1 Ked si hachi, achipun kami makaiyattom si ayumi kan chikayu, simsimmokmi un matelan kami kan Silas ud Athens. 2 Ot imbuunmi si Timothy utlat, siya osaʼn sulud taku un mansimbi kan Apudyus si mangibyegbyeg-anmi si bibiɏuʼn chameg mipanggop kan Kristu. Imbuunmi siya taplu pakoscheɏola ya segagola chikayu si pammatiyu, 3 taplu lappun otyan ossaan si umuya kan chikayu gapu kan cha ligatyu. Lagamputyu ilammu un likodchong un mapaligatan taku. 4 Ti ha illinggewanmi kan chikayu, imbyegbyegami un gumatong chi mapaligan taku ked ilagammuyu un tuttuwaʼn lapasamak. 5 Ked hachi langibuulak kan Timothy utlat taplu ammuwok chi mipanggop si pammatiyu, ti lachalagelak paka lawa ta silubsub Satalas chikayu ked kenga langkawachiyanmi.

6 Ngim si salaʼn langulin si Timothy utla, ked bibiɏu impachamegla mipanggop si pammatiyu kan man-aayatyu. Imbyegala bo un pasigyu chikami masmasmok ked ha man-aayuyu kan chikami ked isun bod chi man-aayumi kan chikayu. 7 Ked susulud, ulay amod chi ligat un pilachapachasmi, lasegeg chi somsomokmi gapu kan cha chingngeɏmi mipanggop si pammatiyu, 8 Ked si sala, lummin-ot chi mataguwanmi lu ituɏutuɏuyyu pakoscheɏon chi pammatiyu kan Apu Jesu Kristu. 9 Ked amod chi manyayamanmi kan Apudyus mipagapu kan chikayu, ti amod chi galas un laliklami mipagapu kan chikayu si sangwalan Apudyus. 10 Ked iluwaluwalumi si ileɏgew ya lilabi ta mantitillullong taku kasin taplu ipakaawatmi kan chikayu lu simma mangkuɏangan chi pammatiyu.

11 Sapay otyan ta si Ama takuʼn Apudyus ya Apu takuʼn Jesus chi mangichaɏan kan chikami si chaɏanmi un umali kan chikayu. 12 Sapay otyan ta eɏ-eɏton Apu Jesus chi man-aayatyu si kacha osa ya ayatyu kan cha losan un tagu, un isun chi kilakoscheɏn chi man-aayatmi kan chikayu. 13 Ked lu kamatchi, pakoscheɏola somsomokyu taplu lappun makabyasuɏanyu ya lappun bod machillawanyu si sangwalan Apudyus si mangulilan Apu takuʼn Jesus un buɏlan cha losan un tagula.