7
Anumaya Koti kahegi kemoꞋa tototimogami kemona agasemaine.
1 NagoꞋa Falasia vayaꞋene kahegi kema havilinaya anagaꞋene Yelusalemuti Yisasite emainae.
2 EmaineꞋya agayana nagoꞋa YisasiꞋene tokaeꞋya nemaiya anagaꞋmoꞋya amayana sese ohuꞋya kavela nenageꞋya amakemainae*.
3 Falasia vayaꞋagela omainagi mukiꞋa Yuta veaꞋmoꞋyaene amakinagomoꞋya humainaya kava akave maleꞋya amayama seseꞋma ohayana kavela onenagi sese huteꞋyage nenae.
4 Situatega ugeꞋyama enuꞋya tima ofalesayana onegahagi tina faleteꞋyage amaugafamoꞋa hilato hutegeꞋya kavela nenae. Ani yamaꞋagelomagi nayona vayaꞋmoꞋya kahegi kea tokiyaꞋage huꞋya humainaya kehe haviꞋya masuene yopaene susufanene mukiꞋa sese nehae.
5 Falasia vayaꞋene kahegi kema havilinaya anagaꞋene Yisasife mage huꞋya me hae “NaꞋa higeꞋya kagaiꞋenema tokaeꞋya nemaiya anagaꞋmoꞋya taginagomogami kavala neꞋataleꞋya ani kea atagaeꞋya kaveꞋma negahena amayana sese nohae?” huꞋya havigae.
6 Hageno YisasiꞋa kenonaꞋamia mage hie “Tamakaya vagala vaya mainae. AisaiyaꞋa Anumaya Koti aune kanomoꞋa tamakaifena tamage huno Anumaya Koti autaꞋmafina mage huno humaineane
‘Ani nofi veaꞋmoꞋya amavayaleti huꞋya nagai nagia alisaga nehayanagi amakuꞋamoꞋa alulega hanegeꞋya aniꞋa kavala nehae.
7 Amakaya ma mopafi veaꞋmogami amavayafiti humainaya kahegi kehe mage humainayane ‘Mani kea Anumaya Koti ke hanegi akave maleho.’ huꞋya humainayanagi nagai nagia alisaga hisaya kavala ohuꞋya afa kava maiꞋya nehae.’ huno kaemaleneane.
8 Anumaya Koti kahegi kea ataletama veaꞋmoꞋya malenaya kea akave nemalae.
9 Huteno nagoꞋene mage huno hie “Tamakaitami tamakinagomogami kavaꞋma akave nemalaya yafe Anumaya Koti kahegi kea ago atalenae.
10 MoseseꞋa mage huno humaineane
‘Tamakaya itatami afotamimogami amakia alisaga nehutama keꞋamia veganokanola ohutama amaiyaꞋafinaga maiho. NagoꞋa veaꞋmoꞋya itaꞋafoꞋamimogamima kamugema vaimatesayana faligahae.’ huno humaineane.
11-12 Humaineanagi tamakaya mage hutama hae ‘Nago kanomoꞋa itaꞋafoꞋamogani anaya hisia monema hanesigenoꞋa itaꞋafoꞋamoganina anayama ohinunoꞋa mage huno hisie ‘Ani monea Anumaya Kotina amisua yane huꞋna humainoe.’ huno hinunofena itaꞋafoꞋamoganina nagoꞋene anayama ohisiana kanalele.’ hutama nehae.
13 Ani kema haya yafe tamakinagomogami kavala akave malenayafe Anumaya Koti kehena ‘Afa yane.’ hutama mukiꞋa ani kavala nehae.” huno humaine.
VeaꞋmogami amakuꞋafima oniꞋyaꞋage nehamaiya yane.
14 YisasiꞋa kasagoꞋya veala agaite esaya yafe nagoꞋene ke higeꞋya ageno mage huno hie “Tamakaya mani kea havilama hutama haviho.
15-16 NagoꞋa nesaya yamoꞋma tamavayafi visia yamoꞋa tamakuꞋafina oniꞋya otamahaugahigi tamakuꞋafitiꞋma hatilavisia yamo ali falote hisigeno tamakuꞋamoꞋa oniꞋyaꞋagela hugahie.” huno hie.
17 Huteno neꞋamataleno nopinaga haino mainegeꞋya agaiꞋaenema tokaeꞋya nemaiya anagaꞋmoꞋya Yisasife mage huꞋya hae “Kagaya mani avame kemona aepaꞋa hugeta havimano.” huꞋya havigae.
18 Havigageno YisasiꞋa mage huno hie “TamakaiꞋenena havilama ohutama nehao? Tamakaya ohavinao mukiꞋa yana tamavayafima nesaya yamoꞋa oniꞋya otamahaugahie.
19 Tamavayafi nayaꞋamoꞋa tamakuꞋafina oꞋuno afaꞋa tamaipafike taviteno haenagaꞋa aifayolagafina taviteno afa ya kana nehie.” huno hie. Mani kema hiana mukiꞋa kavela afaꞋa nesaya kavekeꞋya hane huno hie.
