Ha Suɏat Paul
Kan Cha
Mamatiʼd Galatia
1
1 Sakon si Paul un lachutukan un apostoles Jesus Kristu. Chakampun un tagu lanchutuk kan sakon, ngim si Jesu Kristu ya si Amalaʼn Apudyus un lalagu kasin kan siya si latoyala.
2 Allaya suɏatku kan chikayu ud Galatia. Losan kami kan cha biɏun takuʼn mamati utla, pakumustaonmi chikayu losan un pin-a manchetchetong un malaychayaw kan Apudyus si kaili-iliʼd Galatia.
3 Otyan ta pasig Ama takuʼn Apudyus ya Apu takuʼn Jesu Kristu kacheguwan chikayu losan ya mallin-awaoncha bo cha somsomokyu.
4 Si Jesu Kristu un Apu taku, inchuyala long-egla un matoy gapu si byasuɏ taku, ta maseɏaklibyen taku si salaʼn kilalawwing un makmakwa si allaʼn pita. Killingwan Jesu Kristu cha allaya ta matungpeɏ cha pion Ama takuʼn Apudyus.
5 Taplu machaychayaw si Apudyus si ing-inggala. Amen.
Os-ossaan Chi Bibiɏuʼn Chameg Un Mataguwan Taku
(2Co. 11:1-4; 1Ti. 1:3-7)
6 Patungechak maschaaw kan chikayu, ti mallasu ga lan-awichenyu kan Apudyus un lamili kan chikayu gapu si kachegun Jesu Kristu. Ti siya kalu sanguwonyu sabyali un tudtuchu un siya kalu bo bibiɏuʼn chameg
7 Ngim ha katuttuwaan, lappun uchum si bibiɏuʼn chameg un mataguwanyu lu achi abus cha intudtuchumi. Ngim awed cha uchum utlat un manyam-an si somsomokyu un ipappachascha sukatan chi bibiɏuʼn chameg mipanggop kan Jesu Kristu.
8 Ngim ulay lu chikami willu anghel un mampeɏpuʼd langit chi mangibyegbyega kan chikayu si sabyaliʼn bibiɏuʼn chameg un maibusuɏ si lagamputmi imbyegbyega kan chikayu, machuchusa ud impiyeɏlu!
9 Lagamputmi imbyegbyega cha kamatchi kan chikayu, ngim ikasinku ibyega, lu awed mangibyegbyega kan chikayu si sabyaliʼn bibiɏuʼn chameg un maibusuɏ si pilatiyu, machuchusa siya ud impiyeɏlu!
10 Ked himma mammammokanyu kan sakon lù? Ha somsomokyu lin un siyad singsingtok chi michayawak kan cha tagu un chakampun si michayawan Apudyus? Ta lu siyad gamgamak chi chayaw cha tagu, achipunku ituɏuy un mansimbi kan Jesus.
Ha Langean Paul Si Kila-apostolesla
(Act. 9:1-32)
11 Susulud, masapuɏʼn maawatanyu un ha bibiɏuʼn chameg un imbyegbyegak, chakampun un somsomok cha tagu lampeɏpuwala.
12 Ti chakampun bo un tagu langagammuwak willu awed langitudtuchu kan sakon, ngim si Jesu Kristu mismuʼn langipatigammu kan sakon.
13-14 Lachamegyu mambibiyegku si chamu un langipapattiyak si kachawiyan cha Judio. Lamangpanguwolak kan cha chogwaskuʼn Judio ti patungedku impapati kachawiyan cha chachakkeɏmi. Ked patungedku pilampaligatan cha mamati kan Jesu Kristu ya pilachaskuʼn yam-alon chicha.
15 Ngim ulay kamatchi cha killingkingwak, kilacheguwalak kan Apudyus, ti ulay chi chaampunku miyalakan, chiluchuttukalak gapu si kachegula ya ilayagelak un mansimbi kan siya.
16 Ot gummatong pun chi ustuʼn timpu un impatigammula kan sakon chi mipanggop kan Alaklaʼn Jesus, taplu ibyegbyegak kan chikayuʼn Gentil. Chakampun un ilachek si tagu,
17 willu ummoyak ud Jerusalem lan-acheɏ kan cha hachiʼn ummun-ulaʼn apostoles, ti ha killingwak, langaw-asak ud Arabia asiyak ot mangulin kasin ud Damascus.
18 Ked lummaus pu tiɏuʼn tawon, ummoyku gilaggakay si Peter ud Jerusalem, ot illinggewak kan siya si lasawaɏan si liman eɏgew.
19 Ngim lappun intuntullongku kan cha uchum un apostoles, abus si James un sulud Apu Jesus.
20 Tuttuwa losan cha allaʼn isuɏatku kan chikayu. Ammun Apudyus un achipulak mantuntulli.
21 Oli pun, ummoyak bo kan cha ili un sakupon chi Syria ya Cilicia.
22 Ngim si hachiʼn timpu, lappun sin-ammu kan sakon kan cha hachiʼn mamati kan Jesus ud Judea.
23 Ti siyad abus un chameg cha tagu kan sakon chi lamampaligatak kan cha mamati si sin-eɏgew, ngim si sala, allaʼn ibyegbyegak chi pammatiʼn pilachaskuʼn yam-alon.
24 Ot chilaychayawcha si Apudyus gapu kan sakon.