3
Pammati Mataguwan, Chakampun Un Lintog
(Rom. 8:1-17)
1 Chikayuʼn iGalatia, isuyu latingang! Silu lamaliw kan chikayu un lallasuga lamatiyanyu si sabyali? Lalaweg mit chi lantutudtuchumi kan chikayu mipanggop si latoyan Jesu Kristu si krus!
2 Awed chi imusok kan chikayu: Ha laawatyu kamman chi Ispiritun Apudyus gapu si lalungpaɏanyu si lintog? Willu gapu si lamatiyanyu kan Jesu Kristu si langngeɏanyu si bibiɏuʼn chameg?
3 Isuyu latingang! Lallugi kayu si laapudyusan un biyeg gapu si tuɏung chi Ispiritun Apudyus, payuggey ituɏuy si uwayuʼn kabyeeɏan?
4 Ha lappun gey simbin cha achuʼn lapachasyu malipud si lamatiyanyu kan Jesu Kristu? Papayalonyu otyan.
5 Somsomkonyu alla: Ha langidchen Apudyus si Ispiritula, ta inggew kan chikayu, ya langipain-ala si lakaskaschaaw? Gapu kamman si lalungpaɏanyu si lintog willu ha lamatiyanyu si bibiɏun chameg mipanggop kan Jesu Kristu un chingngeɏyu?
6 Iyaligku lakwa kan apu takuʼn Abraham, liigili si ugud Apudyus un, “Si Abraham, pilatila imbyegan Apudyus, ked gapu si hachiʼn pammatila, imbilang Apudyus siya lalintog.”
7 Ked maawatanyu otyan un cha taguʼn mamati kan Apudyus, chicha cha tuttuwaʼn galak Abraham.
8 Liigili si ugud Apudyus si awi un gumatong chi eɏgew un ibilang Apudyus cha Gentil lalintog lu mamaticha kan siya. Ked hachi bibiɏuʼn chameg un imbyegan Apudyus kan Abraham un kalala, “Mipagapu kan sika, mabinchisyulan cha losan un tagu si allaʼn pita.”
9 Ot binchisyulan Apudyus cha losan un mamati un isun chi laminchisyulala kan Abraham gapu bo si pammatila kan siya.
10 Ked losan un mallamlama un awaton Apudyus siya gapu si malungpaɏala si lintog, ked machusacha si ing-inggala un inggilin Moses. Kapilitan un machusa, ti ha liigili si ugud Apudyus, kalala, “Losan un achipun tumuttuwa si ulay ossaan un lintog Apudyus un inggilin Moses, machusa cha ing-inggala.” Mismuʼn Apudyus chi langibyega si hachi, ked awed kamman tagu si ilaminla tiluttuwa lintog?
11 Ked susulud, patunged lalaweg un achipun makwa un ibilang Apudyus chi tagu lalintog kan siya gapu si lalungpaɏala si lintog. Ti kalala, “Ibilang Apudyus chi tagu lalintog lu mamati kan siya, ya makatagu kan siya si ing-inggala.”
12 Ngim ha lintog, sabyali kalala, ti chakampun un pammati lambyeseɏala, ti kalala, “Ha tagu un malungpeɏ si losan un bilin chi lintog ked achipun machusa, makatagu kan siya si ing-inggala.”
13 Ngim gapu ta lappun tagu si makatungpeɏ si losan un bilin chi lintog, losan otyan cha tagu machusa. Ngim bilayachen chitaku kan Jesu Kristu ti inchuyala long-egla un machusa ta masaka taku. Ti liigili un kalala, “Losan un taguʼn machusa mibitin si kayu, hachi main-an chi chusan Apudyus kan siya.”
14 Ked kamatchi lakwa kan Jesu Kristu taplu makwa un awatonyu un Gentil cha ingkarin Apudyus kan Abraham, Ti si sala, lu mamati taku kan Jesu Kristu, umali Ispiritun Apudyus kan chitaku losan, ti siya ingkarila.
Ha Mansabyaliyan Chi Ingkarin Apudyus Si Lintog Moses
(Rom. 4:1-22; Heb. 6:13-15)
15 Susulud, useɏok un mantuɏachen chi billigat un makmakwa. Lu awatlaʼn mantuɏeg cha chuwaʼn tagu ked pilinmaancha hachiʼn tuɏeg, achipun makwa un awed mangobos willu maloga si hachiʼn lantuɏagencha.
