10
Ha Lalakcheɏan Paul Si Kalobbongala
1 Sakon si Paul un kalanchaʼn lapakumbyabya lu sangwalanyu ngim lateɏod lu umachayu kan chikayu. Mangkadkacheguwak kan chikayu gapu si kilaalus ya kilamalagchegun Jesu Kristu.
2 Ipakpakaasik kan chikayu ta lu umaliyak utlat chakampun otyan un masapuɏʼn omɏak chikayu. Ammuk un lateɏochak un mangomeɏ kan cha manchillaw kan chikami un mangibyegbyega un lailubungan chi ugalimi ya panggopmi.
3 Ti ulay tagu kami laing utla pita, chakampun si ikamami cha pin-ami koon un makagubyat gapu si lailubungan un panggop.
4 Ti ha eɏmas un us-useɏonmi ked chakampun un us-useɏon chi tagu utla pita ngim mallakabyelin un eɏmas Apudyus un manyam-anmi si ulay kakoscheɏan un kabusuɏ.
5 Ked yam-alonmi cha losan un lilalastug ya cha mantipod si mangagammuwan chi tagu kan Apudyus. Ked ipapatimi un mangɏog losan chi somsomokmi ta tumuttuwa kan Kristu.
6 Ked lu ipailayu un tumuttuwa kayuʼn ustu-ustu kan Kristu, ked asimi chusaon cha achipun tumuttuwa kan siya.
7 Siyad itutullongyu mamàilan chi atayu. Lu awed mangibyegbyega un siya kalu ustuʼn tagun Kristu, somsomkola otyan chi kilatatagula. Ti ulay chikami, tagu chikami bo kan Kristu.
8 Chakampun un mabiilak, ulay lu lalabos chi mangkokopyak un malakcheɏ si kalobbonganmi un bumibiyang kan chikayu ti Apudyus chi langatod si kalobbonganmi un tumuɏung kan chikayu, chakampun un manyam-alanmi kan chikayu.
9 Ked achiyu kalan un og-ogyatok chikayu si allaʼn suɏatku.
10 Ti awed cha mangibyega un lateɏochak si suɏat ngim lu sangwalan lakapsutak ya lappun simbin chi pin-ak ug-ugguchon.
11 Ked maawatan otyan cha katlat un tagu un lappun mansabyaliyan cha insuɏatmi kan chikayu lu achayu kami, ya koonmi lu awed kami kan chikayu.
12 Lappun teɏodmi un mangiyisu si long-egmi si cha mangichaychayaw si long-egcha. Tuttuwaʼn lappun mapuutcha. Mangwacha si uwachaʼn iisong chi long-egcha ya man-asichayawcha.
13 Ngim chikami, achipunmi ichaychayaw chi chakampun un illidchon Apudyus kan chikami, ti siyad ichayawmi mangwaanmi si ipakwala, ked lipati kayu si hachi.
14 Ked achipunmi lablabson chi biyangmi, ti chikami ummula langibyegbyega kan chikayu si Bibiɏuʼn Chameg mipanggop kan Kristu.
15 Ked chakampun un ichayawmi kawachi un killingwan cha uchum un tagu. Ngim lamlamaonmi un kumoskoscheɏ pammatiyu ta awed katuɏunganmi. Pasig un awed kami si sakup un illidchon Apudyus.
16 Ti pionmi un ingkami ibyegbyega Bibiɏuʼn Chameg kan cha uchum un ili un achayu lu chikayu. Chakampun un masapuɏʼn ichaychayawmi kawachiʼn killingwan cha uchum un tagu si sabyaliʼn ili.
17 Ngim kalan chi liigili un ugud Apudyus, “Lu silu mampachayaw, ichayawla otyan chi killingwan Apudyus.”
18 Ti achipun Apudyus awaton chi taguʼn mangichayaw si long-egla, ngim cha tuttuwaʼn michayaw cha hachiʼn ichayaw Apudyus.