13
Lachutukan Ya Libuun Cha Barnabas Kan Saul
1 Cha mamatiʼd Antioch, awed cha uchum un propeta ya mimistulun chi ugud Apudyus. Chicha cha Barnabas, Simeon un ngadloncha Niger, Lucius un iCyrene, si Saul ya si Manaen un silulud Gubillachuɏ Herod.
2 Si osaʼn eɏgew un manchaychayawancha kan Apudyus ya lallaulancha, imbyegan chi Ispiritun Apudyus kan chicha, “Chutukanyu cha Barnabas kan Saul ti chicha pililiyak un mangwa si kawachiʼn imbilinku kan chicha.”
3 Lagamputcha pun lallaun ya lalluwalu, impataycha imacha kan chicha ot imbuuncha chicha.
Cha Barnabas Kan Saul Ud Cyprus
4 Ot imbuun chi Ispiritun Apudyus chicha ot ummoycha ud Seleucia ot lanlugencha si bapur un umoy ud Cyprus.
5 Gummatongcha pun ud Salamis un osaʼn ili ud Cyprus, imbyegbyegacha ugud Apudyus si sinagogan cha Judio. Inyawitcha si John Mark ta tumuɏung kan chicha.
6 Gilaggaggakaycha ili-ili ud Cyprus inggala gummatongchaʼd Paphos. Udchi langabtancha si osaʼn Judio un mansalsalamangka un mangngachen Bar-Jesus. Si Bar-Jesus ked imbilangla chi long-egla un propeta ulay lu chakampun.
7 Siya kadwan Gubillachuɏ Sergius Paulus. Ha Gubillachuɏ ked lalaing un tagu, impaayegla cha Barnabas kan Saul ti piolaʼn chongɏon chi ugud Apudyus.
8 Ngim si Elymas un mansalsalamangka, (ti hachi ngachenla si ugud un Griego) ked siluplingla chicha ot pilachaslaʼn tilipod si Gubillachuɏ ta achipun mamati kan Jesus.
9 Ngim si Saul, un mangngachen bo Paul, laidchen si kilabyelin chi Ispiritun Apudyus ot intutukeɏla si Elymas
10 ot kalala, “Sika un alak Satalas, sika kabusuɏn cha losan un kilalintog. Amod chi sikaplu ya man-uyu-uyungka kan cha asintatagum ya pasiglu mambyalilon tilutuli cha katuttuwaan un ugud Apudyus.
11 Si sala chusaon Apudyus sika ked makuɏapka ked achipunlu maila ilit si pigan eɏgew.” Si hachi, kakma latap-ulan chi atala si mangngitit un libuu ot lanchawachawawong un mansingit si mangiwid kan siya.
12 Intullong pun chi Gubillachuɏ lakwa, lamati kan Apu Jesus, ti laschaaw si intudtuchucha mipanggop kan Apu.
Cha Paul Kan Barnabas Ud Antioch Un Sakupon Chi Pisidia
13 Oli pun ummoyon cha Paul ya kakadwala ud Paphos ot lanlugencha si bapur un umoy ud Perga, osaʼn ili si probinsiyan chi Pamphylia. Gummatongcha pun udchi, tilelan John Mark chicha ot langulin ud Jerusalem.
14 Ngim intuɏuycha ummoy ud Antioch un sakupon chi Pisidia. Si eɏgew chi Sabyechuʼn man-illongan cha Judio, ummoycha si sinagoga ot makaamuycha kan chicha.
15 Lagamput pun libyasa lintog Moses ya inggilin cha propeta, awed impaibyegan chi pangat chi sinagoga kan cha Paul un kalala, “Susulud, lu awed ugud un malegegyu kan cha allaʼn tagu, kewayu ta ibyegayu.”
16 Ot summiked si Paul ot impangatula imala ta gumilokcha. Ot kalala, “Susulud un iyIsrael ya chikayuʼn Gentil un manchaychayaw kan Apudyus, kewayu ta chongɏonyu chi ibyegak!
