12
Si Apudyus Un Ama Taku
1 Ked chitaku bo, gapu ta achu-achu taguʼn langalligu kan chitaku un langipaloklok si pammaticha, masapuɏʼn kaalon taku cha losan un sumlod ya cha byasuɏ un langituray kan chitaku. Ked igga taku kabyeeɏan taku un mangwa si simsimmok Apudyus un isun chi osaʼn umoy makatodtodchak si todtodchak.
2 Ya ipapati taku un mangisosomok kan Jesus un puun ya mangigamput si pammati taku. Ilan-alusala cha ligat si krus un achipunla imbibiin chi latoyala gapu si gumalasala un lan-uuway kan siya. Ked si sala, awed un ummamuy si machuwalan Apudyus ud langit un makaturay kan siya.
3 Ked ammanyu somsomkon chi in-ilon Jesus un langan-alus si amod un ligat un killingwan cha malagbyasuɏ kan siya, ta achipun kayu umuya willu achipunyu iyagey un mantegod kan Apudyus.
4 Ti ha katuttuwaan, lappun mit lapatoy kan chikayu si mamadpachasanyu un achipun makabyasuɏ.
5 Ha laliwatanyu ugud Apudyus un malegeg kan chikayu un imbilangla un aalakla? Kalala,
“Alakku, achim manliwliw-an chi palagsaplit Apudyus
ya achika umuya lu omeɏala sika.
6 Ti si Apudyus saplitala cha ay-ayatola ya chusaola
cha losan un imbilangla un alakla.”
7 Ked alusanyu ligat ya ibilangyu un isun chi mansasaplit Apudyus kan chikayu ti imbilangla chikayu un aalakla. Ti lappun alak un achipun chi amala omɏan ya saplitan.
8 Lu achipunla chikayu saplitan un isun chi mansasaplitla kan cha losan un alakla, chakampun un tuttuwaʼn alak chikayu ngim sabyali sin-alak kan chikayu.
9 Isun cha chachakkeɏ taku utla pita, saplitancha chitaku ked potgon taku mit chicha. Singkumaɏu otyan un mampaituray taku kan Ama takuʼd langit ta matatagu taku.
10 Ti cha aamma taku utla pita, sin-akitan chi mansasaplitcha kan chitaku un simsimmokchaʼn bibiɏuwoncha. Ngim si Apudyus saplitala chitaku si bumaɏuwan taku, ta mambyalin taku laapudyusan un isula.
11 Ha timpun chi masaplitan taku, achipun taku magalasan ti mansigeb. Ngim lu lagamput, ha ibungala ked lumin-awaan chi somsomok ya lalintog un biyeg kan chitakuʼn lakapachas si saplitla.
Tudtuchu Ya Lipatubgan Bilin
12 Ked, pakoscheɏonyu cha laungeɏn imayu ya lakapsut un puwogyu.
13 Ked ituɏuyyu biyeg un makaay-ayu kan Apudyus, ta cha mampilapilay chi pammatichaʼn mangitutullong kan chikayu ked achipuncha kumapsut ngim kumoscheɏcha.
14 Iggayu kabyeeɏanyuʼn makatimpuyug kan cha losan un tagu ya iggayu kabyeeɏanyu un umulud si laapudyusan un kabibiyeg, ti lu achipun laapudyusan chi tagu, ked achipunla itullong si Apudyus.
15 Masapuɏʼn ilanyu ta lappun otyan mangissan kan chikayu si kachegun Apudyus. Ya ilanyu ta lappun otyan manlotwachen cha lawwing langkedlu umiklap ya gumulu ya achu cha mitakuɏung.
16 Ked ilanyu ta lappun kan chikayu chi mangwa si kakitkitagen willu achipunla ipotog chi laapudyusan un byaleg un isun Esau. Ti insukatla kalobbongan chi panguɏuʼn alak si singkumakan.
17 Ked ammuyu un lagamput pu alla, piolaʼn aɏan chi binchisyun amala ngim ilissan amala. Ti liluus un lappun mamaliw si killingwala ulay lu lalluluwa un langibyabyawi.
18 Ha umacheliyan taku kan Apudyus ked chakampun un isun cha lapachasan cha iyIsrael ud Bilig Sinai un ummachelicha si osaʼn bilig un inggew chi gumilegileb un apuy, manggikbot ya bummali.
19 Chingngeɏcha bo tangguyub ya kaog-ogyat un gingan Apudyus. Si chingngeɏcha hachiʼn gingan Apudyus, langkadkachegucha un achipun guminga kan chicha.
20 Ti achipuncha makwaʼn tungpaɏon chi imbilinla: Lu awed mangchos si allaʼn bilig, ulay ayam, masapuɏn tamtampukonyu inggala matoy.
21 Ked gapu ta patunged kaog-ogyat chi hachiʼn intullongcha, ulay si Moses kalala, mamaypayogpogak gapu si ogyatku.
22 Ngim chitaku, ummacheli taku si Bilig Zion ya si siudad chi latattaguʼn Apudyus ya Jerusalem ud langit, un lagalas un man-um-ummungan cha kalibu-libun angheles un manchaychayaw kan siya.
23 Ummacheli taku si man-um-ummungan cha aalak Apudyus, un lililista ngachencha ud langit. Ya ummacheli taku kan Apudyus un manguis kan cha losan un tagu ya cha ispiritu cha lalintog un tagu un lambyalilon Apudyus lappun mangkuɏangancha.
24 Ked ummacheli taku kan Jesus un mangiyugud si baruʼn tuɏeg kan Apudyus ya ha libukbuk un chaɏala chi mangibyega si labibbiɏuʼn byaleg lu ha chaɏan Abel.
25 Ked ilanyu ta ammanyu chongɏon si Apudyus, achiyu isikon lu siya man-ugud kan chikayu. Ti lu cha iyIsrael si awi un achipun lanchongeɏ kan Moses utla pita ked achipuncha lalisiyan chi chusan Apudyus. Ked himma in-ilon taku un makailisi si machusaan lu achipun taku chongɏon chi ipatubgan Apudyus un lampeɏpuʼd langit.
26 Gumminga pun si Apudyus, liyug-on utla pita. Ngim si sala ingkarila, Mamingsan pay un iyug-onku chakampun abus chi allaʼn pita ngim ulay cha awed ud langit.
27 Ha ugud un mamingsan pay ked ipailala chi makaalan cha losan un killingwala un liyug-on, ta cha achipun miyug-on cha iinggew.
28 Ked susulud, manyaman taku kan Apudyus ti mipapatti taku si mampangatala un achipun miyug-on. Ya chayawon taku si Apudyus un lakaay-ayu kan siya un ipotog taku ya ogyatan taku siya.
29 Ti si Apudyus taku ked isun chi apuy un lasapola losan.