8
Ha Lamaligatan Saul Kan Cha Mamati
1 Si Saul chi langituluk si lamatoyancha kan Stephen. Si hachiʼn eɏgew lanlugi patunged un lamaligatancha kan cha mamatiʼd Jerusalem ot liwatak cha kaachuwan un mamati. Ummoycha si kailiili si probinsiyan chi Judea kan Samaria ngim latelan cha apostoles.
2 Inggew cha uchum un lelleɏakiʼn mangapudyus un ummoy langimbon kan Stephen ot amod chi ilibincha si langchucha kan siya.
3 Ngim si Saul illugilaʼn pilaligatan cha mamati. Ummoyla lillok cha byebbyeɏoy cha mamati ya lanlatlat kan cha leɏaki man willu byebyai ot impabyaɏudla chicha.
Libyegbyega Bibiɏuʼn Chameg Ud Samaria
4 Cha lawatawatak un mamati, imbyegbyegacha ugud Apudyus si losan un iliʼn ummoyancha.
5 Osa kan chicha ked si Philip. Ummoy si osaʼn ili ud Samaria ot imbyegbyegalaʼn si Jesus chi Messias kan cha tagu udchi.
6 Chingngeɏn pun cha amod un tagu chi imbyegbyegala ya intullongcha cha lakaskaschaaw un pin-ala killingwa, lamaticha si imbyegala.
7 Pileɏyawla cha aɏan un inggew kan cha achuʼn tagu ot ummak-akikis cha aɏan un lummawa ya achu cha lapalalais ya lapilay un lummin-awa.
8 Ot amod chi galas cha tagu si hachiʼn siudad.
9 Inggew chi osaʼn leɏakiʼn mangngachen Simon, un labyeyeg un pin-a mansalamangka si hachiʼn siudad. Laslaschaaw cha taguʼd Samaria si pin-ala killingwa. Ibyegbyegala un siya ked langatuʼn tagu.
10 Ked cha achuʼn tagu, langatu man kan labyabya, ammancha lanchochongngeɏ kan siya ya ibyegbyegacha un, “Ha allaʼn tagu siya Pallakabyelin Apudyus un ngadloncha Kangatuwan.”
11 Ot intuɏuycha lanchochongngeɏ kan siya ti labyeyeg un laslaschaawcha si pin-a mansalamangka.
12 Ngim si lamatiyancha si bibiɏuʼn chameg un imbyegbyegan Philip mipanggop si Mampangatan Apudyus ya mipanggop kan Jesu Kristu, ot lampabunyegcha, cha leɏaki ya cha byebyai.
13 Ulay si Simon lamati ya lampabunyeg bo ot lituntun-ud kan Philip. Ot intullongla pu lakaskaschaaw un killingwan Philip, laschaaw.
14 Chingngeɏn pun cha apostoles ud Jerusalem un lamati cha taguʼd Samaria si ugud Apudyus, imbuuncha cha Peter kan John udchi.
15 Gummatongcha pun, illuwaluwancha cha mamati ta awatoncha Ispiritun Apudyus.
16 Ti hachiʼn timpu, chaan umoy chi Ispiritun Apudyus kan chicha, labunyagencha abus si ngachen Jesu Kristu.
17 Oli pun impatay Peter kan John chi imacha kan chicha ot ummoy chi Ispiritun Apudyus kan chicha.
18 Intullong pun Simon un laatod chi Ispiritun Apudyus kan chicha si langipatayan cha apostoles si imacha kan chicha, langatod si pilak kan cha Peter kan John.
19 Ot kalala, “Idchelak bo si lait un kilabyelin ta ulay silu mangipatayak si imak, maidchen si Ispiritun Apudyus.”
20 Ngim kalan Peter kan siya, “Mipati otyan cha pilaklu kan sika masgob ud impiyeɏlu, ti kalam pun lu makwaʼn mangin-an chi sagot Apudyus si pilak!