17 Ha Apudyus cha taguʼd Israel chi lamili kan cha chachakkeɏ taku ot lambyalilola chicha chakeɏ un ili. Si illinggewanchaʼd Egypt un chakampun si ilicha, bilinchisyulala chicha ot ummachu-achucha. Ot impeɏawala chicha si hachiʼn ili mipagapu si pallakabyelinla
18 Si inggewancha si lugeɏʼn lappun ummili si opat puɏuʼn tawon, ilalu-alusala chicha ya ilay-ayyuwalala chicha.
19 Gummatongcha pun ud Canaan, ilabyakcha pituʼn nasyun un inggew udchi ot illidchola pitacha un mallaksuncha.
20 “Lakwa losan cha alla si lummaus un opat gasut ya limampuɏuʼn tawon. Lagamput pun, illidchela chicha si cha kuis un langituray kan chicha inggala si timpun Samuel un propeta.
21 Oli pun lanchawatcha si Ari ot illidchola si Saul, un alak Kish un galak Benjamin. Ot lan-Ari si opatpuɏuʼn tawon.
22 Ngim kilaan Apudyus siya, ot chilutukala si David un man-aricha. Ot kalan Apudyus, ‘Si David, un alak Jesse chi ay-ayatok ti koola losan un piok.’
23 Si David chi singgalak kan Jesus un imbuun Apudyus ta siya Malagu kan chitaku un galak Israel, un siya ingkarila.
24 Sakbyey un lallugi si Jesus si kawachila, inggew si John un lambyegbyega kan cha losan un iyIsrael un masapuɏʼn mambyabyawicha kan cha byasuɏcha ya mampabunyegcha.
25 Alla pun un magamput chi kawachin John, kalala kan cha achuʼn tagu, ‘Ha kalanyu lin un sakon chi imbuun Apudyus un malagu kan chikayu? Chakampun kan sakon ngim hachiʼn misagsagulud kan sakon. Gapu si kilangatula, lappun kalobbongak un mangukas si sancheɏla.’ ”
26 “Susulud un galak Abraham ya chikayuʼn mangapudyus un Gentil, chitaku langipatigammuwan Apudyus si ugudla mipanggop si in-ilolaʼn malagu kan chitaku.
27 Ngim cha taguʼd Jerusalem ya cha papangatcha ked achipuncha laimatulan un si Jesus chi imbuun Apudyus. Achipuncha laawatan un siya ibyegbyegan cha propeta si awi, ulay lu silabyechu un byasbyasaoncha inggilicha. Ngim tilungpeɏcha imbyegan cha propeta, ti ingkodchongchaʼn mapatoy si Jesus.
28 Ulay lappun inchesancha si gapun chi matoyan Jesus, chilawatcha kan Pilate ta ipapatoyla.
29 Lagamputcha pun tilungpeɏ losan un liigili mipanggop kan siya, ummoycha ilopas chi lechegla si krus ot illoboncha.
30 Ngim tilagun Apudyus siya kasin.
31 Ot lampaila si achuʼn eɏgew kan cha lituntun-ud kan siya malipud Galilee inggala Jerusalem. Si sala, chicha cha mantistigu kan cha tagu.
32 “Hachi ummaliyanmi ta ibyegbyegami kan chikayu chi bibiɏuʼn chameg un ingkarin Apudyus kan cha chachakkeɏ taku,
33 hachi lipatungpeɏ kan chitakun galakcha, ti tilagula si Jesus kasin si timpu taku, un siya liigili si mikadwaʼn Salmo, un kalala,
‘Sika alakku. Si salaʼn eɏgew ipailak un sakon chi Amam.’