16 Ked awed chi ingkarin Apudyus kan Abraham un awed chi osaʼn galakla un lumoswa. Ked maawatanyu otyan un chakampun un kalalaʼn iloswan cha achuʼn galakla, ti ha kalala, iloswan chi ossaan un galakla. Ked hachiʼn galakla, siya si Jesu Kristu.
17 Ked lisisigud chi hachiʼn intuɏeg Apudyus kan Abraham un ingkarilaʼn iloswala si umaliʼn eɏgew. Lummaus pu opatgasut ya tiɏumpuɏun tawon asiyot Apudyus idchon chi lintog kan Moses. Ked achipun makwa un ha lintog iwalinla lantuɏagen cha Apudyus kan Abraham ti lisagsagulud chi lintog.
18 Ti himma simbin chi langikariyan Apudyus, lu mibyeseɏ si malungpaɏan si lintog un lisagsagulud! Ti ha katuttuwaan, illidchon Apudyus chi intuɏegla kan Abraham un makataguwan si ing-inggala ti siya ingkarila.
Ha Kauseɏan Chi Lintog
(Rom. 7:7-13; 11:32; Eph. 2:1-10; Col. 3:11)
19 Kalanyu lin un, simman bo simbin chi lintog? Somsomkonyu allaya: Ha kauseɏan chi lintog, un insagsagulud Apudyus, taplu awed mangilasilan cha tagu si kilalawwing cha pin-acha koon. Ti ha simsimmok Apudyus, matungpeɏ cha hachi inggala lu gumatong chi osaʼn galak Abraham un langikariyala. Hachiʼn ingkarin Apudyus, patunged lapotog lu hachiʼn lintog. Ti ilanyu: Ha langibyeg-an Apudyus si lintog, imbuunla cha angheles un isun chi mambyega, ked chicha langibyega kan Moses asila ot ibyega kan cha tagu.
20 Ngim hachiʼn ingkarin Apudyus kan Abraham, lappun lambyega ti si Apudyus un mismu ummoy lakatuɏeg kan Abraham.
21 Kalanyu lin un lu kamatchi, suplingon chi lintog chi hachiʼn ingkarin Apudyus. Ngim chakampun! Ti ilanyu: Lu awed lintog un kalobbongalaʼn malagu si tagu, losan otyan cha tagu maibilang lalintog kan Apudyus lu tungpaɏoncha lintog.
22 Ngim achipun umalay chi lintog un malagu si tagu, ti imbyebyeggan chi liigili si ugud Apudyus un labyabyaɏud cha losan un tagu si kilabyelin chi byasuɏ. Ked masapuɏʼn mamaticha kan Jesu Kristu, ta makwa un idchon Apudyus kan chicha hachiʼn ingkarila un mataguwancha.
23 Si chaampun Jesu Kristu umaliyan, isun chi imbyabyaɏud chitaku si lintog ti siya langiyaachug kan chitaku. Imbyabyaɏudla chitaku inggala lipatigammu mipanggop si mamatiyan kan Jesu Kristu.
24 Ked isun chi hachiʼn lintog chi lalitingngeɏ kan chitaku inggala si ummaliyan Jesu Kristu. Ngim gapu ta ummali si Jesu Kristu, makwa un ibilang Apudyus chitaku lalintog kan siya gapu si mamatiyan taku.
25 Ngim si sala un gummatong chi mamatiyan kan Jesu Kristu, chakampun un lintog chi malitingngeɏ kan chitaku.
26 Ked gapu si pammati taku kan Jesu Kristu, libilang taku alak Apudyus.
27 Ked chitaku losan un mamati ya labunyagen gapu si lamatiyan taku kan Jesu Kristu, tuɏachon taku somsomokla ta siya mansosomsomok taku.
28 Ked si sala, lappun mansabyaliyan cha Judio ya cha Gentil, musassu willu chakampun, ulay leɏaki kan byebyai ti man-iisucha si sangwalan Apudyus gapu si lamatiyancha kan Jesu Kristu.
29 Ked lu tagu chikayu kan Jesu Kristu, ulay lu Gentil kayu, mibilang kayu un tuttuwaʼn galak Abraham ya chikayu manginlaksun kan cha losan un ingkarin Apudyus kan Abraham.