21 Lappun biyanglu si allaʼn kawachimi ti chakampun si ustu mansosomsomoklu si sangwalan Apudyus.
22 Mambyabyawika si lawwing un simsimmoklu ked malluwaluka kan Apu, ta lu makwa, pakawalola sika.
23 Ti mailak un amod chi aposlu ya bilabyaɏud chika si byasuɏ.”
24 Ot kalan Simon, “Kewayu ta iluwaluwanyu sakon ta lappun makwa kan cha imbyegayu kan sakon.”
25 Lagamput pun cha Peter kan John impakaammu ya imbyegbyega ugud Apudyus udchi, langulinchaʼd Jerusalem. Si langulilancha, imbyegbyegacha bibiɏuʼn chameg si achuʼn iliʼd Samaria un illoycha.
Lamati Osaʼn IyEthiopia
26 Oli pun, imbyegan chi osaʼn anghel Apudyus kan Philip, “Ingka si mampachaya un kesa un man-osog ud Jerusalem umoy ud Gaza.” Ha allaʼn kesa mangoy si lugeɏ un lappun chelum.
27 Ot lallibbyat si Philip ot ummoy. Ot si inggewala si chaɏan, ilabotla osaʼn langatuʼn opisyeɏ un iyEthiopia un siya man-aayyuwan kan cha losan un kilabyaklang Candace, Reyna ud Ethiopia. Ummoy ud Jerusalem lanchaychayaw kan Apudyus,
28 ot mangulin un lanlulugen si kalisala ked byasbyasaola liblu un inggilin propeta Isaias.
29 Kalan chi Ispiritun Apudyus kan Philip, “Ingka achaliyon chi kalisa.”
30 Ot lalodchak si Philip ummachali, ot chingngeɏla siya un byasbyasaola libluʼn propeta Isaiah. Ot ilimusla, “Maawatam kamman chi halat un byasbyasaom?”
31 Summongbyat chi opisyeɏ, “Ma in-ilok un makaawat lu lappun mangipakaawat kan sakon?” Ot ilayagela si Philip ta makalugen kan siya.
32 Ha bilasbyasala allaya,
“Isun chi keɏlilu un iyoycha si lugeɏʼn peɏpeɏtiyan ya isun chi ayyubun chi keɏlilun
ammala gumigillok lu pukisancha, achipun pulus guminga.
33 Imbibiincha siya ya achipun lalintog chi langkukuischa kan siya. Lappun
mangibyega mipanggop si galakla, ti lapongted chi biyegla utla pita.”
34 Si lamasbyasaala, kalala kan Philip, “Ibyegam u lu silu ibyegbyegan chi propeta. Ha long-egla willu sabyali?”
35 Oli pun gumminga si Philip un illugila si allaʼn liigiliʼn ugud Apudyus. Ot imbyegala bibiɏuʼn chameg mipanggop kan Jesus.
36 Si lanluluggelancha, lichuumcha si awechen chi chelum. Ot kalan chi opisyeɏ kan Philip, “Alliya chelum utla. Ha makwa kamman un mabunyagelak?”
37 Ot kalan Philip, “O, makwa lu tuttuwaʼn mamatika kan Jesus.”
Kalan chi opisyeɏ, “O, mamatiyak. Mamatiyak un si Jesu Kristu ked Alak Apudyus.”
38 Ot pilaillongla kalisa ot lummogsedcha ummoy si chelum ot bilunyagen Philip siya.
39 Ummopwascha pun si chelum, kakman chi Ispiritun Apudyus intallay si Philip si sabyaliʼn lugeɏ. Ot lappun kasin intullong chi opisyeɏ kan siya. Ngim intuɏuy chi opisyeɏʼn ummoyon un langganggalas.
40 Ngim si Philip illinggew ud Azotus. Imbyegbyegala bibiɏuʼn chameg mipanggop kan Jesus si losan un ili un illoyla inggalaʼd gummatong ud Caesarea.