34 Mipanggop kan Jesus un latagu kasin ta achipun matoy kasin. Siya liigili un
ingkarin Apudyus kan cha tagula si awi un kalala,
‘Idchok kan chikayu chi lasantuwan un binchisyun un ingkarik kan David un
lappun chuwachuwalan matungpeɏ.’
35 “Si Jesus chi katungpaɏan chi hachiʼn ingkarila, ti awed bo liigili un kalan David kan Apudyus,
‘Achipun Apudyus ipalubus un meɏpos chi long-eg chi Lasantuwan.’
36 “Ngim si David, gilamputla pu kawachiʼn impakwan Apudyus kan siya, latoy. Illoboncha si liimbolan cha chachakkeɏla ot ha long-egla leɏpos.
37 Ngim si Jesus, achipun leɏpos chi long-egla, ti tilagun Apudyus siya kasin.
38 “Mipatigammu kan chikayuʼn susulud, un gapu si killingwan Jesus, makwa un pakawalon Apudyus cha byasbyasuɏ taku.
39 Ti gapu kan siya, losan un mamati kan Jesus mapakawan cha losan un byasuɏla, un achipun chi lintog Moses makwa.
40 Allechenyu ta achi makwa cha imbyegan cha propeta kan chikayu, un kalancha.
41 ‘Chongɏonyu, chikayuʼn kaaamsiw, ti awed chi kook si timpuyu un
maschaawanyu ngim matoy kayu mit laing, ti achipunyu
patiyon ulay lu awed mangibyegan ustu-ustu kan chikayu.’ ”
42 Lummawa pun cha Paul kan Barnabas si sinagoga, chilawat cha tagu un mangulincha kasin ta man-ugudcha mipanggop kan cha allaʼn byaleg si umaliʼn Sabyechu.
43 Lummawa pun cha tagu, litun-ud kan cha Paul kan Barnabas cha achuʼn Judio ya cha Gentil un lamati kan Apudyus. Bilegbyegaan cha Paul chicha un ituɏuychaʼn mantegod si kachegun Apudyus.
44 Kasin pun un Sabyechu, lachagup cha losan un tagu si hachiʼn siudad ta manchongeɏcha si ugud Apudyus.
45 Ngim intullong pun cha Judio cha amo-amod un tagu, ummaposcha ot ilisikcha pin-an Paul uguchon ya lan-ugu-uguchencha bo siya.
46 Ngim lateɏod cha Paul kan Barnabas un lan-ugud ot kalancha, “Masapuɏʼn umun-ula mibyegbyega ugud Apudyus kan chikayuʼn Judio. Ngim illissanyu ya ibilangyu long-egyuʼn mismu un achipunyu lobbong chi biyeg un mallalayun. Ked si sala telanmi chikayu ta ingkami kan cha Gentil.
47 Ti allaya imbilin Apudyus kan chikami un kalala,
‘Chilutukak sika un malilaw si somsomok cha Gentil ta awed wayan cha
losan un tagu utla pita un matagu gapu kan sika.’ ”
48 Chingngeɏn pun cha Gentil chi alla, lagalasancha ot chilaychayawcha ugud Apudyus. Ot losan cha chilutukan Apudyus un maidchen si biyeg un mallalayun, lamaticha.
49 Lanchilongeɏ ugud Apudyus si losan un ili-ili si hachiʼn lugeɏ.
50 Ngim cha achipun lamatiʼn Judio silubsubcha cha papangat si hachiʼn siudad ya byebbyebyaiʼn Gentil un langangatu saedcha un pin-a lanchaychayaw kan Apudyus. Ot illugichaʼn mamaligat kan cha Paul kan Barnabas ot pileɏyawcha chicha si hachiʼn siudad.
51 Ot pilukpukancha tapuk si chepancha ta mangipain-ancha un mangamung cha gey si machusaancha. Ot ummoychaʼd Iconium.
52 Ot cha mamati amod chi galascha ya laidchen cha si kilabyelin chi Ispiritun Apudyus.