20 Huteno mage huno hie “NagoꞋa yama tamavayafitiꞋma hatilavisia kemoꞋa tamakuꞋamona alino oniꞋyaꞋage nelamahaiye.
21-22 VeaꞋmogati taguꞋafitiꞋma efalote hia yamoꞋa maꞋa huno ali falote nehie kanale ohunea tagu tagesa nehavuna yaꞋene aꞋne munaꞋnene kumai he yaꞋene musufaya hu yaꞋene vaya hamaefali yaꞋene alu kanomo aꞋne amavayu hu yaꞋene alu kanomo yafe age haꞋye hu yaꞋene kefo yaꞋene havige huno savale savala hu yaꞋene age lamahaꞋye nehaya yaꞋene veamogami taipa havita haviya huneꞋamatona yaꞋene veafe havige humate yaꞋene taugafa alita hai yaꞋene kema ohavi yaꞋene taguꞋafitila ali falote nehie.
23 MukiꞋa ani kefo yama nehaya yana tamakuꞋafiti efalote hia yamo tamakuꞋafina oniꞋyaꞋagela humaine.” huno hie.
Fonisia kotega aꞋmoꞋa Yisasina aguꞋa amitafa humaine.
24 YisasiꞋa ani kumala neꞋataleno Taiya kumaꞋmo kaiyaga umaineno agaiꞋama anileꞋma emainea yafena veaꞋmoꞋya ohavisae huno nago nopi haino maiyanagi afaꞋa agaiꞋa falaꞋokigahie. VeaꞋmoꞋya ago haviye.
25 AupaꞋa nago aꞋmoꞋa Yisasi avagea haviteno eno aiyafi aleꞋya meyemaine. Ani aꞋmo munaꞋmona agupi Kefo Avamula mainea alagino.
26 Isaleli vea omainea alagino Kaliki ke nehuno Fonisia nofi ale. Silia kotega alagino munaꞋamona agupi mainea Kefo Avamu* anatitalesie huno aukaꞋya huno havige.
27 YisasiꞋa mage huno hie “NafaꞋnemoꞋya hagoteꞋya kavela negahae. Havigu nafaꞋnemogami kavela hamanafaleta kalayagamogami amamisunana haviya hugahie.” huno hie.
28 Higeno ani aꞋmoꞋa mage huno hie “Anumayamogae tamage hananagi nafaꞋnemoꞋya nenageno osi atupaꞋa sipaleti asaga hulavia yana kalamoꞋya yogiꞋya nenae. Kagaya ani kava huka nagaya Isaleli a omainoanagi osiꞋa nahaꞋmao.” huno hie.
29 Higeno YisasiꞋa ani afena mage huno hapaiye “KekaꞋa ago hanageꞋna havuafe nokalega vuo. Kefo AvamuꞋmoꞋa munakamona ago ataleno vie.” huno humaine.
30 Higeno nomaꞋalega viaꞋamo mogeana Kefo AvamuꞋmoꞋa ago ataleno vigeno munaꞋamoꞋa kanale huno sipale faemainegeno itaꞋamoꞋa mogemaine.
YisasiꞋa nago aifo kanomo agesaene avayaene alino kanale hutene.
31 YisasiꞋa Taiya kumala ataleno aiyahae huno Saitoni kumala agaseno viaꞋamo teniꞋa (10) kuma hanelega mogaseno Kalili ti agegayalega uvaꞋyi humaine.
32 UvaꞋyi higeꞋya veaꞋmoꞋya nagola yuna aifo kanoa Yisasitega avaleꞋya vayana ani aifo kanomoꞋa hagifali ke nehatagegeꞋya Yisasife mage huꞋya hae “Augafale kayateti avate hisane.” huꞋya havigae.
33 YisasiꞋa ani kanoa neꞋavaleno veala amataleno faitega anakaiꞋanige umaineꞋana aya avoyaleti aifo kanomona agesafi vaiteno avetuꞋna heno ayateti avefuꞋnale avatemalene.
34 Malegeno anafinaga agesaga huno “Vaeha ausoꞋnio.” huteno agaifena agaiꞋa kefiti mage huno hie “Efata.” huno hie. Tagai kefina “Kagesa akalo hino.” huno hapaiye.
35 Higeno agesamoꞋa akalo higeno avefuꞋnamoꞋa kanale higeno aikalo huno kea kea hie.
36 YisasiꞋa mage huno hie “NagoꞋa veala mani yafena hamaꞋopaiho.” huno kahegi mateanagi ani kea huꞋya atile male huꞋya mukiꞋa veaꞋmogami amakesale mohu mehu humainae.
37 HageꞋya haviya veaꞋmoꞋya tusiꞋa amamaꞋyo aigeꞋya mage hae “MukiꞋa yana aligeno kanale kanale nehie. Yuna aifo vayala aya malegeꞋya kea nehaviye. Aifo vayala keꞋamia ali falote huneꞋamamie.” huꞋya nehae.