huno humainea yafena amaku amamemoꞋa ofalinegi afaꞋa mainaya yafe ani kea humaine. Tamakaya veaꞋmoꞋya heꞋotigahae hutama nehaya kea havige nehae.” huno hamapaimaine.
Anumaya Kotina hagoteno tokiyaꞋage kahegi keꞋae.
28 Nago kanoa kahegi kema havilinea kanomoꞋa anile eno huge havige haya kea haviana YisasiꞋa kanale kema huhaleno hamapaiya kea me haviteno Yisasifena mage huno havige “Anumaya Koti kahegi kefitila hana kemo mukiꞋa kemona agaseno uhagoteno tokiyaꞋage kea hane?” huno havige.
29-30 Havige-geno YisasiꞋa mage huno hie “Uhagoteno tokiyaꞋageꞋma humainea kemoꞋa mage huno humaine
‘Isaleli vayala* haviho AnumayamoꞋa tagaiti Anumaya KotiꞋa agaiꞋage mainegi nagoꞋa Anumaya omaine. Kagaya Anumaya Kotikamofena kahau kayamopafina tokiyaꞋage huno kahaino. MukiꞋa kagesama havisana yaꞋene kagu kamema havisana yaꞋene aliꞋya neꞋalina kayamufaene tokiyaꞋage huka Anumaya Kotina amio.’
31 Anile nago kea mage huno humaineane
‘MukiꞋa vayafena tusiya huno kahau kayamopafi kahaino. Kagaika kaugafahema kahaisia avamete aniꞋa huno alu veaꞋmogami amaugafahena kahaino.’
Menima tole kema kahapauva kemoꞋa mukiꞋa Anumaya Koti kahegi kemona ago amakasemainea ke hane.” huno hie.
32 Higeno ani kahegi kema havilinea kanomoꞋa Yisasifena mage huno hie “Humavenelina kanomogae tamage nehane. Nagoke Anumaya Koti mainegi nagoꞋa Anumaya Koti omaiye.
33 Omaigi tagaya mukiꞋa tahau tayamopafi tokiyaꞋage huno tahaisigeta mukiꞋa tagesama havisuna yaꞋene tagu tamema havisuna yaꞋene aliꞋya neꞋaluna tayamufaene tokiyaꞋage huta mukiꞋa Anumaya Kotina amisune. Amiteta mukiꞋa veafena tahau tayamopafi tahainageno tagaiti laugafahema tahaisia avamete aniꞋa huta alu veaꞋmogami amaugafahena tahaisie. NaꞋama hisuna yamoꞋa mukiꞋa alu kavala amakasemaine. Nayona veaꞋmoꞋya ‘Anumaya Kotina muse yana neꞋamune.’ huꞋya nagola sipi sipi heꞋya neꞋamiꞋya nago sipi sipia atafi kae salaꞋmana aineꞋataleꞋya nehaya yamona menima kahapauva kemoꞋa ani kavala ago agasemaine.” huno hie.
34 YisasiꞋa anima huhalenoꞋma hia kea haviteno “HaviꞋyamaꞋaene kano maineafenagino nahapaiye.” huno agesafinaga haviteno kenonaꞋa mage huno hie “Ani kema hana kemoga aupaꞋa Anumaya Kotife ‘Kava yagainato.’ huka hugane.” huno hie. HigeꞋya vayaꞋyagamoꞋya haviteꞋya koli huꞋya Yisasina nagoꞋene haviokenae.
YisasiꞋa Anumaya Kotima hutenea kanohe veaꞋmogami hamavige.
35 YisasiꞋa ala mono nopi mo humavenelino mage huno hamavige “Kahegi kema havilinaya anagaꞋmoꞋya naꞋa higeꞋya Kalaisifena, ‘Anumaya KotiꞋa hutenea kanomofena Tevitina aginagomoꞋa mopale kano maine?’ huꞋya nehae.” huno hamavige.
36 Hamavinegeno mage hie “TevitiꞋa Anumaya Kotina Alu Aotage Avamumo hapaiya kea mage huno humaineane
‘Anumaya KotiꞋa Anumaya-niꞋamofena mage huno humaine ‘Tamaga nayatega, ala vaya mainalega hanea siale emainesanageꞋna kame vayakaꞋa kaiyafinaga amatesugeꞋya kagaife ‘Ago tagasane.’ huꞋya hugahae.’ huno kaemaleneane.
37 TevitiꞋa Kalaisife ‘AnumayaniꞋa mainane.’ huno humainegi naꞋa higeno TevitiꞋa haenagama atesia aginagomofena ‘AnumayaniꞋamoga mainane.’ huno humaineane?” huno hamavige. HigeꞋya mukiꞋa alitalu humainaya veaꞋmoya Yisasi kea haviteꞋya tusiꞋa muse hae.
Kahegi kema havilinaya anagaꞋmoꞋya kefo yaꞋene nehaya vayale.
38 YisasiꞋa hamapaiya kefiti mage huno hamapaiye “Kahegi kema havilinaya anagafena kaꞋyeho. Ani vayaꞋmoꞋya ayaꞋaya kena failiya yafena ‘Nelagafi notagafi?’ huꞋyama haya yafena tusiya huno nehamaiye. Vaya atagu nefaya kumapi mo vaiyatete nehuꞋya ‘NaꞋa vaya mainae.’ huꞋya ‘Ali falu fala hulatesae.’ huꞋya nehae.
39 Mono nopiꞋene imuleꞋene ‘Ala vayaꞋageꞋma nemaiya sialekeꞋya maigahune.’ huꞋya nehae.
40 Ani vayaꞋmoꞋya keto aꞋneyagahena ‘Mono nopima atalesaya monea tamiho.’ huꞋya nehuꞋya noꞋamifima hanea yaꞋyaga musufaya huꞋya moneꞋamia ali haꞋno nehaya vayalagiꞋya. VayaꞋyaga ayemavataga huꞋya ‘Kanale vaya mainae.’ huꞋya hisae huꞋya ayaꞋaya nunamu nehayane. AniꞋama nehaya vayaꞋmoꞋya havi miyana tusiya huno amaugafa amagata aisia yaꞋene aligahae.” huno hie.
MoneꞋa omale aꞋmoꞋa Anumaya Kotitega muse yamaꞋa atalene.
41 YisasiꞋa mono nopi mone neꞋatalaya kaiyaga maineno monema atalaya veala amakeana moneꞋamima hanea veaꞋmoꞋya “Monetia Anumaya Kotina amigahune.” huꞋya ala mone pokisifina atalenae.
42 Atalageno nagola moneꞋa omale keto aꞋmoꞋa tole osi haesa monea metalene. Ani haesa yafatalamogania tokayaꞋagenoꞋa vani toya kana humaine.
43 YisasiꞋa ani yana ageteno agaiꞋaenema tokaeꞋya nemaiya anagafe ke higeꞋya ageno mage huno hamapaiye “Nagaya tamagelafa huꞋna tamahanepauve ma ma moneꞋa omale keto aꞋmoꞋa hagoteꞋyama metalaya veaꞋmogamina amakaseno ala mone metale.
44 Metaleneanagi moneꞋamima hanea veaꞋmoꞋya aliꞋyamaꞋa omalenea monegiꞋya havigu malenaya monegiꞋya afaꞋa metalayanagi ani aꞋmoꞋa mukiꞋa yamaꞋa ali haꞋno huno metale. MukiꞋa kaveꞋama alino nesia moneꞋa mukiꞋa alino metale.” huno hie.